日落好去處 | 香港有唔少地方都可以欣賞到日落晚霞嘅美景，唔知你又已經發掘到幾多呢？無論你想喺沙灘上漫步、欣賞無敵大海景或者享受大自然之餘，同時多角度飽覽夕陽，即睇以下10個地方，到到都可以影到又圓又大嘅「鹹蛋黃」，仲有港版天空之鏡！即刻save定同閨蜜、另一半又或者影相發燒友一齊去打卡啦！

圖片來源：Instagram @connor.hiker_、@siufarb、@jessica_lkw、@tim.foto_、@garyho711、@good.time.old.time； Facebook 香港風景攝影會 @Kent Mok、@Louis Ho、@billy lie、@Chi Tung Sin、@Lau Wing Nin、@Ada Hung｜撰文：Ginger 

日落打卡好去處 | 1. 機場維修區

位於赤鱲角機場附近嘅飛機維修區可以話係全港數一數二最靚嘅睇日落地方！除咗冇高樓大廈嘅遮掩，仲可以近距離見到飛機劃過上空，尾端更可能生成一條條飛機雲，加上最著名嘅機場維修區長堤打卡熱點，絕對可以輕鬆捕捉太陽落山時刻及拍出浪漫又唯美嘅夕陽照片！

著名長堤打卡熱點。（圖片授權：Instagram@good.time.old.time）
日落倒影於海面上，超靚！（圖片授權：Instagram@good.time.old.time）
最為人知嘅打卡熱點。（圖片授權：Instagram@garyho711）
望住天空不停換色，好吸引！（圖片授權：Instagram @connor.hiker_）
【INFO】
前往方法：東涌港鐵站搭S52巴士到機場維修區總站

日落打卡好去處 | 2. 泥涌

泥涌位於西貢西北面，最出名嘅打卡點必定係斷橋天空之鏡，吸引咗唔少人慕名嚟打卡！撞正潮退嘅時候，就能輕鬆捕捉天空之鏡嘅美景！記得去之前要留意天文台嘅潮汐預報，亦要避免農曆十五當日前往，因為潮漲過多，就未必能見到斷橋嘅景象。

最出名嘅打卡點，斷橋天空之鏡。（圖片授權：Facebook @Kent Mok 香港風景攝影會）
太陽落山後，海天皆成一色！（圖片授權：Facebook@Kent Mok 香港風景攝影會）
【INFO】
前往方法：烏溪沙港鐵站附近乘99號巴士，或於沙田市中心乘299X號巴士，再於泥涌站下車，步行2分鐘即抵泥涌石灘。

日落打卡好去處 | 3. 西九文化區 

沿着西九海濱長廊一直走，除咗可以喺附近買杯咖啡坐低吹吓海風，又或者帶埋你嘅愛寵坐喺草地野餐，沿途仲可以飽覽維港大海景。當日落嘅時候，每次都非常多人圍觀影相，慢慢欣賞太陽日落西山嘅醉人美景，點影都有feel！

睇日落必去西九，方便又易去。（圖片授權：Instagram@siufarb）
【INFO】
前往方法：九龍站C1出口前往圓方金區2樓的藝術廣場天橋出口，橫過天橋後，走5-10分鐘即可到達。

日落打卡好去處 | 4. 龍鼓灘

屯門龍鼓灘附近設有一個燒烤場地，非常適合同三五知己或伴侶燒烤及到沙灘上漫步玩樂。當潮退時，夕陽嘅光芒照射喺海面上，可以見到閃閃發光嘅金黃色餘暉同無邊際嘅大海。當太陽落山後，如果幸運地遇上七色彩霞，真係別有一番浪漫情調！

可以喺沙灘上邊漫步邊欣賞日落。（圖片授權：Facebook @Louis Ho 香港風景攝影會）
亦可以露營！（圖片授權：Facebook @Louis Ho 香港風景攝影會）
容易捕捉鹹蛋黃。（圖片授權：Facebook @Louis Ho 香港風景攝影會）
【INFO】
前往方法：於港鐵屯門站乘搭巴士K52，並於龍鼓灘巴士站下車。

日落打卡好去處 | 5.  鯉魚門三家村

相信住東九龍嘅朋友一啲都唔陌生，經過鯉魚門海傍道及海鮮街，就會到達三家村小石灘。嚟到三家村就可以感受到當地漁村生活，唔單只係一個食海鮮嘅好地方，亦可以欣賞到壯麗海景，尤其是最著名嘅鯉魚門燈塔，就喺海灘前方，影出另類嘅日落風格照片。

鯉魚門燈塔附近就可以影出日落呃like相！（圖片授權：Instagram @jessica_lkw）
感受當地漁村生活，欣賞壯麗海景。（圖片授權：Instagram @jessica_lkw）
【INFO】
前往方法：油塘港鐵站A2出口，步行約10至15分鐘就會到三家村。

日落打卡好去處 | 6. 沙頭角

放假唔知去邊好？沙頭角禁區重新開放，只要申請禁區證就可以前去遊玩。沙頭角有十幾個打卡位，例如彩色公屋、沙頭角之角及沙頭角碼頭等。當中日月亭就係一個欣賞日落黃昏嘅最佳景點位置，望到沙頭角整個海岸，喺海旁位置可以觀賞夕陽晚霞，望住天空不停咁樣換色，真係非常治癒！

沙頭角禁區重開，可以觀看整個沙頭角美景！（圖片授權：Facebook @billy lie 香港風景攝影會）
完全係攝影師夢寐以求嘅拍攝時間！（圖片授權：Facebook @billy lie 香港風景攝影會）
絕美海景景色。（圖片授權：Facebook @billy lie 香港風景攝影會）
【INFO】
前往方法：於港鐵上水或粉嶺站乘搭巴士78X或78K。

日落打卡好去處 | 7. 汀九橋

前往汀九橋路線輕鬆簡單，由荃灣步行至汀九，可以多角度觀賞汀九橋。日落時分，太陽逐漸下沉，形成一道光芒燦爛嘅金色餘暉，將整個汀九景觀烘托得更加壯麗，相信係拍拖睇日落嘅好去處。網民推介，海濱附近嘅赤橙色隧道更可以影出港版千本鳥居！

赤橙色隧道可以影出港版千本鳥居！ （圖片授權：Facebook @Chi Tung Sin 香港風景攝影會）
荃灣海濱附近，非常容易去。（圖片授權：Facebook @Chi Tung Sin 香港風景攝影會）
絢麗金黃，非常壯麗。（圖片授權：Facebook @Chi Tung Sin 香港風景攝影會）
【INFO】
前往方法：荃灣西地鐵站B出口，沿著海濱一直走，遠處就可以看到汀九橋。

日落打卡好去處 | 8. 堅尼地城卑路乍灣海濱長廊

如果唔想行山或者去郊外地方，不妨考慮吓嚟堅尼地城海濱長廊睇日落，交通十分方便，堅尼地城港鐵出口行5至10分鐘即到達。全場172米嘅海濱長廊擁有多個打卡位，除咗有唔同嘅兒童遊玩設施例如滑梯及搖搖板，附近仲有一大片空地，可以玩滑板同滾軸溜冰！到黃昏時段，可以沿着海旁散步，欣賞日落海景，非常寫意。

位於堅尼地城港鐵出口附近，非常容易去。（圖片授權：Facebook @Lau Wing Nin 香港風景攝影會 / Instagram @tim.foto_）
黃昏時段好靚！（圖片授權：Facebook @Lau Wing Nin 香港風景攝影會 / Instagram @tim.foto_）
【INFO】
前往方法：於港鐵堅尼地城站A出口，沿士美菲路向海邊步行即到。

日落打卡好去處 | 9.下白泥

相信呢個地方大家都唔陌生，最出名就係可以欣賞到靚日落！下白泥位於香港西北部嘅海岸上，位置比較偏遠，建議大家要提早到達下白泥，當泥灘潮漲嘅時候，反射天空上嘅藍天白雲，形成「天空之鏡」。日落嘅時候更為吸引，成鮮橙通紅嘅日落畫布，吸引咗唔少影相發燒友嚟打卡！

形成海天一色絕美！（圖片授權：Facebook @Ada Hung 香港風景攝影會）
成鮮橙通紅嘅日落畫布（圖片授權：Facebook @Ada Hung 香港風景攝影會）
【INFO】
前往方法：於港鐵元朗站E出口前往朗日路，並乘搭33號小巴站至終點站。

日落打卡好去處 | 10.流浮山后海灣

流浮山靠近海灣畔，除咗海鮮出名，更可以到附近海鮮大街遊覽。如果你想捕捉另類夕陽美景，不妨嚟到后海灣睇日落，拍攝夕陽晚霞，相信日落景色可以媲美下白泥！

與廣闊海灘形成天空之境，打卡必去。（圖片授權：Instagram @jessica_lkw）
【INFO】
前往方法：西鐵天水圍站乘搭K65巴士即可直達。

——————————————————

Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk