放假唔少人都會飛出香港去日本、韓國睇楓葉，但係周圍都咁多人，仲點樣可以靜靜地影相，好好感受自然風景？其實想睇櫻花、紅葉，都唔一定要去外國，香港四季分明，唔同嘅月份一樣有唔同花卉可以觀賞，想知道多啲，咁就要睇以下嘅香港花期資訊啦！
圖片來源：Facebook@信芯園農莊、香港濕地公園網頁、康文賞花情報網頁、Instagram@Gna_photographylife、Instagram@shunsumyuen、Facebook@香港國際機場、Facebook@中大傳動、嘉道理農場網頁、香港房屋委員會網頁、香港黃金海岸酒店網頁、康樂及文化事務署網頁、Getty image、政府青少年網站、香港旅遊發展局、Wandering Photography、flickr@Jason Luk｜撰文：Connie
香港賞花 時間表 – 梅花
花期：1月到2月
賞花地點： 大埔太和農墟 、元朗水尾村清樂鄧公祠、蓬萊閬苑
梅花有「優雅」、「清高」、「忍耐」、「忠實」等等嘅花語，而且梅花有一個民間傳說，指梅花嘅第一瓣象徵著和平，第二瓣象徵快樂，第三瓣象徵順利，第四瓣象徵長壽，第五瓣象徵幸運。
梅花常見喺東亞地區，同其他花唔同，梅花通常喺晚冬到早春期間綻放，香港大部份嘅梅花種類都係白色，所以喺城市入邊見到一大片白色梅花好似雪一樣，喺梅花綻開嘅季節，經常會吸引大批市民圍觀打卡㗎！
INFO 大埔太和農墟 地址：太和邨大埔太和路12號 營業時間：星期日 09：00 - 17：00 電話： 2471 1169 前往方式 ：到達大埔太和站後往太和商場一期愛和樓方向，汀角路變電站旁。 INFO 蓬萊閬苑 地址：大埔半山洲 電話：2648 2004 前往方式 ：到達大埔墟火車站後往運頭塘邨德雅苑接達連道方向，步行十五分鐘，見到半山洲山頂花園後再行十分鐘。 INFO 元朗水尾村清樂鄧公祠 地址：錦田水尾村50號 前往方式 ：乘搭往北圍村方向的專綫小巴601B線，於錦田鄉村俱樂部下車，沿附近小路東行約4分鐘
備注：鄉郊地區大多為私人土地，不要擅進，亦不要隨便拍攝村屋。
香港賞花 時間表 – 櫻花
花期：2月到4月
賞花地點： 嘉道理農場、中文大學、 東涌觀景山
一講到櫻花，大家可能都會諗到去日本賞櫻，但係賞櫻季節嘅機票酒店都咁貴，加上又唔係個個都可以話飛就飛，其實香港都有唔少賞櫻地點，市區、新界、離島都有櫻花嘅足跡！而且仲有各種唔同品種嘅櫻花，例如中國紅櫻花、吉野櫻、鐘花櫻桃等。
INFO 香港中文大學 地址：新界沙田香港中文大學 前往方式 ：乘搭港鐵至大學站 A 出口，再轉乘中文大學 2 號校巴於新亞書院下車，步行至5分鐘到達知行樓對出草地。 INFO 東涌觀景山 地址：東涌赤鱲角南路觀景山山腳 前往方式 ：到達東涌地鐵站後往昂坪纜車站方向行，經過東路花園直行到尾轉右上天橋到對面東涌海濱路，落天橋後左轉直行至迴旋處，再轉右上赤鱲角南路，直行約5分鐘。 INFO 嘉道理農場 地址：香港新界大埔林錦公路 入場費：成人 $30、小童 $15、5歲以下小童/60歲或以上長者及合資格殘疾人士免費 前往方式 ：到達港鐵大埔墟站或太和站後轉乘64K巴士，往元朗西方向，於嘉道理農場門前巴士站下車。
香港賞花時間表 – 杜鵑
花期：3月到4月
賞花地點： 長沙灣元州邨 、屯門黃金海岸
香港嘅杜鵑品種係簕杜鵑，一般花期係3月至4月，花期亦較其他春季花卉長。簕杜鵑嘅花喺啱啱變暖嘅春天先會開得特別燦爛，盛開嘅時候相當澎湃，一連串嘅紅色花朵好似一幅牆，絕對係春天打卡嘅好風景！
INFO 長沙灣元州邨 地址：九龍深水埗區長沙灣元州街303號 前往方式 ：長沙灣港鐵站 C 出口 ，元盛樓旁邊。 INFO 香港黃金海岸酒店 地址：掃管笏青山公路-青山灣段1號Castle Peak 電話： 2452 8888 前往方式：屯門港鐵站C2出口換乘港鐵接駁巴士K51、K51A；青衣港鐵站乘坐140M專線小巴，於香港黃金海岸站下車
香港賞花 時間表 – 魚木花
花期：3月到5月
賞花地點：太子西及界限街、大角咀行人天橋
魚木花原名樹頭菜，但英文名竟然叫「Spider Tree」？原來係因為魚木花雄蕊偏多，呈紫紅色而且細長纖幼，伸出花冠外面就好似樹上面嘅蜘蛛一樣。魚木花花瓣白色或奶黃色，每到春天開花期，盛開嘅魚木花隨風飄落，太子道西或者大角咀一帶就會出現「花吹雪」嘅夢幻美景！
INFO 太子道西及界限街一帶 前往方式：旺角東站D出口，步行約10分鐘。 INFO 大角咀行人天橋 前往方式：旺角站C4出口，步行約10分鐘；奧運站C5出口，步行約10分鐘
香港賞花時間表 – 荷花
花期：5月到7月
賞花地點：香港濕地公園、粉嶺康樂公園、 南蓮園池
荷花又稱蓮花，屬蓮科的水生草本植物。原產自亞洲熱帶地區。荷花清麗脫俗，出淤泥而不染，所以有花中「 君子」嘅美譽。古代有唔少詩人都好鍾意以荷花為題材，創作唔同嘅詩詞歌賦。加上荷花無論喺晴天定係雨天都有唔同嘅姿態，拍攝出嚟嘅作品都有唔同嘅韻味！
INFO 香港濕地公園 地址：天水圍濕地公園路 營業時間：星期一、三至日 09：00 - 16：00 ，逢星期二休息 電話：3152 2666 前往方式 ：乘搭屯馬線於天水圍站轉乘輕鐵705路線，於濕地公園站下車。 INFO 粉嶺康樂公園 地址：上水清曉路龍祥圍邨 前往方式 ：乘搭港鐵到達粉嶺站A2出口，沿粉嶺車站路往祥華邨方向步行約10分鐘。 INFO 南蓮園池 地址：鑽石山志蓮路5號 營業時間：星期一至日 09：00 - 16：00 電話：2354 1888 前往方式 ：乘搭港鐵到達鑽石山港鐵站C2出口前往，步行約5分鐘即到達
香港賞花時間表 – 鳳凰木
花期：5月到6月
賞花地點：大埔林村河 ，維多利亞公園 ，寶琳景林邨公園
鳳凰木因為鮮紅同橙色嘅花朵配合鮮綠色嘅羽狀複葉，被譽為世上最色彩鮮艷嘅樹木之一。雖然鳳凰木唔係香港本土嘅植物，但香港同鳳凰木都有著密不可分嘅關係，例如張愛玲嘅小說傾城之戀，主角就係情定喺淺水灣鳳凰木之下；著名作家及民國四大才女蕭紅，於1942年嘅時候客死香港，最後安葬於淺水灣麗都酒店嘅鳳凰木下，令人不禁諗到鳳凰木嘅花語係「離別」，因為鳳凰木盛開喺五、六、七月，正好係畢業嘅季節，因此鳳凰花代表畢業，也成了離別同依依不捨嘅象徵。
INFO 大埔林村河 地址：大埔林村河 前往方式 ：乘搭港鐵到達港鐵太和站A出口出，沿寶雅路行至林村河河畔。 INFO 維多利亞公園 地址：香港香港島灣仔區銅鑼灣興發街1號 前往方式：乘搭港鐵到銅鑼灣站D2出口，左轉直行經記利佐治街步行往維園 INFO 景林邨公園 地址：香港香港島灣仔區銅鑼灣興發街1號 前往方式：乘搭港鐵到達寶琳站B3出口
香港賞花時間表 – 向日葵
花期：6月到10月
賞花地點：元朗信芯園農莊
向日葵又稱為太陽花，花期為6月至10月，花如其名，就如同太陽一樣嘅花，總會帶比人充滿元氣、活潑明亮嘅力量。而且向日葵有「我的眼中只有你」、「仰慕」嘅花語，係唔少人表白同埋求婚都會用嘅花卉！講到香港最出名觀賞向日葵嘅地方，就一定係位於元朗嘅信芯園農莊，而且園主信哥每年都會栽種唔同品種嘅太陽花，所以一到夏天就會吸引大量遊客同市民打卡！
INFO 元朗信芯園農莊 地址：新田信芯園 前往方式 ：乘搭港鐵到達元朗西鐵站，轉乘76K 巴士，於石湖圍巴士站下車，步行到小磡村入囗沿大水坑前行，大約十分鐘到達。
香港賞花 時間表 – 芒草
花期：10月尾到11月初
賞花地點：大東山 ，大帽山 ，粉嶺坪洋芒草坪園
芒草又稱尾花，原意係因為芒花嘅花穗開出嘅時候好似狐狸嘅尾巴，所以叫它「尾花」。而芒草嘅花語係「勢力」，因為芒草旺盛嘅生命力喺荒野中都可以好似攻城掠地一樣，到處盛開！每年10月尾到11月初係香港芒草季節，喺一大片金黃芒草草園隨風飄揚，加上秋日嘅藍天，絕對係求其影一張相都可以做wallpaper嘅質素！不過香港嘅芒草聚集喺高山上面，大家想去影相嘅同時都可以當係行下山，運動一下！
INFO 粉嶺坪洋 芒草坪園 地址：坪洲坪洋村坪原路157號華逹園 前往方式：乘搭港鐵到達粉嶺火車站後乘搭專線小巴 52K ，於九記士多下車，沿路行至卓榮記士多左轉。 INFO 大東山 前往方式：東涌地鐵站B出口 ，轉乘3M號大嶼山巴士往梅窩，於伯公坳站下車。 伯公坳沿鳳凰徑上山（⭐｜2.2公里至爛頭營，攀升約480米）、 南山沿鳳凰徑上山（⭐⭐⭐｜3.8公里至爛頭營，攀升約710米）、 東涌馬灣新村沿黃龍坑郊遊徑上山（⭐⭐⭐⭐｜4.1公里至爛頭營，攀升約780米）、 白芒經婆髻山、鴨腳瀝、三山台及蓮花山上山（⭐⭐⭐⭐⭐｜6.4公里至爛頭營，攀升約890米） INFO 大帽山 前往方式：乘搭港鐵到達荃灣港鐵站 A 出口，轉乘九巴 51號巴士，於「郊野公園」下車。
香港賞花時間表 – 紅葉
花期：12月到1月
賞花地點：元朗大棠 ，青衣公園 ，大埔烏蛟騰
秋風起，就係賞楓嘅好時機！不過香港嘅紅葉其實並非楓樹（屬槭樹科）嘅楓葉，而係嚟自楓香樹。由於兩者嘅樹葉外形相近，而且都會喺秋天變成紅色，所以香港紅葉常被誤為是來自楓樹。想知咩時候去睇紅葉係最適合？其實漁農自然護理署每年12至1月，逢星期五都會更新紅葉指數！而紅葉指數分為A、B、C、D 四級，分別代表極紅、開始紅、黃、綠。建議大家出發之前，可以先看看漁護署網站評分！
INFO 元朗大棠 前往方式：於朗屏乘坐K66巴士，到大棠山道巴士總站下車 INFO 青衣公園 地址：青衣青敬路60號 前往方式：港鐵東涌線青衣站B或C出口，步行約10分鐘 INFO 大埔烏蛟騰 前往方式：乘搭港鐵到達港鐵大埔墟站，轉乘20R小巴至烏蛟騰。
香港賞花 時間表 – 洋紫荊
花期：11月初到翌年3月
賞花地點：天水圍公園，香港動植物公園
洋紫荊係屬於香港本地嘅植物，喺1880年被一個神父喺港島薄扶林首先發現，其後於1965年被市政局選為市花，同時被畫於香港市政局旗上嘅圖案，寓意香港呢個遠東海港，有如香港首棵發現嘅洋紫荊一樣珍貴。1997年回歸後，香港特別行政區繼續採用洋紫荊作為區徽、區旗同硬幣嘅設計樣本。
INFO 香港動植物公園 地址： 香港中環雅賓利道 開放時間：噴水池平台花園 / 05：00 - 22：00 溫室 / 教育及展覽中心 / 09：00 - 16：30 哺乳類動物區 / 06：00 - 19：00 前往方式：金鐘站B出口或中環站D2出口 INFO 天水圍公園 地址： 元朗天水圍天瑞路六號 開放時間：噴水池平台花園 / 05：00 - 22：00 溫室 / 教育及展覽中心 / 09：00 - 16：30 哺乳類動物區 / 06：00 - 19：00 前往方式：天水圍站乘搭輕鐵705，706
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
YouTube – @saucemediahk
