大家試過一到夜晚就好精神，瞓又瞓唔著？對於失眠人士嚟講，嚴重甚至要食藥先可以瞓到覺，但長期食藥又會傷害身體，真係一件幾困擾嘅事！早前日本Twitter上瘋傳「 愛麗絲睡眠法 」，唔少網友跟住做之後，成功改善失眠嘅問題，受失眠困擾嘅人士不妨一試！
圖片來源：網絡圖片、Twitter@onoderasan001｜撰文：Sharon
「愛麗絲睡眠法」由日本漫畫家おのでらさん發明，因為一直受失眠問題困擾，大大影響佢嘅日常生活，自從發明「愛麗絲睡眠法」後，睡眠質素得以改善，甚至10分鐘內就可以入睡添！於是他透過漫畫將呢個方法同大家分享，唔少網友睇完大讚非常實用！仲轉載超過10萬次，一齊嚟睇睇呢個方法有幾神奇啦！
步驟1
喺床上盤腿坐低，身體盡量唔好郁動！
步驟2
合埋雙眼，想像自己已經瞓著咗！
步驟3
保持1分鐘唔好思考同諗其他嘢，呢個Step係最重要，亦係最困難嘅一步！人嘅下意識通常會喺20秒後出現畫面，如果腦海仲係一片空白，大家可以專心只諗一樣嘢、或者一件事。
步驟4
無論腦海出現任何事物，只要集中啱啱出現嘅同一樣嘢就可以，唔好諗其他。
步驟5
集中諗一件事後，突然醒過來，就好似平時發夢回神一樣，呢個時候大家就可以躺睡準備瞓覺。
步驟6
瞓喺張床後，再重複步驟1至步驟5，直至入睡為止！
唔少網友跟住「愛麗絲睡眠法」去做真係成功瞓得著，甚至有人做完一個星期後，瞓著嘅時間越嚟越快，成功改善失眠問題！至於呢個方法咁有效，原來係因為直接瞓落床時，會在意枕頭同張被等等，身體會扭動，所以一開始唔直接躺瞓就更容易入睡。但呢個方法都係根據每個人嘅體質，未必人人有效，但成日瞓唔著，又有失眠嘅朋友值得一試！
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
