一年容易又中秋，係時候諗吓今年去邊賞月喇！想約埋班親朋戚友一齊慶祝，但留喺屋企又怕悶、出街又驚太多人，所以想搵個靜靜地嘅地方共度佳節？編輯今次有好介紹！快啲睇吓以下6個中秋好去處，預早計劃好中秋節嘅行程啦！
圖片來源：官方圖片、Facebook@D18 – 觀塘友 – Dorothy Chak、Instagram@bowingkwchan、Instagram@giyaaa_z、Trip.com@Ruilin｜撰文：Tiffany
中秋賞月地點 | 1. 茶果嶺海濱公園
茶果嶺海濱公園係2023年最新落成嘅休憩空間，佔地達1.8萬平方米，絕對係大家中秋賞月之選！呢個公園坐擁維港、啟德郵輪碼頭美景，仲有大量健體設施、兒童遊樂設施、傷健共融遊樂設施，而且仲有一大片草地、枱枱櫈櫈等，更係寵物友善公園，啱晒一家大細，帶埋主子嚟賞月呀！
公園內總共有超過60組遊樂設施，例如渠管逃宮、攀爬地貌、鞦證、滑梯、樹屋、兒童跑步徑等等，最啱小朋友嚟探索大自然同埋放電！大人既可以陪玩，又可以坐喺草地靜靜地睇住小朋友玩，仲可以一邊享受維港靚景，一邊賞月，真係諗起都正阿！
地址：茶果嶺偉樂街西北面
交通方法：從觀塘渡輪碼頭／觀塘港鐵站B1出口／藍田港鐵站D1出口步行即達
中秋賞月地點 | 2. 屯赤隧道浩和街
屯赤隧道附近嘅浩和街，因為充滿異國風情，令人有種一秒置身外國嘅感覺，所以有「港版邁亞密」之稱。呢到除咗好值得大家嚟影相打卡、野餐chill吓之外，原來仲係一個賞月好地方！
呢到有一大片草地，仲有一條超長嘅沿海堤壩、一整排棕櫚樹，平時嚟打卡已經夠晒靚。而因為附近冇高樓大廈，天空可以話係一望無際、視野開揚，所以想喺中秋節望到大月亮，絕對唔係難事。同摯愛一齊歎呢個靚景，都咪話唔爽！
地址：新界屯門浩和街
交通方法：屯門港鐵站乘搭K52巴士於「望后石」站下車，再步行至浩和街
中秋賞月地點 | 3. 荃灣汀九灣泳灘
通常賞月都會揀去公園，有冇諗過其實沙灘都係一個好選擇？大家不妨可以考慮吓荃灣汀九灣泳灘。汀九灣係香港少數集沙灘、草地於一身嘅泳灘，可以一次過滿足你兩個願望，啱晒選擇困難症嘅朋友仔。無論攤喺幼沙、定係草地上休息、食月餅、賞月都好舒服！附近有少量泊車位，落車行大約5分鐘就到啦。
汀九橋更係世界首條、亦係全球最長嘅三塔式斜拉索橋，由德國嘅工程師設計，唔少人會特登去汀九灣泳灘一睹大橋風采！而且呢到附近冇高樓大廈嘅遮擋，所以海景、汀九橋，同埋月圓美景都清晰可見，喺到靜靜地chill返個中秋節唔錯㗎！
地址：青山公路汀九段11咪
交通方法：乘搭53／234B巴士於「汀九」站下車，步行往海邊方向至泳灘
中秋賞月地點 | 4. 西貢塔門
覺得以上介紹嘅地方都唔夠遠離煩囂？咁西貢塔門可能會係你嘅中秋之選。塔門係位於西貢以北嘅一個小島嶼，坐擁360度無敵大海景，仲有超大片草地、好多唔同形狀嘅岩石，絕對係大家親親大自然嘅首選。由於小島嘅光害較少，加上天空一望無際，喺到睇月光一定更加靚。仲可以一邊聽住海浪聲添，夠晒浪漫！
除咗賞月之外，塔門仲有一座接近400年歷史嘅天后古廟。大家一場嚟到，不妨去古廟參拜吓，祈求順景安康，真正「中秋節快樂」！
地址：西貢塔門 交通方法： 1. 從西貢市中心乘搭94巴士於「黃石碼頭」總站下車，再轉乘往塔門街渡 2. 從大學港鐵站乘搭272A／272K巴士於「馬料水公眾碼頭」站下車，再轉乘往塔門街渡
中秋賞月地點 | 5. 大埔小白鷺餐廳
公園、沙灘、島嶼都唔啱你？咁餐廳會唔會係你嘅心水？位於大埔嘅小白鷺餐廳，因為坐落喺優美湖水旁，所以一向都係假日嘅打卡好去處。而今年中秋仲更加特別，白鷺湖將會化身許願湖，湖上將有多個中秋打卡裝飾，例如10米高嘅巨型月亮、5米高嘅兔仔燈籠、白夜星辰太空裝置、賞月小船等等，啱晒鍾意影相打卡嘅朋友仔！
而白鷺湖旁亦有兩間餐廳，分別提供中菜及西餐，嚟到除咗可以欣賞湖景、中秋打卡裝飾，同埋明月之外，仲可以醫肚，大飽眼福、口福呀！
地址：大埔大埔滘紅林路2號白鷺湖互動中心地下B號舖 交通方法： 1. 從大埔墟港鐵站步行至南運路，轉乘LAKE HOUSE免費穿梭巴士（穿梭巴士時間表：https://bitly.ws/UTJB） 2. 乘搭72／72A／73A／74A巴士於「翡翠花園」或「南苑」站下車，步行5至10分鐘 燈飾開放日期及時間：2023年9月21日至10月2日 18:30 - 23:30 收費：$50
中秋賞月地點 | 6. 觀塘上配水庫花園
觀塘上配水庫花園，又名沈雲山山頂，無區內街坊私藏嘅好去處。花園位於觀塘佐敦谷山上，最啱就係喺到睇日出或日落，仲有人會特登喺朝早過嚟晨運㗎。呢個地方最適合愛行山人士嚟賞月，因為行完一段斜路，以及接近700級樓梯之後，就可以一邊欣賞美景，一邊呼吸清新嘅空氣。而喺山頂賞月，感覺上同月亮嘅距離係最近，所以月亮都會顯得特別大、特別圓㗎！
上山嘅某啲路段會有少少陡峭，所以大家出發賞月前都要做足準備、量力而為，特別係行動不便人士、輪椅人士。
地址：九龍觀塘佐敦谷
交通方法：乘搭巴士（23, 23M, 26, 26M, 27, 29M, 42, 619, 11C, 11X, 13D, 13X, 28B, 95M）在順利邨、順天邨或聯合醫院起步
