身體檢查津貼 | 7大政府資助身體檢查、長者免費洗牙+$110健康檢查

身體檢查津貼 | 定期做身體檢查先可以有助預防及發現疾病，不過由於私家醫院嘅收費較貴，可能有好多人會因此而卻步。但原來政府一直都有為市民提供醫療津貼，收費亦都相對可以負擔，即刻睇睇政府7大醫療資助項目啦！

圖片來源： Freepik | 撰文：Hedy

身體檢查津貼 | 1. 慢性疾病共同治理先導計劃

為提供便捷嘅糖尿病以及高血壓篩查服務，政府推出「慢性疾病共同治理先導計劃」，為計劃嘅參加者度身訂造健康管理方案，控制慢性疾病風險因素。家庭醫生將會進行評估及安排篩查化驗，並會轉介到指定醫務化驗所抽血，其後便會解釋化驗報告及診斷結果，安排合適嘅健康管理方案。患有高血壓或糖尿病嘅參加者，每年都會由家庭醫生提供最多六次受資助診症，而血糖偏高者則會獲提供每年最多四次嘅受資助診症，及提供所需藥物。

於篩查階段中，政府會就篩查診症、相關化驗及檢查提供一次性$196嘅資助，參加者只需支付$120共付額。當開始治療階段嘅時候，每次只需支付家庭醫生於參加計劃時所釐定嘅共付額，政府建議為$150，可獲取特定藥物名單內涵蓋嘅藥物。

【INFO】
申請資格：
1. 45歲或以上香港居民
2. 沒有已知嘅糖尿病或高血壓

申請方法：
1. 經網上預約 
2. 可前往地區康健中心/站登記成為會員，加入「醫健通」，報名參加計劃

身體檢查津貼 | 2. 大腸癌篩查計劃

大腸癌為本港第二最常見嘅癌症，亦係最常見嘅致命癌症之一。政府推出「大腸癌篩查計劃」資助50至75歲及冇症狀嘅香港居民喺私營界別接受篩查服務，預防大腸癌。參加者將會首先進行大便隱血測試，檢驗係咪有肉眼睇唔到嘅微量血液。如果有就會安排接受大腸鏡檢查及切除有可能出現嘅大腸瘜肉，避免演變成癌症。

大腸癌篩查計劃下，參加者每次診症獲政府資助280港元，包括大便免疫化學測試結果呈陽性後由基層醫療醫生提供第二次診症。如果需要切除瘜肉，會獲定額資助8,500港元，若無需切除瘜肉，會獲定額資助7,800港元。大腸鏡醫生喺提供大腸鏡檢查基本服務時，可向參加者收取不多於1,000港元嘅額外費用。

【INFO】
申請資格：
1. 年滿50至75歲
2. 持香港身份證或豁免登記證明書
3. 已加入電子健康紀錄互通系統
4. 冇大腸癌症狀、有高風險因素或指定期限內曾進行大腸癌篩查或檢查嘅人士

申請方法：
1. 合資格市民可約見基層醫療醫生
2. 簽署同意書後即可獲發測試包
3. 自行採集樣本後再交到指定收集點即可

身體檢查津貼 | 3. 婦女健康服務

衞生署家庭健康服務為64歲或以下婦女提供婦女健康服務，將會提供健康評估，當中包括量度身高、體重、腰圍、血壓，並會提供血液檢驗，大腸癌、子宮頸及乳癌篩查 （視乎個別需要及經醫生評估後而定），合資格人士每年只需支付$310。若然需進行乳房X光造影檢查，每次收費則為$225。

【INFO】
申請資格：
1. 64歲或以下婦女

申請方法：
1. 現行避孕的女性(包括使用避孕套或安全期等避孕措施)毋須預約，前往節育指導診所接受護士評估服務。
2. 非避孕的女性(包括沒有使用任何避孕措施、已停經、已結紮)須預約見醫生，提交婦女健康服務的預約申請或致電家計會診所服務熱線25722222

身體檢查津貼 | 4. 長者牙科服務

政府關愛基金為長者提供全面牙科服務，除咗有口腔檢查、洗牙、補牙、脫牙、X光檢查、移除牙橋同杜牙根服務之外，更可免費鑲活動假牙。

【INFO】
申請資格：
1. 最近連續3個月領取「長者高額生活津貼」
2. 從未受惠於關愛基金資助嘅長者牙科服務及衞生署「長者牙科外展服務計劃」
3. 75歲或以上於5年前或更早之前在項目下曾接受牙科服務嘅長者（只適用於「第二次服務申請人」）
4. 已失去全部或部分牙齒或患有牙疾
5. 獲評估為需要並適合接受鑲活動假牙及其他相關嘅牙科診療服務

申請方法：
如欲申請關愛基金的牙科服務資助， 申請人需帶同以下文件親身到地區服務單位申請
1. 香港身份證正本
2. 最近連續3個月經由銀行戶口每月存入「長者生活津貼」金額的文件（銀行存摺或銀行月結單等）
3. 載有住址嘅文件

身體檢查津貼 | 5. 長者健康服務

衞生署喺全港設有18間長者健康中心，65歲或以上嘅長者均可申請成為會員。由於申請服務嘅長者眾多，所以新申請人士一般需輪候一段頗長嘅時間先可以成為會員。若然成功成為會員後，便可用平價接受健康檢查及治療等。每次接受注射同敷藥只需$19，而接受健康檢查則只需$110，超平價！

【INFO】
申請資格：
1. 65歲或以上嘅長者

申請方法：
1. 網上申請 或
2. 親身或委派親友到其中一間長者健康中心登記 或
3. 填寫申請表格後，連同香港身分證或其他身分證明文件副本，傳真或郵寄到其中一間長者健康中心。

身體檢查津貼 | 6. 子宮頸普查計劃

子宮頸癌係女性中常見嘅癌症，政府同醫護界別合作推廣子宮頸篩查，鼓勵婦女定期進行子宮頸篩查，以預防子宮頸癌。子宮頸篩查是為一般冇症狀嘅婦女而設，對於25至64歲而曾有性經驗嘅婦女，都應該定期接受子宮頸篩查，符合資格人士只需$100。

【INFO】
申請資格：
1. 持香港身份證人士
2. 25歲或以上、曾有性行為
3. 從未接受全子宮切除手術

申請方法：
1. 致電預約熱線 31666631

身體檢查津貼 | 7. 乙型肝炎評估

香港約有十分之一人口為乙型肝炎帶菌者，乙型肝炎係由過濾性病毒引致嘅疾病，病毒會破壞肝臟細胞及損害肝功能，部份受感染人士會成為終身乙型肝炎帶菌者，日後更有較高風險發展為慢性肝炎、肝硬化，甚至肝癌。帶菌者應該定期進行血液化驗同造影檢查，監察肝臟情況，家計會「乙型肝炎評估診所」為乙型肝炎帶菌者提供化驗和跟進服務。

【INFO】
申請方法：
1. 服務必須經由內部轉介及預約，可致電29197721查詢及預約

——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk