石圍角邨麥當勞｜講起麥當勞，又點少得 麥當勞叔叔 。早前荃灣石圍角邨商場翻新，令大眾市民恐怕香港最後一個麥當勞叔叔會從此消失。依家唔使驚啦！因為石圍角邨商場嘅麥當勞已經完成裝修重開啦！麥當勞叔叔亦都一齊回歸，想知詳情就要睇埋落去啦～
圖片授權：FB@空城記 Empty City｜撰文：Athena
石圍角邨麥當勞翻新後，變身懷舊復古風。店舖內保留舊有嘅啡色木地板，另外亦仿製90年代老麥有嘅蘋果批樹及漢堡包椅子。牆上嘅壁畫則仿照舊葵盛東麥當勞嘅壁畫而二次創作，畫中有多個麥當勞人氣角色，包括滑嘟嘟、漢堡神偷同埋小飛飛，而麥當勞叔叔嘅樣就有明顯嘅唔同啦～
除咗麥當勞叔叔之外，原來連經典嘅蘋果批樹都只係現存最後一棵於廣福道。但今次翻新之後，店內更新增咗仿製嘅蘋果批樹。仔細一睇，都可以睇得出新嘅蘋果批樹手工冇以前咁好，但都充滿童年回憶同情懷！
原有嘅麥當勞叔叔繼續保留，笑臉相迎同大家揮手同影相，但佢嘅座位就唔同咗。想重拾當年兒時回憶，就趁假期去石圍角邨商場朝聖啦！
交通方面，前往石圍角邨分店麥當勞嘅話，可以乘搭港鐵至大窩口站，出B出口到大窩口轉車站，再乘搭專綫小巴32M號綫，於石圍角邨石菊樓落車，行1分鐘即到達。
【INFO】 麥當勞 石圍角邨分店 地址：荃灣石圍角邨石圍角商場平台324號舖 交通：港鐵大窩口站B出口，轉乘32M號小巴至石圍角邨石菊樓
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
