【 馬鞍山好去處 】近年越嚟越多人鍾意放假去行山，除咗可以親親大自然，更可以遠離市區煩囂放鬆一下！今次小編為大家介紹馬鞍山行山路線——烏洲井頭村，潮退時大家可以透過沙堤登上烏洲，欣賞烏洲一帶嘅絕美風景，十分適合行山新手！呢個夏天，大家都快啲約埋朋友一齊去行山啦！
圖片授權：IG@pinkywu20｜撰文：Sharon
烏洲係位於位於馬鞍山企嶺下海嘅一個連島沙洲，退潮後會出現連島沙堤，大家可以經沙堤登上烏洲，繞島一周欣賞島嶼超靚嘅景色～由北面睇烏洲嘅外形好似一團飯，所以同隔離嘅三杯酒小島被統稱為「三杯酒兩杯茶一舊飯」。
烏洲係非常適合新手嘅行山路線，乘搭交通工具，然後步行約10分鐘前往井頭村，再經井頭村泥灘就可以到達烏洲。潮退時露出水面嘅沙灘，再加上清澈嘅海水，令人有一種置身於菲律賓旅遊勝地「處女島」嘅感覺，大家可以繞島一周，一邊欣賞大自然嘅景色，既放鬆又寫意！
井頭村沙灘沙灘旁邊，仲有一個綠油油嘅草地，大家仲可以嚟打卡添！
每年7月至8月退潮期，沙堤上會發現唔少海星嘅蹤跡，但為咗保護大自然同海洋生物，建議大家盡量唔好拎起海星。另外，溫馨提示大家必須要等待退潮，出現沙堤時先可以步行前往烏洲，並要仔細查清楚當日潮汐漲退時間，避免被困！同時，更建議大家著上合適同保護力強嘅鞋，因為泥灘比較難行，加上有唔少硬物同碎石，一唔小心就好容易會受傷。
交通方面，石以於港鐵大學站乘搭807K小巴，到總站「井頭」落車，經井頭村泥灘前往烏洲。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
