北角有咩食有咩玩？等小編幫你plan埋北角一日遊行程，帶你去玩足一日啦！首先帶你去食馳名嘅利強記北角雞蛋仔，然後再去炮台山簡約舒適Cafe嘆特式美食及咖啡，坐埋叮叮慢遊北角，最後襯黃昏時段緊去睇日落，陽光落幕，結束一日嘅行程，輕鬆又浪漫，快啲睇埋落去啦！
圖片來源：SAUCE編輯部、Enthusiasm cafe、openrice、網路圖片｜撰文：Claudia
一日遊第一站 – 強記北角雞蛋仔
首先第一站梗係要去食馳名嘅利強記北角雞蛋仔，雞蛋仔係香港人嘅集體回憶，相信唔會有人冇食過！流傳到依家有五花八門嘅味道，但係利強記北角雞蛋仔依然忠於傳統，淨係製作原味雞蛋仔！不過千祈唔好睇少佢哋，佢哋曾經入圍16同17年米芝蓮街頭小食推介，由1991年開業起到依家已經有好多間分店，遍及港九新界，今次去北角呢間總店，長期有人龍，小編都等咗足足20分鐘！雖然等咗咁耐，不過即叫即整嘅雞蛋仔真係好好食，嗰皮好脆外脆內軟，蛋香十足！
【INFO】 利強記北角雞蛋仔 Lee Keung Kee North Point Egg Ball 地址：香港北角英皇道492號（北角站靠近B3出口，步行約3分鐘） 營業時間：7:00~23:00
一日遊第二站 – 摩洛哥風情Cafe
淨係食雞蛋仔點夠飽啊！加上等雞蛋仔企咗咁耐，梗係要搵個地方坐下chill下啦！所以第二站小編就帶你哋嚟到呢間滿滿摩洛哥風情嘅Enthusiasm cafe！成間Cafe主打蜜桃粉色裝潢，配埋圓拱型嘅摩洛哥特色牆，打卡一流啊！店舖設施多數為籐椅同木櫈，搭配花紋抱枕，如果鍾意享受陽光嘅朋友仔，呢到仲有室外座位畀你揀。
Cafe主打輕食，例如煙三文魚牛油果沙律（$68）、煙三文魚溫泉蛋配牛油貝果（$68）、煙肉溫泉蛋配牛油貝果（$58）等都值得一試㗎！Cafe有提供早餐、中午同埋下午茶套餐，仲有多款甜品，價格又親民，無論係同朋友坐低休息下，定係畀佢嘅摩洛哥特色牆吸引過嚟都不妨一試啊！
【INFO】 Enthusiasm cafe 地址：北角丹拿道60號丹桂閣1A號舖 營業時間： 星期二至五：11:30 - 18:30 星期六至日：09:30 - 18:30
一日遊第三站 – 搭叮叮
喺Cafe休息咗咁耐，養精蓄銳準備出發去最後一站！既然嚟到港島區梗係要搭叮叮啦，喺Enthusiasm cafe行大概4分鐘就可以到電照街嘅叮叮站，網上有得睇時間行車表，話埋畀你知仲有幾耐有車，咁就可以預時間行過去啦！最後一站目的地係東岸公園，所以我哋今次要搭嘅叮叮係西行線往堅尼地城方向，喺木星街落車。
叮叮絕對算得上可以香港情懷，至今超過百年歷史，坐上去吹住自然風，望住條街，真係好悠閒，特別係依家嘅巴士都變晒冷氣巴士，冇得吹風啦！同巴士好唔同嘅係，大家記得搭叮叮係喺後門上車、前門下車，落車先畀錢，可以用八達通或者現金，現金不設找續㗎！
【INFO】
《香港電車》
時間行車表：https://bit.ly/3OSlETi
車費: 成人$3.00 小童 (三歲至十二歲以下)$1.50 長者 (六十五歲或以上)$1.30
一日遊第四站 – 炮台山東岸公園
作為我哋北角一日遊嘅最後一站當然喺為咗個維港景日落啦！東岸公園第一期喺上年開放之後都變成唔少市民嘅打卡熱點，最受歡迎緊係佢個360米嘅海濱長廊，可以360度睇海景，最適合一家大細吹住海風漫步！場仲有多個主題同公共設施，佔地有成一萬呎。大家趁住日落時段去首條開放畀公眾嘅防波堤，呢到喺日落嘅影最正影相位，真喺點影都靚㗎！
【INFO】 東岸公園主題區（第一期） 地點：銅鑼灣屈臣道（從炮台山港鐵站經油街轉入電器道，至屈臣道街尾即可到達，步程只需約七分鐘） 開放時間：24小時
————————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
