消委會行李箱 | 對於經常去旅行或者出差嘅朋友嚟講，一個耐用防撞嘅行李喼係非常重要，唔單止能夠妥善收納及保護個人物品，仲可以節省搬運行李嘅力氣同時間。消委會最近實測咗15款常見品牌嘅中型硬身行李喼，當中7款行李喼質素參差，而價錢昂貴嘅名牌行李喼亦未必係最實用，買錯喼更可能會增加致癌嘅風險！小編為大家整合咗行李喼評測報告內容，仲會推薦四大獲得4.5高分嘅行李喼品牌，即刻睇內文啦！

圖片來源：消費委員會、Muji、V-ROOX-Studio、Victorinox、LOJEL、ECHOLAC

今次測試嘅產品包括15款中型硬身行李喼，高度約24吋至28吋，售價由$730至$8,200不等，樣本外殼分別由聚碳酸酯（PC）、聚丙烯（PP）或苯乙烯共聚物（ABS樹脂）等膠料所製造，並設有拉鏈式開關及TSA密碼鎖。

圖片來源：消費委員會

延伸閱讀: 行李箱推薦2023 | 7款人氣品牌遂個睇！Samsonite、無印良品、LOJEL⋯ 點揀好？

消委會行李喼評測｜Muji性價比最高！平價款可比美$8200名牌款？

消委會對15個行李喼樣本進行達10個測試，包括針對車輪嘅路面測試、樓梯測試；針對手挽及拉桿嘅動態衝擊測試、拉桿伸縮測試、提放測試；針對喼身嘅耐跌撞測試、耐壓測試、防水測試；反覆開關轉動密碼鎖，以及對拉鏈拉扣進行循環開合、拉力測試。當中四款行李喼品牌獲得4.5高分，性價比最高為Muji行李箱連滑輪固定器75L，售價為$1,980，屬於中等價位，基本上所有標準，例如耐跌防撞、拉桿強度、路面行走時嘅順滑程度等，都獲得最高分。

圖片來源：Muji

其餘3款4.5分品牌為Victorinox、ECHOLAC、LOJEL，價錢為$2,000至$6,000不等，產地同樣來自中國。如果預算有限，可考慮獲得3.5分嘅V-ROOX Studio，價錢只需$998，但質素可比美捷克製造嘅$8200名牌款！

圖片來源：ECHOLAC
圖片來源：Victorinox
圖片來源：LOJEL
圖片來源：V-ROOX-Studio

消委會行李喼評測｜喼身耐用度測試 近半行李喼樣本質素未如理想

去旅行時少不了要拎住行李喼上落樓梯，有啲人可能會貪方便，直接將行李喼一級一級咁拖行，所以行李喼身及拉桿必須有足夠強度承受撞擊同震動。當中3款行李喼樣本經過115級及45級樓梯測試後，拉桿已開始變形，未能正常伸縮，喼身與車輪接合位置甚至出現破裂。

另外唔少人去旅行時都會購買一大堆戰利品，所以行李喼承載重物時嘅行走能力亦同樣重要。當中7款行李喼樣本於接受長距離拖行嘅路面測試後，出現車輪脫落、喼身破裂、拉桿折斷或手柄鬆脫等情況，未符合安全規格。如果去旅行時遇到呢種情況，真係好影響行程，仲可能要另外花費金錢購買行李喼！

至於乘搭飛機前，都必須將中型行李喼寄艙，所以無法避免一定程度嘅擠壓或碰撞。耐壓測試中將150公斤重物平均放置於空喼喼身上1小時，當中3款樣本出現輕微變形、凹陷、甚至拉鏈保護件斷裂等情況，可能會令行李散落一地，咁就好麻煩喇！

圖片來源：消費委員會

消委會行李喼評測｜喼身物料不容忽視 買錯喼會增加致癌風險！

除咗喼身硬件，好多人都會忽視行李喼所使用嘅物料，部份行李喼手挽或拉桿手柄會含有多環芳香烴(PAHs)等化學物質，若超出用量標準，可能會增加致癌風險，或者降低生殖能力，

雖然香港現時未有就一般消費品嘅塑化劑及PAHs含量設定上限，但當中1款行李喼樣本嘅手挽固定件及拉桿手柄被檢出多種PAHs，如果人體長時間接觸塑化劑，對人體健康及發育嘅影響甚大，所以每次接觸行李喼手挽或拉桿手柄後，記得盡快用溫和洗手液清潔雙手，而買喼前亦要睇清楚行李喼嘅物料及化學成份！

行李喼使用及保養貼士

正所謂一分錢一分貨，性價比高嘅行李喼至少都需要千幾蚊，雖然每款行李喼品牌都有唔同嘅保養服務，例如保用期內免費維修或更換零件，但大家都要注意以下事項，好好保護你嘅行李喼，咁就唔需要經常花錢更換行李喼喇！

  1. 唔好坐係喼上面，以免對喼身、拉桿及車輪造成壓力，引致損壞。
  2. 提起行李喼時要使用手挽，唔好直接提起拉桿，引致拉桿損壞。
  3. 收拾行李時宜將重物放係喼嘅底部，亦要留意盛載重量，以免行李喼因重心不穩而翻倒爆開。
  4. 清潔行李喼外殼及車輪時可用乾布沾清水輕拭，或者沾少許梘液去除污物，避免使用強力清潔劑。
  5. 唔好將行李喼收藏係潮濕或陽光直接照射地方。
  6. 利用防塵套阻隔灰塵或污物，避免黏附係行李喼上，特別係車輪或拉桿之間嘅間隔位。

消委會行李喼評測｜15款中型硬身行李喼 評分逐個睇！

圖片來源：消費委員會

4.5分：

  • Muji $1,980｜產地：中國 
  • Victorinox $5,890｜產地：中國 
  • ECHOLAC $2,100｜產地：中國 
  • LOJEL $2,700｜產地：中國 

延伸閱讀: 旅行用品 | 日系行李箱旗艦店LOJEL Lab尖沙咀開幕！現場維修即日可取 / 免費刻名

4分：

  • Samsonite $5,380｜產地：歐洲 
  • TUMI $7,800｜產地：印尼

3.5分：

  • American Tourister $2,180｜產地：中國
  • V-ROOX Studio $998｜產地：/
  • RIMOWA $8,200｜產地：捷克 

3分：

  • Antler $1,098｜產地：中國
  • Delsey Paris $2,550｜產地：中國

2.5分：

  • ACE $2,180｜產地：中國

2分：

  • harajuku $730｜產地：/
  • ELLE $989｜產地：/
  • Hallmark Design Collection $1,139｜產地：/

——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/