元朗河背水塘｜好多人去打卡嘅港版嵐山竹林，位於元朗河背水塘家樂徑，同時亦喺元朗大欖郊野公園。河背水塘係香港面積最細嘅灌溉水塘，同時係香港罕見嘅S形堤壩水塘，好特別！所以今次全段路程都唔算長，而且環境清幽，圍繞河背水塘行一圈都只係需要1小時，路程平坦較少斜路，啱晒一家大細去郊遊啊！
圖片來源：IG@joyce.h0314、@fatfatpeoplevivian、@vincy0408｜撰文：Athena
路線全長約3公里，大約需要1小時就可以輕鬆行完。首先由河背村出發，行大約20分鐘嘅石屎斜路，就會到達河背水塘家樂徑門口。過程唔算好辛苦，適合新手入門嘅行山者。行到上去，便已行完整段路程最辛苦的一段路。但沿路景觀開揚，可以望到元朗錦田平原一帶，都唔算太悶。
行到上去，會見到河背燒烤場同埋營地，之後就向右行，開始進入河背水塘家樂徑。呢度嘅山徑非常清晰，並且有指示牌同路標，令人好容易就能搵到正確嘅路線。河背水塘家樂徑係圍繞水塘走一圈，主要都係平路，輕鬆易行，而且有樹陰，可以遮擋太陽。路程中不時會有開揚嘅水塘景，可以飽覽整個河背水塘，亦可隨時影相打卡！大約行30分鐘，就行完整條家樂徑。
行到河背水塘家樂徑嘅中段，就會去到呢度嘅重中之重「港版嵐山」小竹林！見到呢一段茂密嘅竹林，真係好似去咗日本京都嵐山啊～當然要留低影多幾張相，打吓卡啦！
其中仲有一段路係有梯級，冇人嘅話仲可以坐喺度影相，擺吓唔同嘅姿勢，就算企喺度影都好有特色。竹林再配埋陽光嘅照射，影相真係好靚！
之後亦會經過清幽嘅小橋流水同埋小瀑布，都係熱門打卡位嚟㗎～行多一陣，就會到達終點河背水塘。S型堤壩夠晒特別，湖面平靜廣闊，一路望住會覺得好治癒，係個非常適合放鬆心情嘅地方！唔講唔知，原來河背水塘於1998年曾經入選為漁農署郊野公園十大自然風景之一。休息一下，欣賞湖水同周圍嘅景色，然後原路折返。
建議大家攜帶充足嘅水，並穿著合適嘅行山裝備。行山時要注意安全，遵循指示牌同路標，唔好離開指定路線。記緊愛護環境，收拾自己帶嚟嘅垃圾，愛惜大自然。喺行山嘅過程中，可以與自然融為一體，感受大自然嘅美麗同力量，令自己放鬆心情，擁抱大自然嘅美好。
新手入門行山嘅你哋，非常推薦由呢條輕鬆嘅元朗河背水塘行山路線入手。感受一下行山可以逃離城市嘅喧囂感覺，享受大自然嘅寧靜。同時可以放鬆心情，欣賞大自然嘅美好，更親近大自然。
河背村＞河背營地＞河背水塘家樂徑＞竹林隧道＞繞水塘一圈折返
難度︰★☆☆☆☆
全長︰約3公里
時間︰大約1小時
交通方式： 1) 由元朗泰衡街小巴總站乘坐71號小巴，於河背村總站落車 或 2) 於錦上路西鐵站C出口對出小巴站，轉乘71或71A小巴， 於河背村中途站落車，沿馬路斜坡行約30分鐘至河背水塘家樂徑。
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
