器官公仔 | 搵緊今年最正嘅聖誕禮物？香港醫學博物館推出嘅聖誕版器官公仔，絕對係你嘅不二之選！器官公仔不但搞笑又可愛，仲有唔同嘅器官、細胞同病毒，配合聖誕氣氛，送比朋友做聖誕禮物超適合！最受歡迎嘅就係戴住聖誕帽嘅子宮公仔啦，睇落去真係可愛到不得了，仲有網民話有Jellycat嘅感覺添！
圖片來源：香港醫學博物館｜撰文：Kimi
+12
除咗聖誕子宮，仲有聖誕大腦、心臟、睪丸，甚至聖誕感冒、流感、胃痛等一系列超萌嘅聖誕掛飾。每個公仔都經過特別設計，顛覆你對器官、細胞、細菌同病毒嘅印象。想買齊全套？大家就要快啲去入手啦，數量非常有限，先到先得㗎！入場前，你仲可以去一樓嗰棵掛滿「器官」同「病毒」嘅聖誕樹前打卡，影相留念！
香港醫學博物館本身都好值得一去，呢座建築物前身係病理檢驗所，1906年落成，係愛德華時期建築同中式瓦頂風格嘅完美融合，1990年被定為香港法定古蹟。博物館1996年開幕，展覽豐富嘅香港醫學歷史同知識，內有11間展覽廳，展示唔同嘅醫療用具同19世紀時香港鼠疫嘅情況等。入場費只係HK$20，絕對係物超所值！如果只想買器官公仔，紀念品位置係唔需要入場費，快啲去搶購你嘅聖誕版器官公仔啦！
【INFO】
香港醫學博物館
地址：香港上環半山堅巷2號
開放時間：星期二至六 10:00-17:00；星期日 13:00-17:00（星期一休息）
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
YouTube – @saucemediahk
