驅蚊方法 | 一年容易又夏天！炎炎夏日，最好就係進行戶外活動。但成日都俾蚊蟲騷擾，甚至被蚊咬到手腳痕癢，影響晒你玩嘅心情？有時夜晚瞓覺仲會俾蚊嘈醒，搞到無覺好瞓？編輯為你整合咗8個驅蚊方法，當中更包括多種天然材料，絕對無化學成份，連嬰幼兒都用得！
圖片來源：網絡圖片、河東堂藥行、HKTVmall ｜撰文：Tiffany
夏天驅蚊法| 1. 曬乾嘅橙皮、柚皮、柑皮、檸檬皮
原來只要將橙皮、柚子皮、柑皮、檸檬皮或桔皮曬乾，放喺屋企嘅暗角位，就有驅蚊嘅作用。如果想效果更好，或者喺戶外靜態活動時使用，將乾果皮微微燒著的話，會更有效驅蚊！將乾果皮放喺鐵兜、鐵網等器皿中，然後輕輕加熱就可以，不過處理火種時，要加倍小心！
夏天驅蚊法| 2. 自製中藥驅蚊包
驚市面上買嘅蚊怕水、防蚊產品會有化學成份，對小朋友有影響？咁就可以試吓自己整中藥驅蚊包！材料包括丁香、艾草、白芷、蘇葉、薄荷、石菖蒲、藿香、金銀花（各10克）。將以上呢8種藥材打碎、放於小布包內後綁實，就已經係非常有用嘅驅蚊包。無論放喺書枱、床頭、甚至帶喺身，都一樣無問題。
夏天驅蚊法| 3. 燃燒艾草
艾草除咗可以放入中藥驅蚊包之外，仲可以獨立使用，同樣有驅蚊防蟲嘅功效。將少量艾草放喺可燃點火種嘅器皿內輕輕燃燒，已經可以趕走蚊蟲。而一般嘅中藥舖已經可以買到艾草，非常方便。記得燃點火種時要小心呀！
夏天驅蚊法| 4. 燃點咖啡渣 / 茶葉渣
除咗果皮、中藥之外，原來風乾後嘅咖啡渣、茶葉渣都係驅蚊嘅好幫手！蚊蟲好抗拒咖啡、茶葉嘅味道，所以只要將呢兩種天然殘渣放入器皿內燃燒，就能達至驅蚊功效。
夏天驅蚊法| 5. 擺放防蚊植物
如果唔想用點燃火種嘅方法，又或者屋企有小朋友擔心唔安全，就可以選擇擺放防蚊植物。市面上有啲植物，本身帶有一啲可以令蚊蟲聞到即刻掉頭走嘅獨特氣味，同時對人體無害，例如迷迭香、胡椒薄荷、香茅、九層塔、薰衣草等等。既防蚊，又可以喺煮飯時用作調味，仲可以美化家居，一舉三得！
夏天驅蚊法| 6. 植物精油
除咗擺放防蚊植物之外，仲可以選擇用以防蚊植物整成嘅植物精油，例如檸檬尤加利精油、薰衣草精油、天竺葵精油、檸檬草精油、貓薄荷精油等等。不過要特別留意，絕對唔可以將純精油直接搽喺皮膚上，必須要稀釋咗先可以用，如果唔係可能會灼傷皮膚！稀釋後可以輕輕搽喺手腳皮膚上，又或者洗衫時落幾滴都得。
夏天驅蚊法| 7. 用梘液／洗衣粉自製「殺蚊水」
原來只要將家用嘅梘液或洗衣粉與水混合、搓出泡沬，然後將盆水放喺家中角落，混合物所散發嘅香味，可以吸引蚊子，令佢哋誤以為水中有食物而產卵。而水中嘅氧氣混合梘液或洗衣粉後，會產生化學反應，可以令蚊子嘅幼蟲缺氧死亡，杜絕蚊子不斷滋生！記得要定期換水呀。
夏天驅蚊法| 8. 選用物理性防蚊／滅蚊裝置
如果屋企成日都有蚊，可能要用到防蚊紗窗、防蚊網、防蚊窗簾、蚊帳呢類型更加徹底嘅方法。又或者可以選用一般家品店可以買到嘅滅蚊裝置，例如滅蚊燈。原理都係透過滅蚊器嘅光線、熱力吸引蚊子，令蚊子撲過去之後被熱死。但記得要定期打開裝置，清理蚊子屍體！
