夏日炎炎，想影下打卡相又唔想咁多人可以去邊度？小編就用咗星期六嘅私人時間去同大家實測呢條大埔一日遊嘅路線畀各位參考吓～呢條路線唔單止方便，每個地方行過去都唔使15分鐘，唔使揸車都一樣去得晒！快啲碌落去跟住小編睇吓有咩大埔打卡推薦路線啦！ 👉🏻
圖片來源：SAUCE編輯部、Openrice、Instagram@boundlesscoffeehk、Instagram@coffee_maizi｜撰文：Debbie
大埔輕鬆一日遊景點（一）BOUNDLESS by REACTION
去到大埔嘅第一站就梗係醫好個肚仔，順便搵間Cafe舒舒服服飲返杯咖啡啦！見到IG都比較多人推薦啲好遠嘅純白Cafe，一係就要去到大尾篤先有小店，最後好彩都畀我搵到一間CP值好高，位於大埔市區嘅雙層Cafe。
BOUNDLESS嘅外身行水泥風暗色設計，但入到去嘅感覺就帶點文青木系嘅感覺。嗰日只有小編同朋友兩個一齊食lunch，所以就坐咗喺下層嘅二人枱。雖然等咗5-10分鐘枱，但員工態度都相當有善，好快入到座就遞上一杯凍水降溫（嗰日正正係大暑！）。假如你想約三五知己坐低食吓輕食飲咖啡就可以安排上層較闊落嘅位置用餐。
Menu選擇非常多而價錢亦非常相宜。由沙律、意粉到小食、漢堡，每一樣都非常吸引，最後我哋就選擇咗食招牌荷蘭鬆餅、小食同甜品再加兩杯咖啡，全程都使用QR Code落單，減少接觸又方便。
先講吓個羅勒雞肉長通粉荷蘭鬆餅，因為鐵盤熱上，所以影咗好耐相再用餐都依然保持到溫度～雞肉亦非常嫩口，食到長通粉後終於食到底皮！脆口又充滿蛋香味嘅荷蘭鬆餅有驚喜～下次會再試其他唔同口味！
再講就係呢個水牛城炸雞，一份小食有三大嚿雞肉，我好怕食到好鹹嘅水牛城醬但呢個一啲都唔會，加粗身薯條都只係加多$12，真係性價比超高呀。
呢兩杯咖啡嘅豆可以落單時選擇想要Nutty定果味重啲，我哋都選擇咗後者，拉花非常靚，而兩杯咖啡嘅味道亦都好高質，酸度啱啱好。
嚟得Cafe最後一定要試埋佢哋嘅甜品啦！ 呢個Tiramisu咖啡味好濃而且唔算好甜，啱哂小編呢啲鍾意食甜品但唔鍾意食太甜嘅人，整體成個用餐體驗我都好滿意，會再幫襯呀。
《BOUNDLESS by REACTION》
營業時間：星期一至日：09:00 – 21:30
電話：23651888
大埔輕鬆一日遊景點（二）鐵路博物館
食完飯想散步影吓相？有冇去鐵路博物館呢！雖然呢到地方唔大但每一個位置都好適合影打卡相㗎。不過大暑真係太熱，所以就算係星期六，博物館入面都冇乜人。
博物館前身為大埔墟火車站，係唯一一個以中式風格建築而成嘅車站。由於懷舊復古風格都係流行嘅打卡地點，所以呢到成日都會有人影相！冇人嘅時候影真係有種去咗日本嘅感覺㗎。
《香港鐵路博物館》
地址：香港大埔大埔墟崇德街13號
入埸費：免費
營業時間：星期一、三至日及公眾假期 ｜10:00 – 18:00
交通路線：
1.）經大埔墟站A2出口，往大埔綜合大樓方向步行約10分鐘
2.）從太和站B出口步行約10分鐘即可到達鐵路博物館
大埔輕鬆一日遊景點（三）- 小店輕食推薦「咖啡米子」
打完卡就差唔多可以行返去大埔超級城行吓街涼冷氣，小編有個習慣，就係去啲較遠嘅地方都會發掘吓有冇小店賣Scone或者Bagel，咁啱畀我喺IG見到呢間舖頭就喺大商場B區，梗係要買啲紀念品返去啦！「咖啡米子」屬於半開放式Cafe，前方有個Grab & Go嘅位置Order嘢食，後面就會有少量嘅座位畀大家堂食。今次只係試食咗佢哋自家製嘅Scone，96蚊有6粒，最濃味同最深刻都係朱古力味～下次一定留肚試埋店家大賣嘅茶味Roll Cake同咖啡焙茶拿鐵先得！
《咖啡米子》
營業時間：星期一至日：09:00 – 18:00
電話：96798769
【相關文章】：神秘領域！禁區沙頭角一日遊 客家圍村/香港最北島嶼/鴨洲
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
