2023年暑假過咗幾星期，已經日日放假放到悶？唔知去邊好？精彩節目陸續有嚟。香港好多商場都趁暑假期間舉辦主動活動，有卡通人物展覽同主題市集等，無論係情侶拍拖定係親子放電都適合。快啲睇下文，記低日期、時間同地點，今個暑假一定唔會悶！
圖片來源：東薈城名店倉、MOSTown新港城中心、領展、香港ifc商場、維他奶國際集團有限公司｜撰文：Angela
1. 東薈城「夏日探索— Hello Kitty Seven Wonders in MetaGaia」
東薈城名店倉同AI元宇宙MetaGaia創意聯乘，喺暑假期間攜手打造「夏日探索— Hello Kitty Seven Wonders in MetaGaia」主題活動！商場內特設5個夢幻主題打卡區，包括6米高巨型「Hello Kitty女皇」充氣裝置、位於二樓中庭廣場嘅6米高「幻彩城堡」，Hello Kitty更加會現身同大家見面。唔止現實世界，大家仲可以下載「MetaGaia」App，以AR方式發掘更多奇幻畫面！
【INFO】 《夏日探索— Hello Kitty Seven Wonders in MetaGaia》 地址：東薈城名店倉 日期：7月14日至8月31日
2. 馬鞍山新港城中心「最GREEN『鯊』灘玩樂營！」
喺香港呢個「石屎森林」，教育大家保育海洋環境嘅重要性絕對係刻不容緩。「海塑基金會」聯乘超人氣台灣插畫「鯊魚先生MR.SHARK」一齊走入馬鞍山新港城中心，帶大家一邊學習保育知識，一邊玩樂。商場除咗有多個超可愛打卡位，仲設有7米高動感海洋滑梯同波波池，大膽嘅你就一定要去挑戰10米長飛索，畢竟喺商場入面玩飛索真係少有！玩完之後唔好忘記去埋「『最』值得珍惜的海洋資源 – 香港珍貴珊瑚展」，展覽精選咗10件香港海域珍貴珊瑚標本展出，保證令你同小朋友大開眼界！
【INFO】 《最GREEN「鯊」灘玩樂營！》 地址：MOSTown新港城中心2樓天幕廣場 日期：7月14日至8月27日
3. 秀茂坪商場 x 白爛貓「夏日大冒險」
爆紅人氣插畫白爛貓同一眾好友包括臭跩貓、麻糬、那條魚一齊遠道而來，登陸秀茂坪商場，白爛貓化身為旅行團團長，帶各位「爛粉」遊歷秀茂坪一帶名勝。多姿多采嘅旅程由「鯉魚門燈塔」展開，沿途會經過「秀茂坪交通安全城」等景點，途中仲有三大互動遊戲區，包括「貓貓疊羅漢」、「神槌大力士」同「願貓上釣」，考驗參加者嘅手腳協調能力、力量同速度。今個夏天，不妨一齊去探白爛貓，同時遊覽秀茂坪周邊地標啦。
【INFO】 《白爛貓「夏日大冒險」》 地址：秀茂坪商場地下花園廣場及鯉魚門廣場1樓 日期：7月28日至9月10日
4. 黃大仙中心「我和漢服有個約會」
近年漢服喺香港逐漸興起，黃大仙中心嘅「我和漢服有個約會」就畀大家一個機會更認識漢服文化。黃大仙中心北館1樓及2樓設置咗充滿詩情畫意嘅「穿越古時空」打卡區，包括有小橋流水古船同埋中式古典庭院，大家可以去到「漢服體驗館」免費租借漢服，化身古代美人打卡影相！商場更夥拍中國妝束復原團隊及國風雅集香港漢服文化協會，展出3套極具歷史價值嘅漢服復原珍品，機會難得，鍾意漢服嘅你一定要去睇！
【INFO】 《我和漢服有個約會》 地址：黃大仙中心北館 日期：7月8日至8月27日
5. 赤柱廣場「FUWAFUWA • 軟綿綿彈樂園 」
赤柱廣場聯乘本地潮玩品牌URDU打造「FUWAFUWA • 軟綿綿彈樂園 」主題活動！赤柱天幕廣場超過12,000呎空間化身成為治癒系羊駝FUWAFUWA主題遊樂園，一系列創意遊樂設施，包括動感搖搖板、跳躍攀爬架等，畀小朋友大玩特玩。4樓仲增設咗毛孩專區，主人可以同毛孩一齊去打卡放電。大朋友就一定要去美利樓橫跨兩層嘅「Amaz x FUWAFUWA 軟綿綿期間限定店」，精彩嘅六大體驗區有得買限量精品、玩卡牌遊戲、參加週末Workshop等，活動豐富夠你玩足一整日。
【INFO】 《FUWAFUWA • 軟綿綿彈樂園》 地址：赤柱廣場地下天幕廣場 日期：7月10日至9月10日
6. ifc商場「Life is a Playground」
無論幾多歲，可以保持童心都係好難得。香港ifc商場聯乘日本新銳藝術家GAKU（佐藤楽音）呈獻創意藝術裝置「Life is a Playground」，同大家一齊進入佢嘅童心世界。21歲嘅GAKU喺3歲就被診斷患上嚴重自閉症，智商只得25，就算係咁仍然無阻佢發揮天賦，透過畫畫演繹樂觀正面嘅內心世界。「Life is a Playground」分為3個展區，包括「繽紛旋轉木馬」藝術裝置、「專屬夢幻樂園」數碼互動體驗同埋「GAKU的夢想世界」藝術畫廊，可以欣賞到GAKU嘅作品之餘，大家亦都可以一齊感受生命嘅美好。
【INFO】 《「Life is a Playground」創意藝術裝置》 地址：香港 ifc商場一樓中庭 日期：8月1日至28日
7. 愉景新城D·PARK「尋龍探險」、「 Q版恐龍障礙賽 」
恐龍迷注意！維他奶™聯乘愉景新城，舉辦「尋龍探險」、「 Q版恐龍障礙賽 」，畀小朋友化身做小小探險家，展開尋龍之旅！「恐龍」們會隱藏喺商場入面各個地方，小朋友只要買維他奶™系列產品滿$45並出示收據，就可以喺場内換領一本「尋龍地圖」，去齊6個打卡位同做到指定條件就可以得到禮物一份啦！每逢星期日有可以參加「 Q版恐龍障礙賽 」，只要買維他奶™系列產品滿$100就可以報名，小朋友可以著上超搞笑嘅恐龍戰衣挑戰唔同關卡，挑戰成功仲可以得到證書同禮物，聽到都興奮！
【INFO】 《維他奶™ x D·PARK「尋龍探險活動」》 地址：荃灣愉景新城D·PARK（2樓福來邨入口旁） 日期：8月1至31日 活動詳情：https://bit.ly/3Qhd4C4 《維他奶™ x D·PARK「 Q版恐龍障礙賽 」》 地址：荃灣愉景新城D·PARK（1樓多元智能籃球場） 日期：8月6、13、20、27日（逢星期日14:00至18:00 – 每節30分鐘） 報名網站：https://bit.ly/44FgByc
