【 沙田好去處 】每逢假期，相信各位家長都會為小朋友悉心安排精彩嘅活動，而近期沙田進駐咗唔少大型娛樂設施同食店，無論吃喝玩樂都一應俱全，最適合一家大細去消遣！今次編輯為大家介紹6大沙田最新假期好去處，包括恐龍公園Dino Park、Yum Me Play全新兒童運動體驗館、泰奶ChaTraMue首間cafe、翻新後嘅沙田好運中心、壽司郎姊妹店「杉玉居酒屋」，以及Shh Massage沙田新店，即睇以下地址同詳細介紹啦！
圖片來源：新城市廣場、好運中心、綠色建築議會、Facebook @Yum Me Play、@ChaTraMue – Hong Kong、@Sugidama HK 香港杉玉、Instagram @shh.ltd、Openrice @LindaWong、@chrisyeah、@Jasmine409K、@Kenny Chan、@Daniel KO、@Andy Ho｜撰文：Icy
沙田假期好去處 1. 恐龍公園Dino Park
恐龍公園Dino Park將於今年第三季進駐沙田新城市廣場，佔地逾35,000呎，以侏羅紀史前生物為主題，設計出達17項益智玩樂設施，激發小朋友嘅想像力同潛能，鍾意恐龍嘅小朋友絕對唔可以錯過！
(圖片來源：新城市廣場）
場地設計色彩繽紛，設施包括鞦韆、旋轉圈圈、休憩空間等等。當中最矚目就係長26米、高7米嘅巨型恐龍骨架，以幾何圖形組合而成，集攀爬、繩網以及滑梯於一身，好玩之餘仲可以訓練小朋友身體協調同平衡力！
巨型恐龍骨架集攀爬、繩網以及滑梯於一身！(圖片來源：新城市廣場）
【INFO】 《恐龍公園Dino Park》 地址：沙田新城市廣場1期5樓戶外平台 時間：預計於今年第三季開放
沙田假期好去處2. Yum Me Play全新兒童運動體驗館
位於沙田新城市廣場嘅Yum Me Play旗艦店推出全新兒童沉浸式運動體驗館，佔地3,800平方呎，專為3至12歲小朋友而設，兩個人入場最抵只需$198！
（圖片來源：Facebook @Yum Me Play）
場地分為八個專區，讓小朋友係安全嘅環境下體驗VR獨木舟、高爾夫球、欖球、拳擊、射箭、滑雪等各種運動，並可以挑戰18項關卡，配合STEM元素，從中增進與運動有關嘅體能同科技知識。
（圖片來源：Facebook @Yum Me Play）
場內最特別嘅係特設人工智能運動機械人，小朋友要利用編碼程式「訓練」人工智能機械人，係迷你足球場上越過障礙並入球得分，益智又刺激！
小朋友可以了解如何利用編碼程式「訓練」人工智能機械人，寓學習於娛樂（圖片來源：Facebook @Yum Me Play）
【INFO】 《Yum Me Play》 地址：沙田新城市廣場一期Play Park LB07 時間：星期一至日 10:00-19:30 預訂網址：https://bit.ly/3NEmNAX
沙田假期好去處3. 泰奶ChaTraMue首間cafe
泰國老字號手標茶品牌ChaTraMue於今年六月登陸沙田新城市廣場，開設全港首間cafe，並且係品牌第一間提供泰式鹹食嘅分店，推出全新餐牌，滿足各位奶茶迷！
（圖片來源：Openrice @LindaWong）
餐點由泰籍師傅主理，例如泰式串燒、牛肉河、泰式肉碎炒飯、青木瓜沙律、黃咖哩雞法包等等。
（圖片來源：Openrice @chrisyeah）
Cafe當然唔少得招牌茶飲同甜品，例如泰奶千層蛋糕（$65），淋上泰奶醬汁，入口香甜濃郁。另一人氣推介就係泰奶同綠茶飄雪刨冰（$88），同樣會淋上香濃醬汁，夏天品嚐簡直透心涼！
（圖片來源：Facebook @ChaTraMue – Hong Kong）
【INFO】 《ChaTraMue Cafe》 地址：沙田新城市廣場第三期A327號店 時間：星期一至日 11:00-22:00
沙田假期好去處4. 沙田好運中心
鄰近新城市廣場嘅沙田好運中心於翻新後，引入區內第一間大型超市TASTE以及多達30間食店，成為沙田合家歡嘅好去處之一。
（圖片來源：好運中心）
翻新設計以明亮色調為主，佔地15萬呎，設有開放式休憩空間，天花板更鋪有大型LED屏幕，根據唔同節日展示出相應主題影像，充滿新鮮感！
（圖片來源：綠色建築議會）
商場內食肆種類包羅萬有，有中菜、雞煲、東南亞美食、台式料理、日本餐廳以及cafe等等，並且將甜品店集合係同一樓層，方便大家「覓食」，當中包括更本地老字號中式糖水舖「地茂館甜品」！
（圖片來源：Openrice @Kenny Chan、Daniel KO、Andy Ho）
【INFO】 《沙田好運中心》 地址：沙田橫壆街1-15號
沙田假期好去處5. 杉玉居酒屋
壽司郎姊妹店「杉玉居酒屋」繼於灣仔開設全球海外首間分店後，近日再進駐沙田中心，店舖設計跟足傳統日式居酒屋裝潢，並提供多款新鮮日本料理同刺身壽司，令客人感覺好似去咗日本咁！
（圖片來源：Openrice @Jasmine409K、LindaWong）
居酒屋推出多款期間限定美食，例如鰻魚玉子渾身卷，將鰻魚同玉子藏係山藥泥中，口感多層次。
（圖片來源：Facebook @Sugidama HK 香港杉玉）
另外亦有多款抵食午市定食，例如以$148嘅價錢就可以品嚐海鮮盛宴，大飽口福。鍾意食天婦羅嘅朋友一定要試下$88嘅杉玉豪華天丼，有炸蝦、魷魚、沙鮻等，材料好豐富！
（圖片來源：Facebook @Sugidama HK 香港杉玉）
【INFO】 《杉玉居酒屋》 地址：沙田橫壆街2-16號沙田中心3樓32A及69A號舖 時間：星期一至日 11:00-23:00 電話：2310 0388
沙田假期好去處6. Shh Massage
蘇麗珊主理嘅按摩店Shh Massage於沙田新城市廣場開設全新分店，室內設計以大地色為主，並以木系傢俱同乾花營造清新自然嘅感覺，以後大家行行下街覺得攰，就可以入去輕鬆一番喇！
店面感覺清新典雅，係大家假日「充電」嘅好去處（圖片來源：Instagram @shh.ltd）
店舖設有單人房同雙人房，私隱度十足，而按摩服務涵蓋足底、頭肩頸、淋巴排毒、熱石同經絡管理等等，另外仲有胸部按摩、刮痧、全身舒緩同痛症治療等療程，切合身體唔同部位嘅需要。
（圖片來源：Instagram @shh.ltd）
【INFO】 《Shh Massage》 地址：沙田新城市廣場UB-05 時間：星期一至日 11:00-22:00 電話：2628 3661 詳情：https://bit.ly/3KnAe5M
————————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
