香港櫻花2025 | 立春過後，近日唔少市民於香港各區拍攝到櫻花嘅蹤影。據康文署賞花情報顯示，直至2月13日，恆明街休憩處、安景街公園及大埔海濱公園均開始綻放櫻花。由於香港櫻花花期短暫，開花後只維持約一至兩星期，所以小編整合8大香港賞櫻好去處，等大家做定準備，把握櫻花花期去打卡！
圖片來源：康樂及文化事務署、香港國際機場、嘉道理農場、Instagram @icy.tso、小紅書 @櫻櫻 | 撰文：Icy
香港賞櫻好去處 | 1. 馬鞍山恆明街休憩處
位於馬鞍山嘅恆明街休憩處，種植約10株櫻花樹。雖然櫻花樹長得並不高，但河津櫻花呈淡粉紅色，外表粉嫩精緻，頗適合近距離觀賞，拍攝效果亦不錯！
【INFO】 馬鞍山恆明街休憩處 地址：香港馬鞍山恆明街 前往方法：由屯馬線「恆安站」A出口出發，步行約5分鐘 開放時間：24小時
香港賞櫻好去處 | 2. 沙田石門安景街公園
位於沙田石門嘅安景街公園，園內沿河畔種植約80株櫻花樹，櫻花品種頗多，包括染井吉野櫻、洲府枝垂櫻、福爾摩沙櫻等等，形成淡粉紅櫻花海，別有一番浪漫意境。
【INFO】 沙田石門安景街公園 地址：香港沙田安景街23號 前往方法：由屯馬線「石門站」C出口出發，途徑安群街、安心街及安平街，步行約10分鐘 開放時間：24小時
香港賞櫻好去處 | 3. 大埔海濱公園
大埔海濱公園佔地達22公頃，設有多個主題花園，一向都係賞花勝地。公園內種植約80株櫻花樹，品種繁多，包括富士櫻、墨染櫻、八重櫻、昭和櫻、重瓣山櫻花等等。當中墨染櫻比較罕見，通常出現喺大發街入口旁嘅草地滾球場，顏色呈猶如水墨嘅淡粉紅色，好值得近距離觀賞！
【INFO】 大埔海濱公園 地址：香港大埔大發街 前往方法：由東鐵線「大埔墟站」B出口出發，轉乘71K巴士或步行約30分鐘 開放時間：24小時
香港賞櫻好去處 | 4. 東涌櫻花園
講起香港賞櫻好去處，又點少得東涌櫻花園呢？每年大約3至4月，位於東涌赤鱲角南路嘅觀景山，山腳位置都會盛開達80株櫻花樹。園區特設行人步道，形成一條粉嫩嘅櫻花大道，途中仲可以觀賞昂坪纜車穿梭於花海間嘅景色，充滿浪漫氣氛。
【INFO】 東涌櫻花園 地址：香港赤鱲角赤鱲角南路 前往方法：由東涌線「東涌站」B 出口出發，沿著昂坪360纜車站電梯左邊嘅小路，經行人天橋到東涌海濱路，再往迴旋處方向右轉至赤鱲角南路 開放時間：24小時
香港賞櫻好去處 | 5. 嘉道理農場
嘉道理農場內種有鐘花櫻桃，位置通常位於胡挺生紀念亭附近，樹木高度可達10米，紫紅色嘅花朵呈傘形，非常鮮豔。大家出發前，可先到嘉道理農場官方網站瀏覽開花指數。
【INFO】 嘉道理農場 地址：香港新界大埔林錦公路 前往方法：由東鐵線「太和站」出發，轉乘64K巴士往元朗西方向，車程約25分鐘，於嘉道理農場門前落車 開放時間：星期一至日 09:30-17:00
香港賞櫻好去處 | 6. 將軍澳單車館公園
將軍澳單車館公園佔地約5.3公頃，種植約30株鐘花櫻桃，位置位於人工湖和中央草坪附近，雖然數量不多，但公園環境寧靜優美，喺公園內散散步、踩踩單車、觀賞櫻花，感覺份外舒適。
【INFO】 將軍澳單車館公園 地址：香港將軍澳寶康路105-107號 前往方法：由將軍澳線「坑口站」B2出口出發，經環保大道隧道，步行約10分鐘 開放時間：星期一至日 07:00-23:00
香港賞櫻好去處 | 7. 荃灣城門谷公園
荃灣城門谷公園內種植數株吉野櫻，雖然數量並不多，但樹身比較高，櫻花亦開得頗密集。加上園內亦種有其他種類嘅花草樹木，大家可以一次過欣賞多種植物。
【INFO】 荃灣城門谷公園 地址：香港新界荃灣城門道21號 前往方法：由荃灣線「大窩口站」B出口出發，步行約15分鐘 開放時間：星期一至日 06:30-23:00
香港賞櫻好去處 | 8. 大帽山扶輪公園
天氣暖和，最適合行山，而行山期間亦可以欣賞櫻花！大帽山扶輪公園入口處小食亭附近，種有約30株緋寒櫻，櫻花數量開得好密，顏色奪目，唔使擔心搵唔到櫻花嘅位置。
【INFO】 大帽山扶輪公園 地址：香港大帽山遠足研習徑 前往方法：由屯馬線「荃灣西站」如心廣場出發，轉乘51號巴士，於大帽山郊野公園站落車，反方向步行進入大帽山道及扶輪公園 開放時間：24小時
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
