體能之巔2 | Netflix真人騷《體能之巔：百人大挑戰》播出第一季後深受好評，共集結100位頂尖男女進行運動對決。除咗話題十足之餘，參賽者嘅體能亦都令人震驚！而大家最期待嘅第二季將會喺3月播出！
圖片來源：Instagram@netflixtw、netflixkr、stungunkim | 撰文：Hedy
《體能之巔：百人大挑戰》搵嚟100位體格頂尖男女參賽，當中更係不分年齡、種族、體重以及職業，節目宗旨為尋找出最完美嘅體格。參賽者只要運用自己嘅智慧同體能，生存到最後嘅人就可以帶走3億韓元嘅獎金！
體能之巔2 |100名男女對戰
第一季嘅《體能之巔：百人大挑戰》參賽者職業多樣，當中包括奧運選手、健美選手、職業格鬥家、退役軍人等，100位男女需要喺氣力、毅力、敏捷度、平衡等嘅關卡互相競爭，遊戲嘅每一輪都會產生淘汰者。除咗關卡夠晒刺激之外，參加者嘅身材必定係大家關注嘅地方！
體能之巔2 | 規模超越第一季
第二季嘅體能之巔將會以地下鬥室為主題，導演張浩基繼續堅持尋找出最完美嘅體格。節目同樣搵嚟100位男女進行對決，優勝者可以攞走3億獎金。除咗有全新激烈嘅關卡之外，更會保留本來節目嘅精髓。導演更表示第二季喺各個方面都會超越第一季，尤其係場地方面。第一季嘅場地規模已經等於兩個足球場嘅大細，新一季更會擴大場地，為參加者打造出最佳嘅比賽場地！
體能之巔2 | 參賽者身分公開
目前已知將會有韓國綜合格鬥家金東炫參加，其外號為「電擊槍」。金東炫喺2008年進軍世界最大格鬥賽事UFC，更係奪得UFC最多勝場嘅亞洲選手。大家仲記唔記得秋成勳曾經出演第一季嘅體能之巔，而金東炫同佢都係朋友，唔知會唔會有機會兩人一齊比拼呢？金東炫同樣活躍於參與綜藝節目，當中包括《大逃脫4》、《驚人的星期六》以及《團結才能投》等等，喺節目入面展現出反差嘅魅力！其他參加者職業更包括柔道運動員、游泳選手、摔角手等。
體能之巔2 | 3月19日有得睇
從目前已釋出嘅海報中得知《體能之巔2：百人大挑戰地下鬥士》將會喺3月19日於Netflix上映，當中更寫上「地表最強的人啊，從底層重新拼搏吧。」，相信當中嘅關卡將會更具挑戰性，大家亦都可以睇到激烈嘅爭鬥，令人相當期待！
【INFO】
《體能之巔：百人大挑戰》第2季
上映日期：3月19日
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
