踏入12月，又到咗一年入面最期待嘅節日。每逢聖誕節，香港各大商場都會有聖誕裝飾，鍾意影相嘅朋友點可以錯過呢個打卡機會！今次小編精選10個聖誕打卡商場，遍佈港九新界，等大家沉浸喺喜慶節日嘅無限喜悅之中，同時喺唔同主題下影出IG靚相。
圖片來源：官方圖片｜撰文：Cynthia
聖誕好去處2023 | 1. YOHO MALL
聖誕節想盡情打卡？今個冬日，元朗YOHO MALL精心打造佔地近 2500 平方呎嘅沉浸式星空裝置「星語夜」，6大魔幻星空主題場景令你好似置身魔幻國度一樣。大家可以約埋摯愛親朋，喺華麗浪漫嘅星河下共度聖誕節。「星願琉璃隧道」由彩色琉璃碎片而成，點點星光穿透著玻璃映照身上。「星雨之森」以超過10,000顆小燈泡及多棵質感風聖誕樹打造，非常夢幻！另一個推薦嘅打卡位係「星瀑の弦月」，藏有12星座縮影，你可以坐喺月亮上觀賞閃爍銀河，記錄最難忘浪漫嘅聖誕節！
【INFO】
YOHO MALL《星語夜》
地點：YOHO MALL I中庭及YOHO MALL II中庭
日期：2023年11月中旬至2024年1月1日
聖誕好去處2023｜2. T.O.P This is Our Place
旺角T.O.P商場今個聖誕變身「育嬰院」！本地插畫家及發明家「東尼電機」首次同T.O.P合作，召喚一眾搞笑動物，合力打造四大打卡位，可愛呈獻「聖誕懷孕動物大TWINS徙」。今次展覽亮點就係冬日氣氛滿滿嘅3米高「懷孕雪人」，喺T.O.P空中花園出現，白白胖胖超可愛！另外，一樓仲有15倍巨大化「懷孕聖誕鹿」，伴隨bling bling聖誕樹同花環，洋溢濃厚的聖誕氣氛！
【INFO】 T.O.P x 東尼電機 《聖誕懷孕動物大TWINS徙》 地點：旺角彌敦道 700 號 T.O.P This is Our Place 日期：即日起至2024年1月14日
聖誕好去處2023 | 3. MOKO新世紀廣場
MOKO 新世紀廣場都心思盡出，設兩大必去打卡位。先聯乘香港街頭編織藝術團體打造 “Merry X’mas! Knit Our Town” ，聖誕樹「著」起色彩繽紛嘅毛衣，全場總共用上400球毛線，所有大大小小聖誕樹同燈柱都係全人手鈎織圖案，陪大家過個暖笠笠嘅聖誕。另外，L3樓層仲有由五千朵花同閃亮LED燈飾組成嘅「浪漫星光花海」，以超過5千朵聖誕花及閃亮LED燈飾打造出壯麗花海，充滿濃情蜜意，係情侶必到嘅浪漫秘境！淨係打卡唔夠好玩？MOKO仲有以草莓為主題嘅《莓日都是聖誕》市集，匯集40個本地人氣美食及文創品牌，一於食住過聖誕節！市集去到12月15號咋，快啲把握時間去睇啦！
【INFO】 “Merry X’mas! Knit Our Town” 聖誕佈置 日期：即日起至1月1日 時間：10:00 - 22:00 地點：MTR樓層中庭 「MOKO GARDEN @L3」浪漫星光花海 日期：即日起至1月1日 時間：10:00 - 22:00 地點：L3樓層（近丸十あぶり牧場） MOKO新世紀廣場 《莓日都是聖誕》市集 地點：MTR樓層中庭（每日） 及L2長廊（12月9至10日） 日期：即日起至2023年12月15日
聖誕好去處2023 | 4. ELEMENTS圓方
聖誕佳節，ELEMENTS圓方都著洋溢濃厚嘅聖誕氣氛。大家可以走進皚皚雪花點綴嘅神奇魔幻盒子，入面充滿七彩裝飾，觀賞折射出閃爍嘅錯視效果。仲有超唯美8米高的巨型聖誕樹，配合燈光盛宴，輕鬆拍下冬日聖誕感靚相！除咗有華麗嘅打卡熱點，聖誕老人同聖誕精靈仲會喺12月17及24至26日現身，非常適合大人細路。
【INFO】
ELEMENTS圓方《Merry Dreamscape: The gifting magic》
地點：ELEMENTS圓方金區
日期：2023年11月16日至2024年1月1日
時間：10:00 - 22:00
聖誕好去處2023｜5. 德福廣場
一間「精靈鞋匠屋」出現喺德福廣場！以格林童話「鞋匠與精靈」 為靈感，以北歐風重現故事入面嘅小村莊。配合透亮嘅彩繪玻璃窗，哥德式建築設計，感覺好似去咗歐洲過聖誕節咁，別具氣氛！唔講唔知道，咁靚嘅聖誕裝飾係由香港知專設計學院的一眾學生幫忙設計，有興趣嘅朋友記得去行一轉啦！
【INFO】
德福廣場 《精靈鞋匠夢工場》
地點：德福廣場1期地下中庭
日期：即日起至2024年1月1日
聖誕好去處2023｜6. 新都城中心
谷咕，谷咕！聲音係由MCP新都城中心傳出嚟㗎，唔知有咩搞作呢？原來今個聖誕節，亞洲首個德國黑森林布穀鳥鐘聖誕盛會登陸新都城中心！揉合黑森林工藝遺產、歐陸聖誕氛圍同多元感官體驗，有多個藝術打卡位同互動投影遊戲，輕鬆拍出富有歐陸風味、有立體感嘅相。當中最吸晴係6米高布穀鳥鐘小屋，每逢整點及30分更會有「飄雪聖誕光影音樂匯演」，聖誕音樂配合雪花紛飛嘅場面，等大家可以欣賞醉人節奏散發濃濃文藝氛圍。仲有冬日黑森林小鎮同埋奇幻禮物盒，為節日注入繽紛色彩，真係諗唔到原因唔去呢！
【INFO】
“The Christmas Cuckoo at MCP” 大型聖誕裝置及布穀鳥鐘珍藏展
地點：MCP CENTRAL（新都城中心2期）L1天幕廣場
日期：2023年11月11日至2024年1月1日
時間：10:00 - 22:00
聖誕好去處2023｜7. 新城市廣場
新城市廣場搖身一變成為《水滴精靈夢幻聖誕小鎮》，以超現實風格融合唯美夢幻嘅9大搶眼打卡位，為你送上溫柔嘅冬日祝福。獲多個奢華品牌如Hermès、Bulgari、Apple等青睞的英國插畫家Edward Monaghan首度為新城市廣場聖誕裝置擔任設計總監，帶來可愛嘅水滴精靈。當中必影3米高發光水滴精靈、由水滴精靈化身成閃爍吊飾打造嘅5米高聖誕樹、7米寬戶外互動光影水滴精靈許願亭，仲有即影即Share的Selfie郵局，全部吸睛度爆燈。咁可愛嘅水滴精靈，大家快啲去見佢啦！
【INFO】
新城市廣場《水滴精靈夢幻聖誕小鎮》
地點：新城市廣場1期3樓中庭、7樓星光花園、3樓戶外平台
日期：即日起至2024年1月1日
時間：12:00 - 22:00
聖誕好去處2023｜8. 利東街
利東街聖誕星星已經係每年聖誕節必去熱點。「The Wishing Stars」聖誕裝置滿佈一百萬顆七彩寶石，化身200米的星鑽許願長廊。日頭星光簇擁，晚上燈光灑落就化身星河，超浪漫！另外最矚目莫過於中庭上空懸掛一顆五米「巨型許願星」，散發幻彩閃爍的燈光，極其搶眼。聽落已經好吸引，大家記得嚟打卡放「閃」！
【INFO】 利東街《The Wishing Stars》 地點：灣仔利東街 日期：即日至2024年1月14日 時間：10:00 - 23:00* (每日17:00亮燈) *12月23日至26日、12月30日至2024年1月1 日亮燈時間將延長至凌晨12點
聖誕好去處2023｜9. 太古廣場
太古廣場今年主題係「奇幻聖誕」，華麗化身成為充滿童話色彩嘅冬日森林。最矚目嘅莫過於「魔幻湖泊」，大家可以登上小舟享受片刻寧靜，享受夢幻氛圍。另外，太古廣場三座外嘅「冬日奇幻花園」有間發光玻璃小屋，超唯美，係打卡留念嘅最佳場景！當然唔少得「聖誕老人屋」同「聖誕許願花園」，精緻設計一樣充滿奇幻魅力。
【INFO】
太古廣場《奇幻聖誕》
地點：太古廣場
日期：即日至2024年1月2日
時間：10:00 - 22:00
聖誕好去處2023｜10. 大元商場
想同寵物一齊玩盡歡樂聖誕？大元商場舉辦「Play Eat Tai Yuen Christmas Pawty」主題活動，等你帶同愛寵前來放電打卡。派對設有4米高、佈滿毛孩足印的「炫彩星光聖誕樹」，令平台花園化身為絢麗多彩嘅狂歡派對，等你可以瘋狂捕捉毛孩盡興嘅表情。另一亮點係4.5米高的「七彩光影菠蘿」幻彩藝術裝置，日頭玻璃折射陽光，晚上綴以柔和燈光，夢幻又華麗，係絕佳嘅打卡機會！
【INFO】 大元商場 《Tai Yuen Christmas Pawty》 地點：大元商場平台花園 日期：2023 年 12 月 16至 17 日 時間：下午 1 時至 5 時
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
YouTube – @saucemediahk
