【 香港沙灘推介 】夏日炎炎，最啱當然係同朋友去下沙灘，曬曬太陽，玩下水上活動啦！以下為大家收集咗10大香港沙灘好去處，唔少仲可以玩獨木舟、滑浪等水上活動，今個夏天一於約埋朋友去衝浪玩水啦！
圖片來源：香港旅遊發展局、康文署、發展局、Cafe Roma、挪亞方舟酒店、FB@Discover Hong Kong、IG@redflagboathk、IG@nfongphoto、IG@miru_muri｜撰文：Jan
1. 淺水灣泳灘
提到香港沙灘，當然不得不提淺水灣。淺水灣泳灘位於香港島南區，假日唔少外國人都會去Chill下，近年附近有唔少商場、餐廳、咖啡店進駐，去到真係會有種旅行渡假嘅感覺呢！
【INFO】 地址：淺水灣海灘道
2. 深水灣泳灘
如果覺得淺水灣太多人嘅話，都可以去下隔離嘅深水灣泳灘，由於泳灘水位較深，所以有唔少人會係嗰度玩浪板同風帆等水上運動。
【INFO】
地址：深水灣香島道
3. 赤柱正灘泳灘
位於赤柱嘅正灘泳灘鄰近美利樓同赤柱市集等景點，泳灘旁有獨木舟、SUP租借，亦有康文署管理嘅赤柱正灘水上活動中心，仲可以報名學玩滑浪風帆。
【INFO】 地址：赤柱灘道
4. 大浪灣泳灘
鄰近石澳嘅大浪灣泳灘，「灘」如其名泳灘以大浪聞名，所以吸引唔少人去滑浪。泳灘設有快餐亭、燒烤爐、淋浴等設備。另外唔講唔知，原來大浪灣正係《嚦咕嚦咕新年財》結局中一大班人打牌的場景，有興趣嘅朋友就可以去潮聖一下啦！
【INFO】 地址：石澳大浪灣道
5. 大埔龍尾泳灘
大埔龍尾泳灘係暫時最新開放嘅公眾泳灘，剛於2021年對外開放，亦係全港第一個由政府興建嘅人工泳灘。泳灘全長約200米，附近設有收費公眾停車場，揸車人士夠晒方便。
【INFO】 地址：大埔汀角路168號
6. 西貢三星灣泳灘
如果想遠離煩囂嘅話，就可以去西貢一帶嘅小島沙灘，其中三星灣泳灘正係其中一個隱世沙灘，雖然沙灘的面積唔算大，但勝在水質較好，所以都吸引唔少人前往。三星灣泳灘可以喺白沙灣碼頭乘坐街渡到達，另外亦可經山路步行前往。
【INFO】 地址：西貢白沙灣三星灣
7. 西貢浪茄灣
另一個同樣位於西貢嘅浪茄灣，鄰近萬宜水庫東壩，相信大家都唔會陌生，皆因浪茄水質同風景一流，所以都吸引咗唔少外國人專登前往。不過前往浪茄灣並唔容易，由東壩出發，大約需要步行30分鐘，但可以欣賞到香港難得嘅絕美景色，都十分值得呢！
【INFO】 地址：香港新界西貢半島浪茄
8. 貝澳泳灘
位於大嶼山嘅貝澳泳灘，係唔少滑浪、游泳愛好者嘅好去處，旁邊更係政府露營地點，亦有小食部售賣小吃同沙灘用品，仲有燒烤爐，設施十分完善，所以亦係夏天熱門親子好去處，黃昏時間更可以睇到靚靚日落美景。
【INFO】 地址：大嶼山貝澳
9. 梅窩銀礦灣泳灘
除咗去貝澳泳灘之外，亦可以選擇附近約10分鐘車程嘅梅窩銀礦灣泳灘，泳灘設有沙灘排球場，旁邊亦可以租借獨木舟，而且鄰近銀礦灣酒店，大家暑假就可以去個短旅行啦！
【INFO】
地址：大嶼山梅窩東灣頭路
10. 馬灣東灣泳灘
馬灣嘅東灣泳灘最特別之處，當然係可以睇到青馬大橋同汀九橋靚景，打卡一流。而且馬灣內亦有唔少景點同餐廳，仲有挪亞方舟主題公園、酒店，所以好適合一家大細嚟嘅親子好去處。
【INFO】 地址：馬灣珀麗路
————————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
