萬聖節2023 | 話咁快就踏入10月，又就快到萬聖節，相信好多人都計劃扮鬼扮馬，同一大班朋友出去狂歡。小編就集合咗香港7大萬聖節大型活動，除咗有經典嘅海洋公園哈囉喂同迪士尼萬聖節惡人派對，仲有其他鬼屋體驗同適合小朋友玩嘅狂歡派對，想知萬聖節有咩玩，就即睇以下詳情喇！
圖片來源：海洋公園、香港迪士尼、Y.X Community、港鬼故、港式情侶、香港樂高探索中心｜撰文：Icy
萬聖節好去處 1 – 海洋公園哈囉喂
每逢萬聖節，最經典嘅大型活動當然唔少得海洋公園哈囉喂。今次活動主打6大主題鬼屋，包括怨靈鬼校、怨靈異域、異度空間、荒廢實驗室、妖怪の森及咒偶片場。係首站鬼校園內，大家將要伴隨住陰森嘅校歌，走進荒廢多年嘅校舍探險，仲會隨時遇到恐怖凶靈追魂索命，驚險程度爆燈。而經過詭異奇幻地帶時，大家將要徘徊於視覺錯亂嘅謎之迴廊、迷幻鏡像空間、巨型旋轉木馬等等，搵辦法逃出生天。
而妖怪の森以日式村莊為設計主題，係神秘嘅神社同鳥居中佈滿百鬼妖怪，仲會係迷宮深處遇到近5米高嘅巨型骸骨。除咗經典鬼屋外，園內四周都充滿節日氣氛，大家可以欣賞「嘩鬼大匯演」，一班妖魔鬼怪會毫無預警下突襲你，同你一齊舞動萬聖節！
【INFO】 海洋公園哈囉喂 地址：香港香港島黃竹坑黃竹坑道180號 時間：日間體驗9月15日至10月31日，日連夜驚嚇體驗10月13至15日、20至23日、27至29日及31日 報名方法：按此了解更多
萬聖節好去處 2 – 海洋公園水上哈囉喂
即日起至10月31日，海洋公園水上樂園亦將會舉行鬼馬水上南瓜祭，將室外嘅「湧浪灣」變成「吹氣南瓜波波池」打卡聖地。園內每個角落都會增添恐怖元素，大家入場後可以係「珊瑚大堂」大玩多個嘩鬼攤位遊戲，而「漂流探秘」嘅水面亦會散布南瓜，陪伴你飄住探秘。沿住「恐怖音樂漩渦」螺旋形通道前行，就會聽到一陣陣詭異音樂，包你毛管戙！
逢星期五下午5點，「天海灣」仲會舉行「哈囉喂水上電影節」，小朋友玩到攰，就可以坐定定體驗沉浸式水上電影！而每逢星期六，「天海灣」或「湧浪灣」都會有專業舞者進行歌舞表演，帶大家投入高漲嘅派對氣氛。肚餓嘅話，就不妨試試「百味洞」推出嘅各款哈囉喂主題特色美食，又可以醫肚又打卡able！
而家水上樂園仲推出兩週年優惠套票，由即日起至10月31日以低至半價投入嘩鬼玩水派對。周末及公眾假期只需$428，平日只需$328，仲附送價值$120嘅免費儲物櫃服務或餐飲券。如果想晏少少去睇埋日落，就可以買快閃日落優惠門票，成人於3時半後入場只需$160，而學生及小童只需$112！
【INFO】 海洋公園水上哈囉喂 地址：香港香港仔海洋徑33號 時間：即日起至10月31日 10:00-19:00 門票優惠：按此了解更多
萬聖節好去處 3 – 迪士尼萬聖節
由9月16日至10月31日，迪士尼推出「Disney Halloween Time」萬聖節主題活動，一眾令人又愛又恨嘅大壞蛋角色強勢回歸！當中來自《101忠狗》嘅時尚惡女庫伊拉，將會佔領展藝館，大開「惡人大宅舞會」時尚派對，聯同烏蘇拉、邪惡皇后、紅心皇后、凱帝斯與黑魔后，帶來多感官嘅沉浸式時裝藝術體驗。
另外大家一定唔可以錯過重頭戲「惡人舞動迪士尼」歌舞匯演！表演以5大惡人為主題，例如有《小魚仙》烏蘇拉、《公主與青蛙》巫師霍博士、《睡公主》黑魔后等等，呈現多首經典歌舞劇，配合魔幻嘅燈光同投影效果，震懾成個舞台！
而米奇與好友將會係巨型南瓜造型花車上，聯同Duffy與好友，以及其他迪士尼角色一齊出巡，同大家近距離見面，跟住音樂節拍載歌載舞。經過南瓜頭流動趣玩站，迪士尼朋友仲會同大家大玩Trick-or-Treat派糖果，所以入園記得帶埋你嘅糖果袋喇！
【INFO】 Disney Halloween Time 地址：香港迪士尼樂園 時間：9月16日至10月31日 10:00-21:00 報名方法：按此了解更多
萬聖節好去處 4 – 首個大專生限定鬼咁「螢」化妝派對
各位大專生想認識新朋友嘅話，就要參加由Y.X Community舉辦，首個大專生限定嘅鬼咁「螢」化妝派對。每位參加者都會獲贈螢光棒同夜光紋身貼紙，係充滿夜光嘅場地探索，仲會時不時遇到一身恐怖裝扮嘅「嚇鬼專員」，同參加者大玩Trick or Treat派糖果。
當中「鬼怪電話亭」打卡區佈滿血掌印，仲會不時響起鬼來電，恐怖程度逼真。大家可以係場內設有嘅photo booth，同一班好友扮鬼扮馬咁打卡留念！現場亦設有免費任玩嘅PS5驚慄遊戲、鬼馬彩繪區、塔羅占卜區，以及任睇恐怖電影，節目豐富，俾大家壯下膽！
【INFO】 鬼咁「螢」化妝派對 地址：紅磡蕪湖街83號 Y83, Y Zone 時間：10月28日及29日 15:00-19:00 對象：DSE生、本地或海外現屆大專大學生、應屆畢業生 報名方法：按此了解更多
萬聖節2023 | 活動5 – 淺水灣《七門教》慶典
如果想感受港式地道恐怖氣氛，「港鬼故」於淺水灣The Pulse舉辦嘅《七門教》慶典就啱晒你，當中最矚目嘅大型鬼屋佔地近10,000平方英尺，每組參觀者最多7人。鬼屋入面含多個驚慄逼真嘅場景佈置，邪教地牢會將你帶返去 80年代香港，親身探索《七門教》起源，恐怖指數爆燈！
另外來自台灣嘅「東方魔團」國際得獎魔術師，精心設計香港限定嘅大型魔術，為大家表演七門黑大型魔術。同場仲舉辦邪門藝術展，展出各地畫家嘅詭異作品，以藝術角度展現神祕魔法嘅魅力。是次慶典更結合市集、美食同音樂節元素，匯集多個檔主嘅奇趣珍藏，大家仲可以參與傳教音樂騷，進入瘋狂崇拜之夜，活動非常豐富啊！
【INFO】 《七門教》慶典 地址：淺水灣海灘道28號The Pulse 時間：10月7至8日、10月14至15日、10月21至22日、10月27至29日、10月31日 14:30-22:30 報名方法：按此了解更多
萬聖節好去處 6 – 《鬼域結界：西貢公立學校》劇本殺遊戲
近年來劇本殺成為一大班朋友聚會必做嘅娛樂活動之一，而Mental Bread@港式情侶就趁萬聖節推出《鬼域結界：西貢公立學校》劇本殺遊戲，充滿港式恐怖元素。重點就係活動會於真實古蹟學校進行，係120分鐘內以小組形式進行解謎，鬥智鬥力。
故事講述荒廢多年嘅西貢公立學校曾經發生「結界失蹤事件」以及「校園五屍案」，至今依然係未破解嘅懸案，因此經常鬧鬼。一眾玩家將要身歷其境與惡靈近距離對抗，搵出學校被詛咒嘅原因，再進行超渡，仲會隨時遇到由演員扮演嘅惡鬼，驚嚇度十足！
【INFO】 《鬼域結界：西貢公立學校》劇本殺 地址：西貢普通道30號（西貢天后廟旁） 時間：10月5至8日、10月12至15日、10月19至23日、10月25至31日 報名方法：按此了解更多
萬聖節好去處 7 – 樂高「小魔怪狂歡派對」
如果想帶小朋友感受萬聖節氣氛，就不妨參與香港樂高探索中心舉辦嘅「小魔怪狂歡派對」。由即日起至10月31日，小朋友可以戴上限定詭怪面罩扮鬼扮馬，體驗樂高探索中心裏面各款好玩詭秘嘅遊戲，仲能夠獲得精美小禮品。
派對舉行多個萬聖節限定活動，例如於指定時間放映4D動感體驗「小魔怪追逐戰」，與故事主角一齊享受沉浸式冒險之旅。另外小朋友可以發揮創作力，巧妙運用樂高顆粒完成可愛樂高南瓜，以及參與萬聖節限定樂高創意工作坊，了解各款樂高拼砌技巧，學習拼砌唔同嘅萬聖節作品，寓學習於娛樂。場內仲設置巨型樂高南瓜打卡點，一家大小可以悉心打扮，齊齊打卡留念！
【INFO】 樂高「小魔怪狂歡派對」 地址：香港九龍尖沙咀梳士巴利道18號K11 MUSEA地庫1樓B131-133號 時間：即日起至10月31日 10:00-19:00 報名方法：按此了解更多
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
