咪以為喺香港Staycation就一定要洗好多錢先有大海景同舒服嘅房，其實香港仲有好多價錢比較相宜又新式啲嘅酒店值得好入住㗎！小編作為一個喜歡Staycation嘅人，我決定分享幾間值得入住嘅酒店畀大家，想知邊間又靚又Cozy？仲諗緊 情人節Staycation 去邊好？記得去睇埋內文啦！
圖片來源：酒店官網｜撰文：Debbie
香港新派酒店推薦（1）：Page148 Hotel
呢間位於佐敦嘅新式酒店，2019開張嘅Page148由商廈改建而成。當中酒店名亦非常有趣，主理人將人生定義為一本書而酒店就係書入面嘅其中一頁～目Page Hotel係全球一共有兩間分店分別喺香港同英國嘅Page8。
酒店外形一睇就知唔係傳統樣式而係時下後生仔喜愛嘅工業風，一入門口係一間叫PageCommon嘅Cafe，聽講佢哋嘅Tiramisu出名好食㗎！
房入面嘅景觀開掦，高樓層仲有佐敦在我腳下嘅感覺添！呢度嘅電視都可以睇到Netflix，而Speaker亦都選用咗Marshall廠牌，相當有生活品味。
呢到定期都會有做一啲嘅Promotion，好似自製雞尾酒、延遲退房、送早餐等等。價錢相宜由$500至1000不等，而且交通方便，附近亦多餐廳可以選擇，鍾意簡單嘅朋友可以去試吓㗎！
《Page 148 Hotel》
地址：尖沙咀柯士甸 148 號
房間價錢：大約$500至$1000
推薦指數：★★★★ （5星為最高）
香港新派酒店推薦（2）: The Fleming
喺灣仔菲林明道嘅芬明酒店喺2017年完成翻新，酒店以極具香港特色嘅渡海小輪為靈感，用新式嘅觸覺打造復古懷舊嘅味道。
酒店Reception就感覺出呢到嘅裝潢絕對唔係講笑，用嘅每一件傢私同擺設什至設計都營造到舊時光嘅氣氛仲令到小編諗起《徳魯納酒店》嘅埸景添！ 
入到房，配色亦有響應到渡海小輪嘅墨綠色船身同圓鏡。連洗手盤都係用上金屬元素嘅材質，成間房都好打卡，相信配上旗袍裝扮一定會影到舊香港嘅感覺添！
同樣地酒店喺Klook/KKday同官網都設有唔同嘅Staycation Package，有慶生亦有包餐廳消費卷及延長退房等。不過價錢就會貴啲，界乎$1088-2000不等，不時淨係打卡都打成日總算值回票價啦！
《The Fleming 芬名酒店》
地址：香港灣仔菲林明道41號
房間價錢：大約$1088至$2000
推薦指數：★★★★★ （5星為最高）
香港新派酒店推薦（3）: The Figo 翡格酒店
而The Figo嘅前身為Hotel LBP，經過翻新之後2020年就重新開業喇。酒店以玉蘭花為主題，而酒店嘅主色調都係以暖色橙白為主，睇起上嚟就已經Feel到有種好溫馨同Cozy嘅感覺喇！
呢到其中一個賣點係Pet-Friendly嘅酒店，仲推出咗毛孩專屬嘅Staycation套票，等主人同狗狗可以共享下午茶輕鬆愉快咁入住。房型方面亦非常多元化，有開放式嘅Studio亦都有Suite，利用暖色同木制家具營造屋企氣氛，令人有種一入房就想攤喺張床度瞓嘅感覺呀！
《The Figo 翡格酒店》
地址：上環皇后大道西77-91號荷李活中心
房間價錢：大約$462至$1000
推薦指數：★★★ （5星為最高）
香港新派酒店推薦（4）: Tuve Hotel
講到文青又神秘之選就一定非Tuve莫屬啦，2015年開業嘅Tuve一向受年青一輩歡迎，過於低調嘅門面令人好奇入面到底係點，私隱度相對較高。大堂走簡約工業風，用上水泥、鐵及黃銅等材質設計。燈光偏暗加上黑沉嘅氣氛，同出面好似兩個世界咁！
房間方面大致上都係偏向簡約略略帶有工業風Style，因為水泥牆會令室溫偏低所以酒店都好貼心咁設有直立式嘅暖風機畀客人使用。值得一提嘅係，呢度無論係咖啡茶包、零食什至沖涼用品都唔係一般嘅大眾品牌，而係有精心挑選過嘅小眾精品品牌，想入住嘅欲望亦都大大提升咗！
其次嘅賣點就係浴室啦！以雲石為主調嘅浴室相對上較房間明亮，淋浴空間亦都大過好多唔同嘅精品酒店，當中盥洗用品係選用咗手工香水品牌Le Labo，香味用上中性嘅木調壇香，男女都啱用～
酒店亦會提供免費早餐，客人可以選擇外賣返房食或者落Superhooman餐廳用膳，餐廳嘢食嘅質素亦都相對高質㗎！
《The Tuve Hotel》
地址：銅鑼灣清風街16號
房間價錢：大約$496至 $1000
推薦指數：★★★★ （5星為最高）
香港新派酒店推薦（5）: The Arca Hotel
最後要介紹嘅呢一間係2021開業，位於香港仔黃竹坑The Arca雅格酒店，以酒店價錢嚟講性價比高！既有大海景嘅房型又有無邊際頂樓泳池，絕對可以稱得上打卡專用酒店。同The Figo一樣都係Yulan Group其下嘅新酒店之一，兩者比較唔同嘅係Arca行小清新但相似嘅地方係同樣Pet-Friendly㗎！
酒店房型有好多款，平均最細一間都有330尺，而最大嘅海景豪華套房連海放式廚房就有780尺，真係幾吸引㗎！
酒店入面亦都有餐廳Arca Society同池畔酒吧Arca Sky，前者提供中西美食。客人亦都可以選擇去餐廳嘅户外空間用餐。後者亦可以嘆住cocktail望住迷人嘅海景，Chill住過返晚㗎！
《The Arca Hotel》
地址：黃竹坑香葉道43號
房間價錢：大約$496至 $1600
推薦指數：★★★★★（5星為最高）
相關文章：文華東方限時住宿優惠！ 包早晚餐/馳名鬆餅/24小時住宿體驗
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
