玩轉腦朋友2電影 | 大家仲記唔記得《玩轉腦朋友》入面嘅5位腦朋友，阿樂、阿愁、阿驚、阿燥以及阿憎呢？籌備9年嘅續集將會加入更多情緒角色，即刻搶先睇預告，等大家學識接納自己嘅情緒！當中更有9大看點大家必定要知，記得要睇埋彩蛋先走！而今日終於都正式上映喇，即刻睇睇全港戲院嘅場次！
圖片來源：官方圖片 | 撰文：Hedy
玩轉腦朋友2看點 | 1. 設有EMO小劇場 心理測驗
《玩轉腦朋友2》電影準備正式上映，早前台灣就推出EMO小劇場心理測驗，等大家測試自己大腦入面嘅情緒主角係邊個～通過簡單9條嘅情景題再加上可愛嘅動畫同聲音配樂，就可以搵到你嘅情緒主角！測驗將會得出9種情緒主角，仲有機會出現隱藏版色色～唔知大家又覺得準唔準呢！
【INFO】 《EMO小劇場心理測驗》 網站：https://bit.ly/4bqMT3k
玩轉腦朋友2看點 | 2. 新增4位情緒角色
迪士尼同Pixar將會喺今個暑假推出《玩轉腦朋友2》，今年除咗可以繼續見到阿樂、阿愁、阿驚、阿燥同阿憎5位腦朋友之外。主角Riley踏入13歲後，正值青春期，情緒都變得更為複雜。大腦將會出現全新情緒角色，包括超焦慮嘅阿焦、最鍾意羨慕人嘅阿羨、勁厭世嘅阿厭以及成日勁老尷嘅阿尷登場，Riley又會點樣同呢班腦朋友相處呢～
玩轉腦朋友2看點 | 3. 劇情簡介
《玩轉腦朋友》電影推出後，相信感動唔少人，令大家都學識擁抱同接納自己嘅情緒。《玩轉腦朋友》更贏得奧斯卡同金球獎最佳動畫殊榮，籌備9年終於都等到續集啦！本來5位腦朋友一早已經將「大腦總部」打理得井井有條，一切運作順利。突然間有日響起警號，大隊清拆隊全面進場，將大腦總部拆改得面目全非，原來係為咗迎接一大班新登場嘅腦朋友。阿焦帶同六箱行李登場，仲有阿羨、阿厭以及阿尷湧現。13歲嘅Riley正值青春期，大腦總部控制台亦都新增咗唔少按鈕，將會為Riley帶嚟翻天覆地嘅轉變！
玩轉腦朋友2看點 | 4. 預告搶先睇
玩轉腦朋友2看點 | 5. 明星配音
續集將會出現9位腦朋友，當中包括由蘇雅琳Ivy So聲演嘅阿樂、王菀之聲演嘅阿愁、阿正聲演嘅阿焦、許紹雄聲演嘅阿燥、麗英聲演嘅阿羡、張蔓姿聲演嘅阿厭、楊詩敏(蝦頭) 聲演嘅阿憎、蔣志光聲演嘅阿驚以及魏浚笙Jeffrey聲演嘅阿尷。
玩轉腦朋友2看點 | 6. 腦朋友陪你睇戲
相信有唔少人都已經睇咗優先場，喺香港9間英皇戲院都會設有一個主題影廳，院廳入面全部都換上咗9位腦朋友嘅主題椅套佈置，陪大家沉浸式睇戲，開場前大家仲可以同背後開腦朋友打卡，不過大家記得唔好拎走呀！而尖沙咀iSQUARE英皇戲院亦設有多個打卡位，可以同9位主角們一齊坐上鞦韆打卡！
玩轉腦朋友2看點 | 7. 結尾有彩蛋
睇完玩轉腦朋友之後，大家都一定要記得睇埋最後嘅彩蛋，雖然彩蛋好短，不過都值得大家睇睇～
玩轉腦朋友2看點 | 8. 時代廣場打卡
銅鑼灣時代廣場亦都為《玩轉腦朋友2》建造出Emotion Playpark，等大家可以漫遊喺9大情緒為主題嘅遊樂設施入面打卡！除咗9位腦朋友齊集之外，時代廣場2樓中庭亦都係大腦總部控制室以及腦朋友睡房重地，等大家都可以一齊行入全新出現嘅「自我意識」區域，一齊感受大腦所擁有嘅情緒。大家仲可以去到控制台前面體驗情緒專員日常工作視覺，相信絕對會令你感到新奇有趣！
玩轉腦朋友2看點 | 9. 上映日期
《玩轉腦朋友2》將會喺今年7月11日於香港上映，由5種情緒新增成為9種情緒，Riley嘅大腦入面又會掀起啲咩風波呢，有興趣嘅朋友就記得要留意啦～
【INFO】 《玩轉腦朋友2》 日期：2024年7月11日 電影場次：https://bit.ly/4bSFwRX
延伸閱讀：【《玩轉腦朋友2》9位腦朋友齊集銅鑼灣、23個1:1人偶造型+即睇有咩必買！】
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
