Clockenflap戶外音樂及藝術節將會於今年12月1至3日，於中環海濱舉行。官方昨日突然公布詳情及嘉賓名單，當中竟然邀請到近年爆紅嘅日本天團YOASOBI演出，為香港觀眾帶來一個震撼彈！YOASOBI來港消息一出，立刻引起哄動，唔少粉絲已經立即撲飛，可見大家幾期待。佢哋咁多首名曲，你哋最鍾意邊首呢？日本人之前就投票選出最愛嘅YOASOBI歌曲，大家估吓今次佢哋會唱邊首歌呢？
圖片來源：X@YOASOBI_staff、Instagram@the_firsttake｜撰文：Angela
| （廣告時間） |
YOASOBI係日本近年爆紅天團。2019年先成立嘅YOASOBI被稱為「怪物級」新人，因為人氣上升程度就如怪物一樣無人可以匹敵。而兩位成員幾田りら及Ayase都只係22歲及29歲，非常年輕。兩位憑著獨特嘅風格唱出唔少現代年輕人所面對嘅迷惘、煩躁及厭世，因此獲得世界各地音樂迷包括美國、香港、台灣人嘅支持。
佢哋咁多首名曲，粉絲們最喜歡邊首呢？日本網站《みんなのランキング》早前發起投票，讓網民選出「最喜愛的YOASOBI歌曲」。好多粉絲都踴躍投票，小編就為大家揭曉頭10位嘅結果啦！
日本人最愛YOASOBI歌曲：第10位 – もう少しだけ （再一點就好）
輕快嘅旋律令人有一種愉快嘅感覺，一早起身聽到就會充滿朝氣，心情沉重嘅時候聽更加會得到鼓勵。
網民意見：呢首歌好似朝早嘅陽光一樣咁溫暖。
日本人最愛YOASOBI歌曲：第9位 – ラブレター （Love Letter）
呢首歌係根據東京廣播電台「FM東京」一個名為「日本郵便Sunday’s Post」嘅活動中，聽眾來信而創作的。寄信嚟嘅聽眾係一位小六學生，內容係抒發佢對音樂嘅喜愛同感謝之情，呢份感情真係好純真阿。
網民意見：我本來只鍾意聽西方音樂，唔鍾意日本音樂。聽完呢首歌之後我真係好感動，令我重新愛上咗日本音樂。
日本人最愛YOASOBI歌曲：第8位 – ハルジオン （春紫菀）
《ハルジオン》劇團「NOMEETS」演出劇目《むこうのくに》主題目。
網民意見：節奏快到會令你向前Move On係我喜歡呢首歌嘅理由。用溫柔嘅聲音唱出失戀女性嘅心聲，喺我心入面留下好深印象。
日本人最愛YOASOBI歌曲：第7位 – あの夢をなぞって （重現夢境）
《あの夢をなぞって》係YOASOBI小說音樂化計劃中其中一首作品，係以原作小說《夢の雫と星の花》（夢之水滴與星之花）創作而成，內容大概講述擁有預知夢能力嘅男女主角嘅戀情。
網民意見：係我愛上YOASOBI嘅入坑作！描寫去煙花大會嘅男女主角，關於那個夏天嘅淡淡回憶，令人感受到戀愛嘅酸甜味。
日本人最愛YOASOBI歌曲：第6位 – アンコール （Encore）
《アンコール》係根據原作小說《世界の終わりと、さよならのうた》（世界末日與道別之歌）創作嘅歌曲，亦是小說音樂化計劃第四章作品，帶有一點末日感和厭世嘅感覺。
網民意見：緩慢嘅旋律與「世界終結之日」呢個主題好襯，鋼琴聲又帶有一點悲傷，最後副歌部分嘅高音很好聽。
日本人最愛YOASOBI歌曲：第5位 – 怪物
《怪物》係人氣動畫《BEASTARS》第二季片頭曲。雖然歌名看似恐怖，但歌曲內容大概描述肉食性動物在喺呢個殘酷仍然想與草食性動物共存，並且為咗保護草食性動物而變得堅強。
網民意見：完美地表達《BEASTARS》嘅世界觀同主角嘅心情，令人想聽完一次又一次。
日本人最愛YOASOBI歌曲：第4位 – 三原色
《三原色》係日本電訊公司NTT DOCOMO旗下電訊商Ahamo嘅廣告配樂，並且根據小說《RGB》作為原型而創作，描繪人同人之間嘅連結。
網民意見：令人好強烈地感受到「就算分離亦能夠再見」嘅感情，聽幾多次都係會覺得好感動。
日本人最愛YOASOBI歌曲：第3位 – 夜に駆ける （向夜晚奔去）
《夜に駆ける》係好多人認識YOASOBI嘅歌曲，亦係佢哋嘅代表作。雖然曲風輕快，但其實十分悲傷，內容係根據小說《タナトスの誘惑》（死神的誘惑）創作，講述一個女仔經常受到「死神的誘惑」想去到高樓大廈頂樓一躍而下。唔少人係因為呢首歌而得到共鳴，成為YOASOBI嘅粉絲。大家亦被兩位成員驚人嘅描繪故事能力所驚艷。
網民意見：呢首歌唔係一聽鍾情，但聽過之後，回過神來發現自己已經不停重覆聽緊，深陷其中。
日本人最愛YOASOBI歌曲：第2位 – 群青
《群青》係以人氣漫畫家山口飛翔嘅作品《藍色時期》創作嘅歌曲。歌詞內容大概講述男主角矢口八虎成績優異，本來擁有大好前途，卻毅然決定入讀藝術學校追夢，雖然偶爾會迷失，但仍然堅持理想嘅故事。
網民意見：係一首又溫柔又強大嘅歌曲。原作《藍色時期》講述創作藝術嘅痛苦，以及藝術創作之外嘅快樂及美麗。我覺得呢首歌輕快嘅旋律同偶爾聽到嘅低潮，正是藍色時期嘅世界。而且去到合唱部分亦十分令人動容。
日本人最愛YOASOBI歌曲：第1位 – アイドル （Idol）
第一位《Idol》相信大家都唔陌生，係超人氣動畫《我推的孩子》片頭曲，並以最重要嘅角色星野愛為主角寫嘅歌。喺YouTube上架後1個月左右就得到1億觀看次數。
網民意見：同平時嘅YOASOBI風格好唔同，但係又好有YOASOBI嘅味道，係一首好不可思議嘅歌曲。
