7-Eleven招牌 | 雖然大家每日都可能會行過7-Eleven買嘢飲同嘢食，但大家又有冇仔細留意，其實7-Eleven嘅LOGO淨係得一個英文字係用細階，其他都係大階呢。官方竟然回應過背後原因？
圖片來源：Facebook@7-Eleven Hong Kong、7-ELEVEN、領展 | 撰文：Hedy
喺香港每行過幾步都總有一間7-Eleven喺附近，而大家又有冇認真睇過7仔嘅LOGO呢？除咗係由數字同英文夾雜之外，原來當中英文字亦有大階同細階之分，「ELEVEn」只有「n」係細階！背後原因就要講起當時7-Eleven嘅前身，係由國德克薩斯州達拉斯市喺1927年創立，早期從事售賣冰塊業務，後來就為咗方便顧客，逐漸提供鮮牛奶、麵包以及雞蛋等日用商品。
7-Eleven招牌 | 只有n為細階嘅原因係？
其後7-Eleven便利店嘅名稱就係源於1946年，藉以標榜品牌由朝早7點至夜晚11點嘅營業時間，後來更發展成為24小時營業嘅便利店～而當中LOGO又點解淨係得「n」係細階？《讀者文摘》就此問過美國7-Eleven，而對方就透露公司入面流傳一種講法，就係因為創辦人嘅老婆覺得如果每個字母都用大階，就會顯得太生硬，所以就提議將N字改為細階，整體睇落去都更為順眼同優雅。而7-Eleven亦都喺1969年全面更換LOGO，直到而家都喺用緊同一個！大家如果下次有經過7-Eleven，就記得要留意下個LOGO啦！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
