T恤衣領變形 | 每次見到T恤衣領變鬆就諗住揼？原來只要簡單4步就可以將衣領還原，即刻睇睇日本洗衫專家點教大家，晾衫時候只要做多一步就可以避免變形？即睇點做！
圖片來源：《ZIP!》節目截圖、神崎健輔 | 撰文：Hedy
相信大家最驚就係買完新衫返嚟，洗多幾次之後件衫嘅衣領就已經變形，睇落就好似好殘舊著到鬆晒咁。而日本電視節目《ZIP!》請嚟有「洗衣博士」之稱嘅神崎健輔先生，教大家一個方法，就可以輕鬆將鬆垮衣領還原，咁就可以救返自己鍾意嘅衫！
T恤衣領變形 | 晾衫出錯 衣領隨時變鬆
首先大家要理解點解會出現領口變鬆嘅問題，原來就係喺晾衫嘅時候做錯！由於啱啱洗好嘅棉質T恤仍然附著大量水分，而呢個時候大家將T恤掛上衣架，就會令領口因為過重而向外拉，所以就會容易出現變鬆同變形嘅情況。知道咗原因之後，如果大家想救返一堆衣領變鬆嘅衫，就絕對要參考神崎健輔先生教授嘅4個步驟：
T恤衣領變形 | 1. 準備一盤冰水
第一步就要先準備一盤冰水，之後就將變形嘅衣領由外向內摺成波浪形，將領口以一朵花嘅形狀捉起，將領口浸落冰水入面，大概等1分鐘嘅時間。
T恤衣領變形 | 2. 擠出水
大家平時都可能習慣將衫擰乾水，而今次就要避免呢個做法，反而應該將衫攤平，用雙手用力按壓，將衣領嘅水分擠出。同時亦都要由下以上將領口推平。
T恤衣領變形 | 3. 熨斗熨至半乾
之後就要準備定熨斗，由下而上去熨領口，唔使熨到全部都乾晒，只要半乾狀態見到領口變平就可以～
T恤衣領變形 | 4. 攤平晾乾
熨乾完之後，大家只需要將衫平放，等領口位自然風乾，就會令T恤衣領還原。如果屋企冇咁多位一定要掛起衣架，就建議大家可以用兩個衣架將T恤水平晾起，咁領口位置就唔會因為重量問題而變形！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
