Chubby Hearts | 2月喺充滿愛嘅節日，除咗大家一齊歡聚農曆新年之外，更有情人節以及元宵節。著名設計師Anya Hindmarch所創造嘅巨型心心裝置，「Chubby Hearts」將會登陸香港，即刻睇睇喺咩時間同地點先可以打卡！
圖片來源：官方網站、Instagram@anyahindmarch| 撰文：Hedy
設計師Anya Hindmarch喺2018年嘅秋冬倫敦時裝週，以充滿歡樂嘅巨型心心裝置，代替走秀，喺倫敦29個地方放置紅色心心。「Chubby Hearts」係佢構思嘅一個公共設計項目，透過將巨型嘅愛心氣球停留喺唔同嘅地標性建築，作為對該城市愛的宣言，同時亦增添一些色彩。具創意之餘又相當浪漫！
除咗喺倫敦出現之外，「Chubby Hearts」將會喺情人節同元宵節期間，首次喺亞洲展出，將會帶全新作品喺香港亮相！由著名設計師Anya Hindmarch構思、香港設計中心策展及呈獻嘅「Chubby Hearts Hong Kong」將會喺中環皇后像廣場花園，展出直徑約12米嘅巨型漂浮紅心，一定要拉埋伴侶同朋友一齊打卡！
為咗體現可持續發展理念，設計師Anya Hindmarch重用咗部分曾於倫敦展出嘅作品，同時亦會為香港設計出全新作品，真係好期待呀！除咗有12米巨型漂浮紅心之外，一連11日將會喺旺角花墟、大埔林村許願廣場、堅尼地城卑路乍街海濱等約10個地方快閃直徑約3米嘅飄浮紅心。每個地方將會快閃一日，當日快閃嘅地點，將會於每一朝喺香港設計中心網站上面公布詳情，心心漂浮喺上空，夠浪漫之餘又能為大家加強節日氣氛！與另一半喺氣球下相擁，諗到都覺得Sweet呀，記得要留意住每日快閃嘅地點！
【INFO】 「Chubby Hearts Hong Kong」 日期：2024年2月14至24日 地點：巨型飄浮紅心（中環皇后像廣場花園）、「快閃」飄浮紅心（旺角花墟、大埔林村許願廣場、堅尼地城卑路乍街海濱等）
