6月好去處2024 | 今個6月要好好慶祝父親節，更要請爸爸食飯～食飽飯之後又可以一家人一齊去散步，行下商場同市集，放假嘅時候都可以去呢21大好去處玩下，即刻睇睇香港有邊度好去！
圖片來源：官方圖片、香港迪士尼樂園、香港旅遊發展局、香港旅遊發展局、Instagram@waterbomb_hongkong_official、s2ohongkong、Facebook@家鄉市集嘉年華、Hong Kong Times Square | 撰文：Hedy
香港6月好去處 | 1. 元朗全新商場YOHO MIX（6月1日開幕）
各位元朗嘅朋友要留意啦～元朗全新商場「YOHO MIX 元點」及 「YOHO PLUS 加點」將會喺6月1日正式開幕。為咗慶祝開幕月，商場將會有7米巨型充氣恐龍家族畀大家打卡，DINO家族將會同大家見面！如果對爬蟲類動物情有獨鍾嘅你，就一定要參加埋由香港兩棲及爬蟲協會舉辦嘅「異寵世界」，於指定日子更可以近距離接觸激罕兩棲及爬蟲動物，當中包括白化鬣蜥、暴風雪豹紋守宮、墨西哥黑王蛇等等，一定會令小朋友同大家大開眼界！開幕當日商場入面都會派發開幕紀念品、夢幻棉花糖以及繽紛氣球等。仲有雪糕車遊走於元朗、天水圍及屯門各處，免費派發透心涼雪糕畀大家，一齊享受開幕月熱鬧嘅氣氛！
【INFO】
《元朗全新商場YOHO MIX開幕》
日期：6月1日至6月30日
時間：10:00至22:00
地點：YOHO MIX 戶外廣場
香港6月好去處 | 2.《Chill•治癒•海濱文創祭》市集（即日起至6月2日）
《Chill•治癒•海濱文創祭》市集喺5月31日至6月2日，於灣仔海濱活動空間舉辦。當中將會有100個零售攤檔，無論係文創產品、香水以及水晶等都可以喺度買到！寵物零食以及寵物用品都可以選購，放假嘅時候不妨帶埋毛孩去散步～就連小朋友最愛嘅泡泡放題以及魔術表演都有齊，最啱6月1日兒童節嘅時候帶佢哋入場玩，只需要畀$50入場費就可以任玩泡泡跳彈床、巨型泡泡槍、泡泡機同泡泡球等～現場更有音樂以及免費瑜伽班上，等你同屋企人都可以過一個愉快又輕鬆嘅週末。
【INFO】 《Chill•治癒•海濱文創祭》市集 日期: 2024年5月31日至6月2日 時間: 14:00至21:00（5月31日至6月1日）；12:00至20:00（6月2日） 地點: 灣仔海濱活動空間
香港6月好去處 | 3. WATERBOMB音樂節香港站（6月1至6月2日）
韓國大型潑水音樂節WATERBOMB終於都嚟到香港啦，大家都可以一齊濕身同樂～除咗可以享受K-pop偶像喺台上面表演之餘，歌手同觀眾將會分成兩個唔同顏色嘅隊伍，一齊用手上嘅水槍互動，喺炎炎夏日入面體驗清涼快感！表演將會有泫雅、Jay Park、Rain、Jessi以及權恩妃等人，大家準備好一齊玩水未呢！
【INFO】 《WATERBOMB FESTIVAL HONG KONG》 日期：2024年6月1日至2日 時間：下午16:00至晚上22:00 地點：香港尖沙咀西九龍竹翠公園 票價：港幣$1,180起 購票連結：https://bit.ly/4bgUmSL
延伸閱讀：【韓國潑水音樂節WATERBOMB首度登港、即睇香港站完整陣容+日期 】
香港6月好去處 | 4. 同鄉社團家鄉市集嘉年華（6月1至6月5日）
第二屆同鄉社團家鄉市集嘉年華將會喺6月1至6月5日喺維多利亞公園舉行，除咗有特產展銷、文藝表演、非遺展示之外，仲有唔少家鄉美食例如淄博燒烤以及內蒙古烤全羊等等。同場亦設有端午主題嘅親子互動遊樂區，小朋友有得食之餘又可以放電！
【INFO】 《同鄉社團家鄉市集嘉年華》 日期：2024年6月1至6月5日 時間：16:30至21:30（6月1日）；10:30至21:00（6月2日）；16:30至21:30（6月3至5日） 地點：香港維多利亞公園3號至6號足球場及草地
香港6月好去處 | 5. 陳卓賢個人展覽「Inimitable : I – nfinity」（即日起至6月16日）
適逢6月為Ian陳卓賢嘅生日，陳卓賢國際歌迷會（香港）由即日起至6月16日，喺銅鑼灣時代廣場舉行「Inimitable : I – nfinity / 獨一無限」個人展覽。露天廣場設有3大主題房間，帶大家深入認識Ian唔同嘅面向，而地庫1樓就有生日限定巨型扭蛋機，仲有主題即影即有相機，各位Hellosss都可以同Ian打卡留念！
【INFO】 《「Inimitable : I - nfinity / 獨一無限」陳卓賢個人展覽》 日期︰即日起至6月16日 時間︰10:00至22:00 地點︰銅鑼灣時代廣場露天廣場及地庫1樓
香港6月好去處 | 6. 大麻成期間限定便利店TMS MART（6月6日至7月7日）
唔少人都鍾意去日本便利店同富士山打卡～依家唔使飛去日本就已經有超得意嘅TMS MART期間限定便利店，更由大麻成、小麻成同阿婆親自主理，大家都可以喺便利店入面搵到佢哋蛇王嘅身影！6月亦都係大麻成生日，便利店入面將會有巨型「長壽杯麵」等大家一齊打卡同大麻成慶祝生日，就連原作插畫家蘇泳康亦會親臨LCX舉行生日簽名！粉絲們記得要入手埋50款全新限量精品先好走呀！
【INFO】
《大麻成期間限定便利店TMS MART》
日期：2024年6月6日 至 2024年7月7日
時間：上午10時至晚上10時（2024年6月6日下午4時開始）
地點：尖沙咀海港城海運大廈三階 LCX
香港6月好去處 | 7. S2O亞洲潑水音樂節（6月8至6月9日）
全球最大型嘅潑水音樂派對「S2O亞洲潑水音樂節」，將於6月8日以及6月9日再度喺中環海濱活動空間舉行。今年將會全面提升香港嘅濕身區、噴水以及舞台效果，以獨創嘅「360 度環迴噴水系統」，務求能令大家一齊濕身狂歡！今年嘅完整表演名單亦已經出爐，當中包括2023年百大DJ跳舞音樂界冉冉新星ACRAZE、2023年DJ Mag世界百大DJ排行榜第4嘅巴西巨星ALOK、「電音界莫札特」ANDREW RAYEL、荷蘭電音界新星DJ BROOKS以及「電音巨人」AFROJACK等等。
【INFO】
《S2O亞洲潑水音樂節》
日期：2024年6月8至6月9日
時間：下午13:00至晚上23:00
地點：中環海濱活動空間
購票連結：https://bit.ly/44aL0o
香港6月好去處 | 8. LINE FRIENDS Hong Kong Summer Chill（6月8日至7月1日）
LINE FRIENDS BROWN、CONY、SALLY、CHOCO等一眾好友將會喺今個夏天到訪唔同地標，佢哋更會化身成為龍舟選手一齊慶祝端午節！大家都可以喺尖沙咀星光大道見到佢地，仲有LINE FRIENDS期間限定店，今次將會有專為龍舟盛事設計嘅香港限定紀念品發售，等大家齊齊歡渡端午節！
【INFO】 《LINE FRIENDS Hong Kong Summer Chill》 日期：2024年6月8日至7月1日 時間：10:00至22:00 地點：尖沙咀星光大道
香港6月好去處 | 9. 香港迪士尼樂園「Marvel超級英雄匯」（即日起至6月10日）
各位Marvel迷要出動喇！香港迪士尼樂園展開「Marvel超級英雄匯」活動，可以近距離同Marvel超級英雄例如美國隊長等互動，仲有全新日間表演「超能覺醒：史達科技展保衛戰」。就連夜晚都可以睇到新增嘅無人機表演「超能覺醒：空中反擊戰」，真係好期待！
【INFO】
《Marvel超級英雄匯》
日期：即日起至6月10日
地點：香港迪士尼樂園
香港6月好去處 | 10. 尖沙咀新港中心《鋼之鍊金術師展》（即日起至6月11日）
各位動漫們絕對唔可以錯過《鋼之鍊金術師展‧香港站》，展覽將會由即日起至6月11日喺尖沙咀廣東道30號新港中心1樓 Anima Tokyo（Incubase Arena）展出。今次將會有7個獨特嘅展區，展示荒川弘老師傳奇漫畫嘅全貌，近距離觀賞到佢嘅繪圖、草圖同埋概念圖，機會好難得！同場除咗有獨家週邊商品外，亦有限定餐飲系列，包括「鋼之鍊成」串燒&蝦餅、香辣肉醬熱狗、酥脆蘋果批等。每位購票入場嘅人士都會有限量紀念卡一張，粉絲們一定要去！
【INFO】 《鋼之鍊金術師展・香港站》 日期：即日起至2024年6月11日 時間：上午10:00至晚上22:00（最後入場時間21:00） 地點：香港尖沙咀廣東道30號新港中心1樓Anima Tokyo (Incubase Arena) 購買門票：https://bit.ly/4d6a84e
香港6月好去處 | 11. 維港海上煙火表演（6月15日）
香港旅遊發展局早期宣布，由5月開始為定期配合節慶或大型表演，將會推出海上煙火或無人機表演。而6月15日就會有煙火表演，絢麗奪目嘅海上煙火為維港動人夜景錦上添花，利用光影與色彩締造出難忘體驗，大家都可以喺灣仔海濱場地呢一個最佳觀賞位置欣賞！
【INFO】 海上煙火表演 日期：2024年6月15日 時間：晚上20:00(表演全長約10分鐘) 地點：灣仔海濱場地對出海面
香港6月好去處 | 12. 香港國際龍舟邀請賽（6月15至6月16日）
大家又有冇睇過香港國際龍舟邀請賽呢，今年6月15至6月16日將會有數千名嚟自世界各地頂級嘅龍舟運動員比賽，歡迎大家到場為健兒吶喊打氣！尖沙咀東部海濱（九龍香格里拉酒店外）至星光大道李小龍銅像一帶都係觀賞區，場地亦設有蓋看台，咁就唔怕太曬啦！
【INFO】 《香港國際龍舟邀請賽》 日期：2024年6月15至16日 時間：8:00至19:00（6月15日）；8:00至18:00（6月16日） 地點：尖沙咀東部海濱
香港6月好去處 | 13. MCP x KAKAO FRIENDS 玩轉夏日競技場（6月15至8月10日）
全港首個近3,000呎KAKAO FRIENDS主題平衡車賽道，一眾小朋友都可以化身成為小車神馳騁賽道，等大家都可以參與夏日盛大運動會！今個暑假MCP新都城中心打造「MCP x KAKAO FRIENDS玩轉夏日競技場」，8位人氣KAKAO FRIENDS成員Ryan、Apeach、Muzi、Frodo、Con、Neo、Tube及Jay-G齊齊出動！除咗有平衡車賽道之外，仲有籃球以及劍擊任務等緊大家，當然唔少得6大打卡位同6米高嘅巨型充氣Ryan登場！
【INFO】 《MCP x KAKAO FRIENDS 玩轉夏日競技場》 日期：2024年6月15日至8月10日 時間：10:00至22:00 地點：MCP CENTRAL（新都城中心2期）L1天幕廣場
香港6月好去處 | 14. 香港兒童平衡車嘉年華（6月16日）
想帶小朋友體驗平衡車，就絕對要去位於灣仔海濱活動空間嘅香港兒童平衡車嘉年華，呢度有大量平衡車同保護裝置，等小朋友免費試玩之餘又相當安全，可以有助加強小朋友嘅平衡力同埋操控能力！同場亦會有數以百計嘅小車手參與一年一度嘅平衡車比賽，大家都可以觀賞㗎！
【INFO】
《香港兒童平衡車嘉年華》
日期：2024年6月16日
時間：10:00-18:00
地點：灣仔海濱活動空間
香港6月好去處 | 15. 奶龍主題跑（6月16日）
鍾意奶龍嘅你之前又有冇報名參加奶龍主題跑呢？主題跑將會喺6月16日於灣仔海濱長廊舉行，當中分別設有1公里賽事更首次加入水槍元素，等小朋友都可以跑住玩。仲有2公里以及4公里個人及朋友組報名，照顧唔同能力嘅粉絲。就算唔記得報名都唔緊要，因為當日場地都設有多個打卡位，奶龍更會驚喜現身，仲有唔同嘅市集攤位等，等大家可以盡興咁玩！
【INFO】
《奶龍主題跑》
日期：2024年6月16日
時間：09:00至16:00
地點：灣仔海濱長廊
香港6月好去處 | 16. 高街光影情緣 Love in the Light光影藝術展覽（即日起至2025年5月21日）
每日下午6點到夜晚10點，大家如果有經過西營盤，就可以停步欣賞下「高街光影情緣 Love in the Light」光影藝術展覽。展覽以時光隧道為創作概念，結合藝術、建築和科技元素，由本地著名建築師蕭國健設計，運用光影以及音樂，將拱形遊廊轉化成一個關於愛情嘅光影藝術展覽，等大家一齊踏上呢個浪漫之旅！
【INFO】
《高街光影情緣 Love in the Light光影藝術展覽》
日期：即日起至2025年5月21日
時間：18:00至22:00
內容：每10分鐘一節，每場燈光表演約5分鐘
地點：西營盤社區綜合大樓地下 (西營盤高街2號)
香港6月好去處 | 17. 沙田新城市廣場「Sweet Together」（即日至6月30日）
就算入唔到迪士尼探Duffy and Friends，都可以帶埋自己收藏嘅公仔，過嚟沙田新城市廣場同咁多位好友打卡！Duffy、ShellieMay、Gelatoni、StellaLou、CookieAnn、‘Olu Mel以及LinaBell都已經換上春日新裝迎接大家，喺過千尺嘅森林入面，大家都可以行入4米高嘅「甜蜜糖果屋」，尋找多個得意嘅打卡位，Duffy與好友將會喺度野餐、寫生以及進行歌舞表演！同場更設有春日期間限定店，等大家都可以買走一系列迪士尼精品！
【INFO】 《沙田新城市廣場「Sweet Together」》 日期：即日起至2024年6月30日 時間：上午10:00至下午22:00 地點：新城市廣場1期3樓中庭、新城市廣場1期1樓、新城市廣場3期3樓及HomeSquare指定樓層
香港6月好去處 | 18. 灣仔A-Maze-ing Harbourfront 迷趣海濱 （即日起至7月3日）
如果想有地方畀小朋友放電，就相當推薦各位爸爸媽媽灣仔嚟灣仔海濱活動空間參加「迷趣海濱」，有5個精心設計嘅主題迷宮，集創意、玩樂、打卡和冒險元素於一身，活動仲要係免費入場！
【INFO】
《灣仔迷趣海濱》
日期：即日起至2024年7月3日
時間：下午14:00至晚上21:00
地點：香港灣仔鴻興道3號灣仔海濱活動空間
香港6月好去處 | 19. NAKED FLOWERS 花舞光影展香港站 （即日起至10月27日）
舉辦過超人氣京都二条城夜櫻光雕秀，日本著名光影創意公司Naked Inc，將會喺香港打造出「Naked Flowers 花舞光影展」。當中共設立8大展區，將會為大家帶嚟沉浸式五感之旅，展出巨型投影書本「花の書 Naked Big Book」、「芬芳花園 Big Flower Garden」、「花の微觀世界 Microscopy of Flowers」無限鏡房等等，超適合大家打卡！
【INFO】
《Naked Flowers 花舞光影展》
日期：即日起至2024年10月27日
時間：上午11:00至晚上10:00（最後入場時間晚上21:00）
地址：尖沙咀廣東道 2A 號「1881」G17B 號舖及地庫
香港6月好去處 | 20. 「站見」鐵路展（即日起至年底）
各位鐵路迷一定要到訪「站見」鐵路展，喺紅磡站將會展出多款退役列車同機車，帶大家穿越香港鐵路嘅昔日時光。除咗可以近距離同具代表性嘅列車近距離接觸之外，更有多項互動元素，例如收聽港鐵公司喺全球各地營運嘅車站廣播，又可以虛擬各個年代職員換上制服影相。展覽將會由即日嘅逢星期六、日及公眾假期免費參觀，記得要提早預約！
【INFO】 「站見」鐵路展 日期：即日起至年底（逢星期六、日及公眾假期） 地點：紅磡站「城際直通車」位置 預約網站：https://bit.ly/3UnATti
香港6月好去處 | 21. 廟街夜市（即日起至12月）
廟街夜市自去年開業之後，吸引不少遊客到訪，而香港旅遊發展局更宣布廟街夜市將會延長至今年12月。現場有各種港式小食如煎釀三寶及燒賣等，同時亦有懷舊小食如叮叮糖及龍鬚糖等，仲有近乎失傳嘅飛機欖，大家不妨過嚟感受熱鬧嘅氣氛！
【INFO】 《廟街夜市》 日期：即日起至2024年12月 時間：下午14:00至晚上23:00 地址：廟街
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
