「比利卡比利那那 撲撲利那 比比路多！」🪄 呢句咒語一響起，細個放學坐喺電視機前嘅回憶係咪即刻湧晒上嚟？今年係《小魔女 DoReMi》誕生25週年，官方正式將日本巡迴特展搬到嚟香港，將於2026年12月4日至2027年1月3日登陸旺角創興廣場地庫INCUBASE Arena！
圖片來源：官方圖片｜撰文：Sharon
今次香港站以「魔法珠，你還留著嗎？」做主題，現場完全原汁原味還原日本站規格！除咗有美空第一小學經典課室、超震撼嘅魔女界實景，仲有FRP立體裝置、多媒體展演同極珍貴嘅動畫原畫展出，打卡位多到影唔停！而且喺12月指定週末（12-13日、19-20日）仲會加碼搞「限定角色見面會」，只要喺現場買夠指定金額，就可以獨家換領見面會券同人氣角色近距離合照互動！
各位小魔女忠粉最關心嘅入場特典亦相當有誠意！基本上一入場就已經有見面禮，隨飛附送展覽紀念卡同隨機一款角色壓克力立牌（全套共6款）。如果想更有紀念價值，今次仲特別推出咗三款特典門票：特典票A 同B會分別會送3隻日版限定公仔，A 款齊集DoReMi、初貴同愛子，B款就有音符、桃子同小花；至於特典票C更加包咗由人物設計師馬越嘉彥親手特繪嘅插圖相框，掛喺屋企珍藏一流！
【INFO】 《小魔女DoReMi - 25週年紀念展香港站》 地點：旺角創興廣場地庫B1 INCUBASE Arena 日期：2026年12月4日至2027年1月3日 開放時間： 星期一至五：12:00 - 22:00（21:30最後入場） 星期六、日及公眾假期：11:00 - 22:00（21:30最後入場） 門票資訊： 早鳥優惠（2026年10月30日至2026年12月3日） 二人門票：HKD138；特典門票A/B：HKD 570；特典門票C：HKD210 展期正價門票（2026年12月4日至2027年1月3日） 單人門票：HKD78；二人門票：HKD148；特典門票C：HKD230
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
