野餐好去處 ｜放假又正好陽光普照，最啱就係去戶外野餐，感受一下大自然、呼吸新鮮空氣！今次編輯為大家整合全港九新界8個野餐好去處，有堪稱「綠地毯」嘅大草地、打卡勝地、無敵大海景配草地、寵物友善公園等等。快啲睇定鍾意以下邊個地點，準備好野餐墊同美食，放假即刻出發啦！
圖片來源：香港旅遊發展局官方網站、香港特別行政區政府-發展局官方網站、Instagram@tayloorr.s、Trip.com@Korean Dumpling、Trip.com@迪迪妹、Instagram@westkowloonartpark、維基百科@Wing1990hk、Instagram@monmon.310、Instagram@daphniexox｜撰文：Tiffany
野餐好去處 | 港島 – 1. 山頂公園
想喺一個仿似世外桃源嘅地方野餐，山頂公園係一個唔錯嘅選擇。呢個地方充滿英式氣派，有一大片大草坪之外，仲有小山丘、水池、維多利亞式凉亭、古代計時儀器等等，啱晒影相打卡之餘，喺到野餐、歎返個晏晝都好chill㗎。
充滿歐陸風情嘅涼亭，配合鳥語花香嘅環境，絕對係情侶、閨蜜們嘅野餐勝地。加上去山頂公園嘅公共交通工具唔多，所以人流都相對較少，想靜靜地嘆吓就啱晒喇。
【INFO】 地址：香港島山頂柯士甸山道 交通方法： 1. 小巴：中環國際金融中心二期乘搭1號小巴於「山頂廣場」站下車 2. 巴士：中環渡輪碼頭或交易廣場乘搭15號巴士於「山頂」站下車／中環渡輪6號碼頭乘搭X15號巴士於「山頂」站下車
野餐好去處 | 港島 – 2. 添馬公園
添馬公園位於中環/香港港鐵站附近，適合鍾意方便嘅朋友仔。公園內有一片佔地超過1.7公頃嘅綠油油大草地，更有「綠地毯」之稱。而且公園位於金鐘海濱旁，坐喺草地上可以望晒成個維港美景，天氣好的話仲望埋遼闊嘅藍天，真係會令人心情加倍放鬆！
添馬公園可以話係繁忙都市中嘅一片綠洲，除咗假日有唔少人特登嚟野餐之外，喺附近返工嘅上班一族仲可以喺午飯時間過嚟，一邊享受陽光浴，一邊食午餐，叉足電先繼續做嘢。
【INFO】 地址：香港金鐘夏愨道 交通方法：由中環港鐵站A出口／香港港鐵站A2出口步行即至
野餐好去處 | 港島 – 3. 數碼港海濱公園
各位狗爸媽如果想帶埋主子一齊野餐，可以考慮數碼港海濱公園。呢個公園位於港島南區，除咗係個野餐好去處之外，更係一個好出名嘅狗公園。呢到望到海景，亦有一大片草地，仲種咗好多椰樹，舒服得嚟仲可以影相打卡！
喺日落時份嚟野餐都係一個唔錯嘅選擇！攤喺草地上望住夕陽，襯埋海景、歎住海風，真係好放鬆。而且仲可以放狗、放風箏，公園仲設有數碼港互動遊樂場，提供多款運動設施，真係玩足一日都冇問題。
【INFO】 地址：鋼線灣數碼港道100號 交通方法： 1. 小巴：69X號、69A號、69號、58號、10號、10P號於「數碼港」站下車 2. 巴士：73號、30X號、970號、42C號、107P號、33X號、49X號於「數碼港」站下車 3. 由堅尼地城港鐵站轉乘58號小巴於「數碼港」站下車
野餐好去處 | 九龍 – 4. 西九藝術公園
想喺九龍區搵地方邊望海景邊野餐，西九藝術公園就啱晒你。西九藝術公園坐落於維港海旁，沿著海濱長廊吹海風都真係幾爽！而且呢個公園歡迎寵物內進，等大家都可以帶埋主子過嚟放電。
除咗有大草地同無敵大海景之外，海旁仲有幾間文青餐廳，怕麻煩唔想準備食物就最啱啦。而且西九藝術公園不時會有戶外文化活動，小朋友仲可以租借單車，喺公園內馳騁。玩完之後仲可以去埋附近嘅M+博物館，玩足一日！
【INFO】 地址：九龍西九文化區博物館道18號 交通方法：由九龍港鐵站E4出口／E5出口步行即至
野餐好去處 | 九龍 – 5. 佐敦谷公園
佐敦谷公園可以話係市中心內一片綠洲。佢係觀塘區內面積最大嘅公園，佔地6.3公頃。而且位置便利、交通方便，絕對可以為大家嘅忙碌生活帶來一點恬靜。公園有齊動態及靜態嘅康樂設施，一家大細都啱玩，仲有一大片草地畀小朋友無限放電！緩跑徑、大型迷宮花園、溫室、四季花園、兒童遊樂場等設施都可以搵到，甚至有符合國際水平嘅遙控模型賽車場！咁多嘢玩，所以係區內市民嘅假日好去處。
【INFO】 地址：九龍觀塘新清水灣道71號 交通方法：由彩虹港鐵站轉乘54S號小巴／29M號巴士，在「順利紀律部隊宿舍」站下車步行即至
野餐好去處 | 九龍 – 6. 南昌公園
南昌公園佔地大約3.83公頃，而且園內有一片面積高達20,000平方米嘅超級大草地，係香港最大嘅公園草地，點會唔係野餐好去處？而南昌公園更一直係個賞花熱點，當中以黃花風鈴木、洋紫荊、紅花風鈴木最廣為人知，好多人會特登喺花期嘅時候過嚟朝聖、影相。
公園除咗有無敵大草地俾小朋友跑跑跳跳、成人散步跑步之外，仲可以放狗。而且園內仲有兒童遊樂設施、長者健體設施，係真正嘅男女老幼、狗狗都啱玩！而且南昌公園地點非常方便，位於港鐵站旁邊，好容易去到。
【INFO】 地址：九龍深水埗深旺道20號 交通方法：由南昌港鐵站D1出口步行即至
野餐好去處 | 新界 – 7. 彭福公園
想喺新界區搵個寵物友善嘅公園野餐，就可以揀彭福公園。彭福公園位於沙田馬場中央，公園佔地80,000平方米，設有廣闊草地、人工湖噴泉、兒童遊樂場等康樂設施，畀狗狗放電又得、俾小朋友放電亦得，所以每逢假日都會有好多人一家大細、帶埋主子過嚟家庭樂。
彭福公園可以話係鳥語花香，周圍都見到有不同雀鳥覓食，據說有超過67種野鳥喺到棲息，啱晒鍾意親親大自然嘅大家。更特別嘅係，彭福公園原來曾經係2008年北京奧運馬術比賽嘅比賽場地，所以依家仲可以喺園內搵到奧運展品嘅足跡！例如人工湖上嘅奧運五環、正門嘅奧運火炬、奧運聖火火盆、附有多名國家奧運金牌選手簽名嘅馬匹模型等等。
【INFO】 地址：新界沙田沙田馬場 交通方法：由火炭港鐵站C出口步行即至
野餐好去處 | 新界 – 8. 迪欣湖
迪欣湖係全港最大嘅人工湖，位於香港迪士尼樂園旁邊，係一個熱門野餐地方。坐喺湖邊草地上一邊欣賞大自然景色、細細流動嘅湖水，一邊同另一半或者朋友促膝長談，非常寫意。而且湖邊景色優美，影相打卡就最啱！
你仲可以享受迪欣湖嘅各項活動及配套，例如小船及單車租借服務、動感噴泉、植物園、兒童遊樂場等。喺充滿歐陸風情嘅小涼亭入面，感受企喺湖中心嘅恬靜，欣賞怡人嘅山景，真係好relax！
【INFO】 地址：香港新界大嶼山竹篙灣迪欣湖活動中心 交通方法：由香港迪士尼樂園度假區交通交匯處轉乘R8循環線／由迪士尼港鐵站步行即至
