香港都市傳說 | 農曆七月鬼門關大開，唔知大家又有冇聽過一啲關於香港驚人嘅都市傳說呢？當中更有一單喺由政府承認過嘅靈異事件，仲有一個地方被《國家地理頻道》評為全亞洲十大恐怖地點之一，究竟當時發生咩事？有啲咩咁恐怖？
圖片來源：Facebook@冥通銀行（香港） Hell Bank – Hong Kong、《色戒》劇照、網上圖片、電影服務統籌科（統籌科） | 撰文：Hedy
香港都市傳說 | 1. 茶餐廳冥鈔事件
正值鬼節就最啱講吓香港曾經發生過嘅靈異事件，而新界北茶餐廳更係政府疑似默認嘅嘅靈異事件之一？咁就等我哋了解當時究竟發生咩事，喺1989年12月嘅時候，一間位於新界北大埔田嘅茶餐廳「潮湧記」，接到一個外賣電話，對方就叫咗4人份量嘅加底蛋飯以及牛河粉等食物。餐廳夥計準備好食物之後，就直接送往喜秀花園別墅，不過當時撳多次門鐘竟然冇人回應？之後夥計就繼續敲門大叫送外賣，呢個時候對方先將錢攝喺門縫，仲叫佢擺門口就得。本身以為收完錢就冇事，點知夜晚老闆數錢嘅時候竟然發現入面夾雜冥鈔。
第二日餐廳更收到同樣嘅外賣電話，而夥計送外賣收完錢之後，老闆又再次發現冥鈔，本來只係以為員工攞走咗啲錢，但員工極力否認。所以老闆就決定第三日再收到電話就會親自上陣，果然今次電話又打嚟，老闆收到之後確認係港幣，點知夜晚返到去嘅時候，又出現冥鈔？於是老闆決定報警處理，警方破門而入之後，眼前竟然係四具屍體？法醫更表示已經死咗大概一個星期，實在令人震驚！當時更有媒體向有關部門確認，政府竟然冇否認？不過亦有人事後質疑事件嘅真偽，因為無論係「潮湧記」茶餐廳定係喜秀花園別墅，都冇人搵到該地址嘅存在，大家又信唔信呢？
香港都市傳說 | 2. 彌敦道鬼手打牌
唔知大家又記唔記得香港彌敦道一座大廈曾經發生過經典嘅靈異事件，甚至引來千人圍觀？事件發生喺1953年，彌敦道452號一幢大廈4樓嘅一個單位，當時業主同3位朋友打緊麻雀，直到有人食糊嘅時候，竟然有多一對手向大家收錢，甚至仲有另一對手伸出去摸牌，本來打牌嘅人全部都嚇到跑出單位，更報警處理。而事件經過一日後，更吸引咗數千人圍觀，最後竟然搞到警方到場驅趕人群。事件隨後更被傳當時原來係因為有人競投失敗，所以就傳出鬼故事去令競標者唔敢收樓。
香港都市傳說 | 3. 九廣鐵路廣告
喺90年代嘅時候，大家又有冇睇過九廣鐵路嘅廣告呢？本來廣告搵嚟6位小朋友喺森林入面扮火車玩遊戲，配搭陰森嘅背景音樂。不過當時就有網民發現畫面入面唔只6位小朋友，甚至喺唔同畫面數到有7個，甚至係8個！就連廣告畫面入面更有小朋友嘴角流血，令人毛骨悚然。而廣告隨後亦被禁播，真係聽到背景音樂都已經覺得驚！
香港都市傳說 | 4. 香港最轟動西貢結界事件
放假嘅時候相信都有唔少人鍾意親親大自然，同朋友一齊行山，當中行山熱點包括西貢，而西貢更被稱為「香港百慕達」？講到香港最轟動嘅西貢結界懸案，就一定會記得2005年休班警員丁利華失蹤嘅案件。
喺當年嘅9月11日，丁利華喺朝早10點前往西貢麥理浩徑遠足。去到中午12:45分嘅時候，報案時收到電話表示一名男子喺西貢迷路，不過喺呢7分鐘嘅通話中，對方都未能清楚表明自己身在嘅位置，令人相當疑惑！當時丁利華講出幾組數字：「西貢586」、「487040」、「487020」、「587零幾」及「024」，不過數字並非表示座標，有唔少人猜測可能係入咗結界。警方事後針對4條行山路線進行調查，並動員2000人上山搜索，最後都冇任何發現，丁利華就好似人間蒸發般消失，至今仍然係懸案。
香港都市傳說 | 5. 香港猛鬼學校元朗屏山達德
香港竟然有一個地方被《國家地理頻道》評選為亞洲十大恐怖地點之一？大家又估唔估到係咩地方呢？元朗屏山達德學校喺1931年創立，1974年遷往屏山南北路建起新校舍，去到1998年因為收生不足而停擺，其後更多次有鬧鬼傳聞？
相傳日軍侵略香港期間，大批抵抗日軍嘅村民被殺，其後屍體被葬於山邊變成亂葬崗。而且更有傳其中一任校長喺校入面穿紅衣自縊，自此廁格都會有紅衣女鬼出現。而2011年更有一班中學生共12人到屏山達德學校探險，行緊籃球場附近嘅時候就有其中一個女學生睇到有紅衣女鬼出現，當時大家都覺得唔對路，於是就開始跑返去屏山輕鐵站，本來4分鐘嘅路程，佢哋竟然用咗30分鐘先跑到。其後女學生失控用力捏自己頸部，其他人上前阻止嘅時候，竟被抓傷。女學生其後昏迷倒地，更稱自己暈倒期間腦海曾經浮現多幅有人慘死嘅畫面。而《國家地理頻道》亦喺2013年將達德學校被列為全亞洲十大恐怖地點之一，更形容為出現鬼故及超自然事件嘅完美場所。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
