飲品急凍法 | 最近天氣高達31°C，行出街一陣就已經流晒汗，想即時為身體消暑就絕對要飲汽水～呢個時候如果發現雪櫃已經冇晒飲品，相信大家都會相當崩潰，小編教大家2個方法急凍罐裝飲品，即刻學學！
圖片來源：X@maple4124、網上圖片 | 撰文：Hedy
夏日炎炎想飲杯汽水或者同朋友聚會嘅時候想飲啤酒？就算唔記得擺落雪櫃，只要大家學識呢兩大方法，最快等1分鐘就可以將本身室溫嘅汽水變成一罐冰凍汽水！
飲品急凍法 1. 善用廚房紙
想有效急凍罐裝飲品，就可以善用廚房紙！只要將廚房紙沾濕並包覆喺罐裝飲品上，就可以直接放入雪櫃，方法超簡單，只需要靜候10分鐘就搞掂。背後嘅原理係，罐裝飲品如果包住沾濕嘅廚房紙，能加強熱傳導嘅能力，同時亦有助水分揮發散熱，加速飲品降溫。平時要雪凍飲品都可能要等4個鐘以上，不過用呢個方法，10分鐘就做到！
飲品急凍法 2. 擺入冰+轉動1分鐘
想飲凍飲最簡單嘅方法，當然係喺飲品內加冰，不過冰粒會隨時間而融化，有機會令飲品味道變淡，容易影響口感。如果本身屋企有冰，其實只需要1分鐘時間，就可以將罐裝飲品直接變冰凍！首先只要準備一個盤同冰，並將適量嘅冰放入盤入面，再將任何嘅罐裝飲品例如汽水同啤酒放入去。然後再將其他嘅冰放滿喺罐裝飲品上面，不過就唔好完全將罐裝飲品遮蓋，需要預留大概四分之一嘅空間，能夠將一隻手指放入去。之後就可以用手指不停咁轉動罐裝飲品，只需要1分鐘嘅時間，就可以令飲品變得冰凍。
日本節目《伊東家の食卓》曾經實測過呢個方法，啤酒本來保持喺室內溫度22.2°C，經過一分鐘嘅轉動之後，啤酒嘅溫度就已經急降到7.6°C，足足跌咗大概14度，超神奇！呢個方法背後嘅原理就係巧妙地用咗冰嘅溶解熱，當冰溶解嘅時候會奪去其他物件嘅熱力，而罐裝飲品接觸到冰就會開始變冷，有助帶走罐裝飲品嘅熱力！只要喺呢個時候將罐裝飲品轉動，多餘嘅水膜就會被飛走，從而達至最大嘅冷凍效果！反而將罐裝飲品淨喺放喺冰上面，就冇同樣嘅效果，大家記得要留意！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
