賀歲片2024 | 新年除咗要去同親戚朋友拜年之外，點少得去戲院睇賀歲片呢，一家大細都可以一齊睇電影！小編幫大家精選咗5套今個新年必睇嘅賀歲片，當中男團MIRROR成員有份出演？3位影帝同型男組成最強陣容？
圖片來源：Facebook@盜月者 The Moon Thieves、飯戲攻心2 Table for Six 2 電影、電影臨時劫案、Universal Pictures、Sony Pictures | 撰文：Hedy
2024賀歲片1.《盜月者》
《盜月者》由男團MIRROR盧瀚霆（Anson Lo）、呂爵安（Edan）、張繼聰以及白只主演。喺電影入面，Anson Lo將會飾演開鎖天才「阿佑」，而Edan飾演嘅「馬生」係專門將手錶零件重嵌轉售嘅手錶專家。姜濤更加喺電影中作特別演出，為首次挑戰反派角色，相信一眾粉絲睇完之後都會好驚喜！
劇情簡介：
由Edan飾演嘅角色「馬生」，本來係一個「對期錶」專家，專以低價收購典當手錶，並挪用其零件，改裝重嵌轉售。不過由於一次嘅貪心，就被姜濤飾演嘅萊叔抓住痛腳，被迫前往日本，一齊偷走三隻畢卡索名錶。同行嘅團隊亦包括張繼聰飾演嘅大賊以及白只飾演嘅渠王。但過程中4人竟然不經意發現一隻更珍貴嘅絕代名錶，究竟4人要如何擺脫追殺呢？
【INFO】 《盜月者》 上映日期：2月9日 電影場次：請按此
2024賀歲片2. 《飯戲攻心2》
由黃子華、鄧麗欣及林明禎等主演嘅電影《飯戲攻心》，喺2022年上映嘅時候，票房成績相當好。其續集《飯戲攻心2》亦將會喺2月9日公映，雖然今次黃子華冇參與電影演出，但鄧麗欣、張繼聰、王菀之、陳湛文及林明禎則會再度回歸，同時亦有新演員如Jeffrey魏浚笙、胡楓、羅蘭及米雪等加入。
劇情簡介：
續集電影講述趁著大佬「行出去，去遠啲」嘅時候，二佬同三佬竟然擇定吉日，連搞三場世紀婚宴，點知婚宴竟然發展成為叔伯兄弟嘅鬥獸場、姨媽姑姐嘅追星大會、勾義嫂風雲以及超級揾錢大計…… 相信場面必定夠晒爆笑！
【INFO】
《飯戲攻心2》
上映日期：2月9日
電影場次：請按此
2024賀歲片3.《臨時劫案》
《臨時劫案》集結影帝同型男組成最強陣容，當中包括郭富城、林家棟及任賢齊首度攜手合作。電影由金像導演爾冬陞監製，麥啟光執導。同時亦有鮑起靜、盧海鵬、姜大衛及林雪等人加入陣容。為咗電影，拍攝團隊更向政府申請封閉廟街7天，進行實景拍攝槍戰，相信大家都會好期待！除咗香港上映電影之外，全球12個地區同步賀歲，包括澳門、台灣、星加坡、馬來西亞、泰國、澳洲、紐西蘭等地！
劇情簡介：
電影講述由郭富城飾演嘅生活拮据摔角手梅藍天，計畫越洋到香港策動一宗閃電械劫，鍾意講英文之餘，加上一口暴牙嘅造型，必定能帶畀大家爆笑效果！林家棟飾演嘅的士司機以及任賢齊飾演嘅老人院社工，竟然搗亂呢場劫案，令到贓款不翼而飛！為咗搶奪贓款又要避開警察嘅追捕，兩方展開駁火！
【INFO】
《臨時劫案》
上映日期：2月9日
電影場次：請按此
2024賀歲片4. 鴨仔也移民
近年大家都會不斷聽到移民呢個詞語，喺動物界中亦都有一班鴨仔有移民嘅諗法？環球影業發行、Illumination 繼《超級瑪利歐兄弟大電影》、《壞蛋獎門人》、《星夢動物園》、《Pet Pet當家》四大皇牌系列後，更炮製2024賀歲動畫片，等大家跟鴨仔體驗冒險之旅！爛蕃茄影評網站更獲87%超高觀眾評分！
劇情簡介：
鴨爸爸滿足於同家人安穩咁留喺新英格蘭嘅池塘裡，直到永遠。但由於鴨家一直過住單調刻板嘅生活，鴨媽媽就希望改變現況，希望可以帶住小朋友一齊見識廣闊嘅世界！突然有一日佢哋遇到另一個屋企家遷徙鴨，更分享到世界各地嘅驚險故事。鴨媽媽藉機會說服爸爸起行，並希望前往熱帶牙買加。啱啱起步嘅鴨家族喺過程中遇到多番碰釘，究竟最後可唔可以一家人齊齊整整前往目的地？
【INFO】 《鴨仔也移民》 上映日期：2月8日 電影場次：請按此
2024賀歲片5. 蜘蛛夫人
由Sony Pictures呈獻，改編至Marvel漫畫嘅《蜘蛛夫人》（Madame Web），係「蜘蛛俠電影宇宙」首部女性超級英雄電影，由《格雷的五十道色戒》嘅Dakota Johnson同埋《毒癮女孩》嘅Sydney Sweeney兩代性感女神，再加上4位蜘蛛女嘅合作！
劇情簡介
Dakota Johnson飾演擁有心理感知超能力嘅Cassandra。佢喺某次救護行動中發生意外，其後更得到預視能力，可以睇到即將發生嘅致命危機！呢一個預視能力更將佢同3個陌生女仔命運交織起嚟，更要喺有限嘅時間對抗強敵！
【INFO】 《蜘蛛夫人》 上映日期：2月14日 電影場次：請按此
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
