新手行山路線 | 最近嘅天氣開始適合行山，想輕鬆行山又有靚景睇，小編推薦大家呢8條簡易路線，無論係新手定係有經驗嘅人，都可以駕馭！
圖片來源：漁農自然護理署、民政事務總署、Instagram@cat_lam、as_mandyy | 撰文：Hedy
新手行山路線 1. 龍蝦灣郊遊徑
龍蝦灣郊遊徑位於清水灣半島以東，全長約2.3公里，入口喺大坑墩清水灣郊野公園隔離，隨住郊遊徑嘅開始，大家就要開始登上梯級，當到達大嶺峒頂峰後，便可以遠眺東面陡峭嘅果洲群島、南面嘅清水灣避風塘等。同時亦可沿途欣賞牛尾灣一帶風景，風光明媚。不過由於路程大都以樓梯為主，大家要因應情況量力而為。
【INFO】 龍蝦灣郊遊徑 長度：約2.3公里 時間：約2小時 交通：乘搭九巴路線91或專線小巴16、103、103M號，喺清水灣道「大坳門站」下車，然後沿清水灣道步行約二十分鐘到達大坑墩入口。
新手行山路線 2. 城門水塘
位於大帽山同金山郊野公園之間嘅城門水塘，絕對係適合新手甚或親子郊遊嘅地方！沿住菠蘿壩自然教育徑開始漫步，你可能會見到馬騮及野豬等動物嘅身影，不過記得唔好餵飼動物！再沿主徑向前行，就可以見到白千層步道，兩邊生滿一排排18cm高嘅白千層，唔少人都會專程嚟影婚紗相。細心咁聽附近嘅鳥鳴聲同流水聲，可以令你放鬆落嚟！走過白千層樹林之後，你都可以繼續往城門水塘觀景台前行，180度飽覽壯麗景色。
【INFO】 城門水塘 長度：約8公里 時間：約2小時 交通：港鐵荃灣站B1出口，越過青山公路行人天橋步行至兆和街，搭乘82號小巴直達城門水塘
新手行山路線 3. 新娘潭自然教育徑
新娘潭自然教育徑位於船灣淡水湖西北角，除咗簡單易行之餘，教育徑更係圍繞兩條優美嘅瀑布，新娘潭瀑布以及照鏡潭瀑布，相當壯麗！邊行邊聽住流水聲更可以有助洗滌心靈，同時又可以探索大自然間唔同嘅生物例如蜻蜓同蝴蝶等等，令人享受生活！
【INFO】 新娘潭自然教育徑 長度：約0.7公里 時間：約1小時 交通：乘搭公共交通工具前往大美督巴士總站，轉乘的士至新娘潭自然教育徑附近的綠色小亭下車；或乘專線小巴20R於新娘潭下車，星期日及假日則可乘 275R 直達新娘潭巴士站。
新手行山路線 4. 吉澳文化徑
吉澳係香港新界東北部面積最大嘅島嶼，島形曲折，其彎彎嘅海岸線可用作天然避風港，因而被漁民視為吉祥嘅海灣。吉澳文化徑以吉澳大街為中心，連貫島上嘅人文歷史景點，路徑大致平緩。兩條路線分別通往高地頂和高棚頂觀景台，可飽覽圳鹽田港以及印洲塘等景色。
【INFO】 吉澳文化徑 長度：約3.5公里 時間：約2小時 交通：乘坐往返馬料水至吉澳和鴨洲嘅渡輪，可於港鐵東鐵於大學站B出口下車，步行約15分鐘至馬料水3號梯台，搭乘渡輪前往吉澳及鴨洲。
新手行山路線 5. 砵甸乍山郊遊徑
想搵一段交通方便又係入門級嘅郊遊徑，砵甸乍山將會係好選擇。當到達觀景台嘅時候，不但可以遠眺小西灣以及清水灣半島嘅美景，更可以望到龍脊嘅景色，深深感受香港環海嘅景色同魅力，只需要2小時就可以行完全程！
【INFO】 砵甸乍山郊遊徑 長度：約1.9公里 時間：約2小時 交通：乘坐巴士9號或專線小巴16M至石澳道「歌連臣角」站下車，沿路口右邊石階步行至車路後，再沿路向上步行約25分鐘便可達郊遊徑入口。
新手行山路線 6. 大美督家樂徑
長約1公里嘅大美督家樂徑，有4個唔同嘅觀景台，能欣賞到淡水湖、八仙嶺以及馬屎洲風光。邊行呢段遠足路線，更可以搵到12個生肖標示柱，夠晒特別！如果嫌大美督家樂徑太短嘅話，更可以行埋船灣淡水湖主壩，睇埋日落先走，夠晒寫意！
【INFO】 大美督家樂徑 長度：1公里 時間：約1小時 交通：可乘搭公共交通工具（九巴路線 75K及275R/專線小巴路線20C及20R）前往「大美督」巴士總站，向船灣淡水湖主壩方向步行約5分鐘，可達白普理賽馬會青年旅舍旁起點。
新手行山路線 7. 荔枝莊地質景點
荔枝莊位於西貢西郊野公園、赤門海峽東南岸，其地質構造以及岩石類型相當複雜，當中更有來自侏羅紀晚期嘅火山沉積岩等罕見嘅岩石類型。如果想一睹岩層真貌，就記得要喺出發之前查清楚潮汐漲退嘅資訊，記得要喺潮退嘅時候前往！
【INFO】 荔枝莊地質景點 長度：1公里 時間：約1小時 交通：可從西貢墟乘坐7 號專綫小巴，在海下路白沙澳下車，沿山徑步行前往，路程約3.5公里；或乘坐街渡渡輪前往荔枝莊。
新手行山路線 8. 昂坪自然步道(彌勒山段)
昂坪自然步道彌勒山段景觀開揚，途中更可以見到鳳凰山同大東山，你更可以喺度同時觀賞到日落及天壇大佛等美景，實在令人心曠神怡！大部分嘅路面平坦，大家只要行大概2個半鐘就可以完成，較為輕鬆簡單！
【INFO】
昂坪自然步道(彌勒山段)
長度：5公里
時間：約2小時
交通：可乘搭新大嶼山巴士路線 - 2, 23 & 1R (只限星期日及公眾假期)，於昂坪360纜車站或昂坪巴士總站下車，昂坪自然中心位於昂坪市集內。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
