天氣漸漸回暖，鍾意水上活動嘅大家一定等咗好耐，又係時候約埋朋友一齊消暑解悶！小編為大家整合全港5大 水上活動好去處 ，無論係市區定郊區通通有份！想知道有邊幾間同有咩玩就記得繼續碌落內文睇更多啦！
圖片來源：官方圖片｜撰文：Sharon
1. 觀塘VESSEL發現號
位於觀塘海濱嘅「發現號」水上活動中心今年正式開幕，係首個位於市區嘅水上活動中心！「發現號」提供3大水上活動課程， 必玩直立板同平板賽艇，仲會有唔同訓練及證書課程，就算係初學者都非常啱玩！中心會安排水上運動基礎課程所需要嘅訓練器材，包括單人雙人直立板同平板賽艇，同時為大家準備助浮衣同繩，大家就可以玩得更放心。依家最平只需$250就可以玩足全日，夠晒抵玩！想試下玩水上活動又怕要去好遠嘅你哋，不妨約埋朋友一齊嚟觀塘海濱玩啦！
【INFO】 《「發現號」平板賽艇及直立板體驗》 地址：觀塘海濱 收費詳情： 平板賽艇體驗 / 基礎課程：$250、$365、$500 直立板體驗 / 基礎課程：$250、$365、$500 三項達人室內划機體驗 (賽艇機，龍舟機，獨木舟機)：$200 詳情：https://bit.ly/3S9Prdr
2. 賽馬會黃石水上活動中心
賽馬會黃石水上活動中心位於西貢東部，臨近大灘海峽係玩水上活動嘅最佳選擇！初學者可以喺中心對開海峽同土瓜坪內灣練習，而具經驗嘅水上活動人士則可以喺中心嘅東北面揚帆或划艇。喺呢度大家可以一邊划艇、一邊遠望塔門及高流灣，感覺夠晒Chill！中心提供保暖膠衣、獨木舟、風帆及滑浪風帆，持有認可證書人士可租用獨木舟、風帆或滑浪風帆自行練習。另外，間中仲會舉辦唔同嘅訓練課程，會揚帆或划艇到海下海岸公園，有興趣嘅朋友可以留意一下！
【INFO】 《賽馬會黃石水上活動中心》 交通： 1. 乘搭92號巴士由鑽石山鐵路站往西貢，或299x號巴士由沙田新城市廣場往西貢， 然後轉乘94號巴士由西貢往黃石碼頭(大約30分鐘一班)。 2. 星期日及公眾假期加開96R號巴士行走鑽石山鐵路站至黃石碼頭。 詳情：https://bit.ly/3JmUS5V
3. 西貢鴻運水上活動中心
鴻運水上活動中心提供一站式水上活動體驗，無論係獨木舟、直立板定滑水活動都可以玩！呢度嘅設備仲非常完善，提供岸上配套、免費沖身區、吹風機及儲物箱等。如果嫌唔夠刺激，大家仲玩埋滑水活動，鴻運水上活動中心會提供「一船兩玩」的服務，租借一架船即可玩齊Wakeboard同Wakesurf！
【INFO】 《賽馬會黃石水上活動中心》 鴻運 - 獨木舟/直立板 地址1：大埔大尾篤汀角路202號 電話：9841 4199 地址2：香港西貢西貢沙下路 電話：9730 1800 鴻運 - 滑水運動 地址：白沙灣154號Hung Wan Marine 電話：9131 7890 詳情：https://bit.ly/3yrgGqI
4. 浪高長岸
浪高長岸係水上活動度假中心，提供多款水上活動包括滑浪風帆、風帆、風箏滑浪、衝浪板、印第安獨木舟等。有各項水上活動課程及設施租借，就算初學者都可以玩，因為場內有專人指導，大家可以玩得更放心！呢度仲有度假屋及戶外營地，玩完水可以入住，同屋企人或者朋友一齊燒烤！
【INFO】 《浪高長岸》 地址：大嶼山長沙下村29號 電話：8104 6222 詳情：https://bit.ly/3ypKaW8
5. 藍天沙下水上活動中心
藍天沙下水上活動中心為水上運動愛好者提供多項水上活動，只要你想玩嘅水上活動都可以喺呢度搵到！提供嘅設備亦非常完善包括直立板、單人、雙人獨木舟及龍舟。另外，仲會定期舉辦唔同嘅課程或培訓，最受歡迎嘅直立板初級課程，喺2小時內大家可以學習基本直立板技巧如直立板上嘅平衡、由俯臥式、跪划式至直立式於板面上嘅姿勢同直立板運動嘅安全知識等。小朋友則可以參加「藍天夏令營運動營」，學習到團隊合作精神，比賽中嬴輸嘅意義同學習聆聽教練指引嘅重要性！除此之外，仲有直立板瑜伽、龍舟課程、獨木舟課程同游泳課程可以參加。
【INFO】 《藍天沙下水上活動中心》 地址：西貢沙下路（近迴旋處) 營業時間： 10:00 – 17:00 (視乎季節) 電話：2791 0806 詳情：https://bit.ly/3ZS3gzT
————————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
