雞蛋仔推介 | 召喚雞蛋仔愛好者！講起香港嘅特色美食，除咗菠蘿包、蛋撻及魚蛋燒賣等小食，不得不提雞蛋仔。由傳統原味，直到依家雞蛋仔越出越多款式，間間店舖大玩內餡配料，有咸有甜，越出越吸引，例如法式焦糖燉蛋、烏龍茶、糖漬橙皮、辣肉腸味及黑芝麻味等，甚至最平$10有交易！不妨經過以下店舖嘅時候試吓啦！
圖片來源：Sauce編輯部、 Openrice @Carriechan3066、@rbylife、@voracious、@紅棗@周圍食@為食、@MoJil、@Karying_karen、@yellowfoodfever、@kimiibibu、@Patrick.dec8、@Terrisin、@熊仔美食專員、@Cynthia.w、@ella_inspirit、@dejafood、@緣來是油雞、@Bobhammer10、@happy_lego23｜撰文：Ginger
香港雞蛋仔推介 | 1. 南山雞蛋仔
南山邨名物之一「南山雞蛋仔」，以前以車仔檔嘅形式經營，非常便宜又好味，深受石硤尾街坊及附近讀書嘅學生愛戴！最近喺南山村搬咗入舖，主要售賣原味雞蛋仔及格仔餅，定價為$10一底，非常抵食。由於長期有人龍，雞蛋仔逐底新鮮出爐，拎上手熱辣辣，蛋香味濃，性價比十分高！
【INFO】
南山雞蛋仔
地址： 石硤尾南山邨
香港雞蛋仔推介 | 2. 629雞蛋仔
629雞蛋仔位於新蒲崗，店主堅持即叫即整，所以等待嘅時間會比較長。店舖大玩多款特色口味，例如烏龍茶、糖漬橙皮、錫蘭紅茶、香芋、紫薯及粟米等，定價由$20至$32不等。
【INFO】
629雞蛋仔
地址： 新蒲崗康強街28號康景商場地下28J號舖
營業時間： 星期一至六 12:00 - 20:00，星期日全日休息
香港雞蛋仔推介 | 3. 低調高手大街小食
好消息！筲箕灣人氣雞蛋仔店「低調高手大街小食」近日喺銅鑼灣開咗新分店，終於唔使入筲箕灣都食到！每次經過都一定會見到佢哋大排長龍，憑着原味雞蛋仔打響名堂，即叫即整，拎上手熱辣辣，外脆內軟，蛋香十足，定價為$26一底。除咗原味，佢哋亦都有其他特別口味，例如蘋果、黃金「鹹蛋黃」、辣肉腸味等。
【INFO】
低調高手大街小食
地址：筲箕灣筲箕灣東大街76A號地下B3號舖
地址：銅鑼灣信德街1-7號號a 舖
營業時間：星期一至日 13:00 - 21:00
香港雞蛋仔推介 | 4. 大澳華記香脆雞旦仔
大澳華記香脆雞旦仔以炭燒製法打響名堂，吸引咗唔少本地人及遊客到訪大澳朝聖。店主一人打理，店舖只有一個炭爐，而且即叫即整，每底至少要等4分鐘才輪到下一位，如果排隊人龍大約有10位，咁就要起碼預返40分鐘排隊時間啦！
【INFO】
大澳華記香脆雞旦仔
地址：大澳石仔埗街121號地舖
香港雞蛋仔推介 | 5. 豬隊友
豬隊友尖沙咀及沙頭角皆有分店，以法式焦糖燉蛋雞蛋仔（$45）為主打，由於即叫即整，等待時間約十分鐘。每一粒雞蛋仔入面都有焦糖燉蛋及焦糖醬汁，蛋味濃上加濃，燉蛋滑捋捋，食起嚟非常滿足，口感非常豐富！
【INFO】
豬隊友
地址： 尖沙咀加拿分道12號地舖
營業時間： 星期一至日 12:30 - 23:00
香港雞蛋仔推介 | 6. 摩豆
講起旺角掃街，又點少得食雞蛋仔？摩豆位於旺角中心，位置非常方便。店舖提供多款特色味道，例如班蘭味、阿華田脆脆以及奶黃味雞蛋仔等，更可以根據個人喜好，加配麻糬及雙球雪糕，令層次更加豐富！
【INFO】
摩豆
地址：旺角彌敦道688號旺角中心第一座2樓SA27A號舖
營業時間：星期一至日 12:00 - 23:00
香港雞蛋仔推介 | 7. 蛋香烘焙
蛋香烘焙於2014年位於北角成立，主打唔同款式雞蛋仔及格仔餅，相信附近街坊都會認識呢間小店。稻香烘焙除咗提供原味雞蛋仔，亦非常推薦大家試黑芝麻味、芒果雪糕及低脂芝士等味道。原味雞蛋仔用小孔紙袋裝住，會見到一半空心一半餡，為雞蛋仔完美比例！
【INFO】
蛋香烘焙
地址：北角炮台山電氣道254-280號華凱大廈地下A4號舖
營業時間： 星期一 11:30 - 21:00，星期二至四 10:00 - 21:00，星期五 11:30 - 21:00，星期六至日 10:00 - 21:00
香港雞蛋仔推介 | 8. 蛋記
為大家介紹位於西灣河太安樓嘅一間小店，亦都係掃街必食之選。雞蛋仔只有原味及芝士味選擇，原味雞蛋仔定價$22，而芝士味定價$28。呢間嘅雞蛋仔所用嘅蛋漿比較少，令到雞蛋仔嘅外皮變得比較薄，空氣感就會多一點，食返上嚟會比較輕盈，當小食不錯。
【INFO】
蛋記
地址：西灣河筲箕灣道57-87號太安樓地下A3B號舖
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
