GO PARK Aqua | 夏天就最啱約埋朋友一齊去玩水上活動～佔地13萬平方呎嘅「GO PARK Aqua」已經正式開幕，等大家都可以玩獨木舟、直立板、滑浪風翼等水上運動！仲有生態遠足導賞團以及單車導賞體驗等，即刻入內文睇詳情啦！
圖片來源：官方圖片 | 撰文：Hedy
全新水上活動中心「GO PARK Aqua」正式開幕，距離西沙GO PARK只需約6分鐘步程，佔地13萬平方呎，等大家都可以玩盡水上活動、生態遠足、單車及一日遊活動全方位探索西沙！
GO PARK Aqua水上活動中心 | 1. 水上活動體驗
GO PARK Aqua夥拍藍天體育會，提供適合各種年齡及程度嘅專業水上運動常規課程，當中包括獨木舟、直立板、新興的滑浪風翼 (Wingfoil) 以及龍舟等。所有嘅課程都會有專業教練全程指導，大家學習基本技巧之後就會由教練帶領出發，就算係新手都可以盡情享受水上活動嘅樂趣～另外，仲有唔同嘅水上探索之旅畀大家選擇，擇不同的水上探索之旅，例如紅樹林獨木舟生態探索，划獨木舟或直立板遊覽附近嘅絕美小島及村落，如烏洲、三杯酒、榕樹澳、塔門等，放假嘅時候同朋友去玩都係一個唔錯嘅體驗～大家都可以下載GO PARK Sports手機應用程式或到網站，報名及查詢唔同嘅課程！
GO PARK Aqua水上活動中心 | 2. 生態遠足導賞團
平時鍾意行山嘅朋友，仲可以參與唔同嘅生態導賞遠足路線，例如係「深涌客家滋味行」帶大家走訪滿載歷史嘅廢棄村落遺址、百年歷史天主堂及生機盎然嘅魚塘群等，亦有其他路線如「地質瑰寶：荔枝莊導賞團」帶你觀賞1.4億年前形成嘅火山岩柱群及二戰時期嘅歷史遺跡等。無論係一家人定係情侶都可以一齊感受地質奇觀、文化遺產與生態多樣性嘅完美交融！
GO PARK Aqua水上活動中心 | 3. 單車導賞團
夏天最啱就係帶埋小朋友一齊踩單車享受家庭樂，GO PARK Aqua特別推出單車導賞團，提供租借單車及裝備，等你輕鬆漫遊馬鞍山、沙田、大埔等地，充分體驗運動旅遊及大自然嘅魅力。
GO PARK Aqua水上活動中心 | 4. 特色打卡位
大家除咗可以享受各種運動之外，GO PARK Aqua於海岸線設置咗多個別具特色嘅打卡位，包括與自然融合嘅裝置藝術《流影光環》、巨型相框及GO PARK Aqua字母櫈等地標設施。另外，每逢週末，海景平台仲會舉辦多元化嘅樂活工作坊，包括頌缽陰瑜伽、親子瑜伽、養生茶道與太極、咖啡藝術、靜心書寫工作坊，以及環保藝術手作等，令大家都可以過一個充實而美好嘅週末！
GO PARK Aqua水上活動中心 | 5. 毛孩專屬活動
GO PARK Aqua更係一個寵物友善嘅場地，除咗提供寵物所需嘅設施之外，仲會推出一系列嘅毛孩專屬活動，例如寵物共融獨木舟之旅等。同時亦有人寵瑜伽、萌寵派對及提供專業寵物寫真服務，等大家都可以同愛寵盡享歡樂時光！
【INFO】 《西沙GO PARK》 地址：西沙海盈路9號
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
