DearJane演唱會 | Dear Jane嘅歌相信大家都耳熟能詳！而今次Dear Jane將聯同弦樂團、敲擊樂喺澳門倫敦人綜藝館舉行《Dear Jane Live at The Londoner》！當中佢哋又會有啲咩驚喜帶畀大家呢？點解今次會揀由澳門開始呢？～即刻入內文睇睇Dear Jane專訪啦！
圖片來源：SAUCE編輯部、Instagram@dearjaneofficial | 撰文：Hedy
Dear Jane相隔一年再喺澳門開騷喇！Dear Jane將會喺今年9月28日及29日於澳門倫敦人綜藝館開演唱會。而今次嘅演唱會亦都係成軍20週年紀念計劃嘅序幕，原來喺澳門開係有原因？Dear Jane就表示佢哋好多時嘅演唱會都係喺9月舉行，就連上年9月都喺澳門，所以佢哋就決定做一個屬於澳門嘅「9月之約」喇。而今年亦都咁啱有期，就可以兌現到！不過Dear Jane亦都強調呢個9月之約，未必一定會搞，但搞就一定會係9月！各位澳門嘅朋友可以期待下啦～
DearJane演唱會 | 成員最想多謝邊個？
今次演唱會除咗場地唔同之外，Dear Jane亦聯同弦樂團、敲擊樂等樂手一齊喺台上面演出，變相每首歌亦都有更多空間去改編音樂，所以大家今次就要落足耳力聽聽唔同歌曲嘅新改編！唔知大家又聽咗新歌《多謝你自己》未呢？《多謝你自己》呢首歌除咗可以好好鼓勵到大家之外，亦都令自己喺日常反思可以點鼓勵到自己，提醒自己就算生活忙碌同辛苦，都要記得自己原來行過咗咁多路，已經好叻！而Dear Jane成員亦借新歌多謝自己，Howie就強調：「我會話多謝『自己』冇放棄，自己係包括每一個成員，唔放棄就得㗎喇！」Tim就最多謝成員冇放棄，「其實真係冇諗多謝自己㗎，但如果真係多謝嘅就係擺我哋嘅歌入去佢哋playlist嘅每一位。」
DearJane演唱會 | 成軍20週年有咩驚喜？
下年將會係Dear Jane成軍20週年，佢哋好希望可以出到自己嘅專輯，而《多謝你自己》就係入面嘅第一首歌，所以就想有啲唔同嘅感覺、曲風同話題擺喺入面，希望可以鼓勵到大家。大家除咗下年可以聽到呢隻20週年紀念嘅碟之外，成員都有諗過搞20週年Fans Meeting，同大家近距離相處，甚至係食返餐勁？Howie就建議：「可以食個…譬如話印度菜，團體咖喱宴。我覺得大家會開心囉，玩啲得意嘅嘢咁樣囉，一定有機會！」
Hair：Issac Lo@HoLa ii colpo hair & pets
Make up：German Cheung
Wardrobe：Lane Crawford
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
