唐老鴨90週年 | 各位鍾意唐老鴨嘅粉絲們，絕對唔可以錯過6月9日唐老鴨嘅生日，今年更係佢誕生嘅90週年，一定要大肆慶祝！香港迪士尼樂園亦特意舉辦1日限定嘅「唐老鴨90週年慶祝派對」，即刻睇睇當日有咩玩，唐老鴨更會驚喜現身！
圖片來源：官方圖片 | 撰文：Hedy
為咗慶祝唐老鴨90週年，香港迪士尼樂園將會喺6月9日至7月7日舉行一連串嘅慶祝活動。喺6月9日唐老鴨生日當日，迪士尼仲會舉行1日限定嘅「唐老鴨90週年慶祝派對」，齊齊慶祝呢個咁重要嘅日子。
唐老鴨90週年 | 驚喜1：限定90週年慶祝派對
大家絕對要喺唐老鴨生日當日，同佢一齊慶祝生日。當晚大家可以一齊參加由黛絲為唐老鴨精心準備嘅驚喜生日派對，米奇、米妮、黛絲等一班好朋友將會齊齊登上奇妙夢想城堡舞台，輪流為唐老鴨送上心意，仲會有生日蛋糕～呢個時候大家就可以打開手機嘅閃光燈，為唐老鴨嘅生日蛋糕送上最暖心嘅燭光！城堡更會以立體光影化成一個巨型生日蛋糕，一齊為唐老鴨留底難忘嘅驚喜～
唐老鴨90週年 | 驚喜2：唐老鴨生日大街舞步
貴為六月之星嘅唐老鴨，當然會同大家見面同一齊互動～當小鎮廣場響起歡樂嘅音樂之後，唐老鴨就會邀請粉絲一齊參與生日大街舞步，帶領大家學習獨特嘅鴨式舞步。同唐老鴨一齊扭扭腰擺擺尾，環繞小鎮廣場行！
唐老鴨90週年 | 驚喜3：唐老鴨百變造型現身
唐老鴨將會喺香港迪士尼樂園以及度假區酒店出沒，想同唐老鴨慶祝生日就一定要捕捉吓佢喺邊啦，隨時都會以唔同驚喜造型同大家見面～當中包括狩獵者、春夏服飾、波利尼西亞風、運動風、星級大廚以及皇家禮服等等打扮！唐老鴨仲會以一身皇家禮服喺幻想世界出巡，大家記得要沿途向佢行禮，送上生日祝福！
唐老鴨90週年 | 驚喜4：90週年限定商品
香港迪士尼樂園引入多款唐老鴨90週年紀念主題系列，無論係經典動畫場景襯衫、藍白水手T恤、經典畫家帽定係超可愛嘅精緻配飾都有齊～一齊打扮成為唐老鴨，幫佢慶祝生日啦！
唐老鴨90週年 | 驚喜5：聯乘日本潮牌FDMTL
香港迪士尼樂園再次聯乘日本人氣潮牌FDMTL，以藍染同襤褸等傳統日本技藝推出唐老鴨主題產品，當中包括外套、襯衫、斜孭袋以及摺扇等等。奇妙處處通會員更可以率先獨家預購商品！
唐老鴨90週年 | 驚喜6：唐老鴨主題美食及甜點
唐老鴨生日派對自然一定會有唐老鴨造型嘅美食同甜品，當中包括唐老鴨及黛絲造型雪條，食落去超級消暑～大街市集亦都有期間限定嘅咖啡雲石蛋糕配芝士忌廉以及菠蘿白朱古力撻！香港迪士尼樂園酒店「翠樂庭餐廳」自助餐亦有多款唐老鴨立體精緻甜品，包括芒果香草奶凍、紅桑子朱古力慕絲蛋糕等！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
