放假留喺香港咁悶，當然要揾啲活動玩吓，最近屯馬線開通咗，以後大家想去港九各區就方便得多。今日小編要同大家介紹吓屯馬線一帶究竟有咩好玩，快啲Bookmark約埋朋友同屋企人去喇！
圖片來源：Holimood ｜撰文：Sharon
1. 馬鞍山獨木舟x直立板 （按此報名）
喺烏溪沙站出口行約十分鐘就有水上活動玩，除咗有單人獨木舟同雙人獨木舟，仲有直立板租借體驗課程，唔想淨係游水、玩水咁單調可以考慮吓呢個水上活動！
教練會教導基本獨木舟划行技巧同基本覆舟後處理，仲有基本安全知識同獨木舟知識，就算唔識游水都可以挑戰一吓！而且仲有雙人獨木舟，同朋友或者另一半一齊玩就啱晒！
如果自問平衡力好好，一定要試吓直立板租借體驗！教練會教授基本安全知識同直立版基本技巧，亦有小班教學制，包你玩完一定會愛上呢項運動！
2. 小蜜蜂農莊印第安營（按此報名）
放假唔想玩咁激烈嘅水上活動，想靜靜地感受大自然，一定唔可以錯過呢個體驗，適合一家大細、朋友或者情侶體驗。小蜜蜂農莊有飼養多種可愛小動物，例如雞仔、牛同羊，家長可以帶小朋友體驗下餵飼小動物。另外，營地仲有其他唔同嘅體驗活動，例如每月限定嘅特色烹飪工作坊、採摘有機蔬菜等。每日早上11點更會有蜜蜂小教室，大人小朋友有機會可以嘗試採摘新鮮蜂蜜添！
除咗以上嘅體驗活動,仲有為小朋友而設嘅遊樂設施，包括巨型跳彈床、單車、多功能組合滑梯，沙池等。
呢個營地最大特色一定係呢個印第安營，最多可容納4人，房間有2張雙人床。可以直接感受大自然，瞓醒一覺就見到一大片草地，真係勁治癒啊！營內亦付會提供早、午、晚三餐，夜晚仲可以訂購燒烤套餐添！喺呢度大家可以遠離煩囂，親親大自然都係一個唔錯嘅選擇。
3. 白泥部落部落營（按此報名）
想試吓露營一定唔可以錯過呢個體驗，位於錦田嘅全新豪華露營營區，營地有3種帳營可以選擇，包括部落營，帆船營同星空營。每個特色營地有冷暖氣、風扇、風筒、電陶爐、電熱水煲提供，好似入住酒店一樣咁舒適！仲有獨立洗手間，並設有熱水爐，簡直係豪華露營嘅首選！
部落營以民族風格為主題，亦有巨型彈床、充氣嬉水池等免費設施可以玩，唔想成日Staycation就可以去呢個豪華部落營喇！
4. 綠活城鄉 Green Lohas（按此報名）
位於元朗錦上路港鐵站旁，可以欣賞日落同大帽山嘅風景，除咗淋浴設備，亦可以燒烤爐租借，體驗真正露營嘅感覺！
5. 小童獨特體驗營(限定6月至8月)（按此報名）
為滿6歲以上小朋友而設嘅體驗營，有三個唔同主題嘅體驗營畀小朋友選擇參加，當中包括2日1夜觀星營、4日3夜玩盡大自然、夏日飛索日營。可以了解星球同宇宙嘅概念、學習使用天文望遠鏡，探討天上星星嘅故事！想有更多嘢玩，可以參加夏日飛索日營，挑戰超刺激嘅高空挑戰，同自製焗pizza、嘗試整紮染小毛巾！
————————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
