簡約公屋懶人包 | 公屋最新輪候時間都要等成5.7年，政府將會興建約30000個「簡約公屋」單位，填補供應不足嘅問題。而第一期簡約公屋將會接受申請，每月租金更可低至$740，即刻睇睇有咩申請資格同懶人包啦！
圖片來源：政府新聞處 | 撰文：Hedy
第一期簡約公屋申請將會涵蓋元朗攸壆路以及牛頭角彩興路兩個項目，合共會為大家提供近4440個單位，預計將會喺2025年第一季開始陸續入伙。「簡約公屋」嘅租金相對較平，以元朗攸壆路一至二人單位為例，每月租金僅$740。每個單位更設有獨立洗手間、沐浴間、開放式煮食空間、熱水爐以及抽氣扇。
簡約公屋懶人包 | 元朗攸壆路配套
如果想用最平租金住到「簡約公屋」，就可以選擇元朗攸壆路！當中可以提供近2150個單位，包括1760個一至二人單位以及390個三至四人單位，每月租金分別為$740以及$1420，預計2025年第一季可以入伙。只需要15至20分鐘嘅車程就可以到達元朗市中心、上水以及大欖隧道轉車處。附近就有會商場、自助洗衣店、溫習/活動室、休閒同社區服務等。區內就有29間小學以及42間中學，教育設施齊全！
簡約公屋懶人包 | 牛頭角彩興路配套
家庭人數較多又想住近市區，就有牛頭角彩興路畀大家選擇，將會提供約2290個單位。當中包括1530個一至二人單位、440個三至四人單位以及320個四至五人單位，租金分別為$1,110、$2,140以及$2,650。只需要15分鐘就可以由牛頭角往返至彩虹港鐵站，區內有9間小學以及28間中學選擇。附近同樣設有小商店、自助洗衣店、社區服務及休閒設施等。
簡約公屋懶人包 | 申請資格
申請人需要輪候傳統公屋3年或以上，按第一期申請項目最後嘅入伙日期，即2025年5月計算，當中亦會以一般公屋申請者為優先。成功獲編配並選擇入住簡約公屋嘅人，會繼續保留輪候傳統公屋嘅位置同資格。
簡約公屋懶人包 | 如何申請？
房屋局將會主動向已輪候傳統公屋三年或以上嘅一般公屋申請住戶發出通知書及申請表，有意申請者需要喺2024年6月24至2024年7月15日期間，交回填妥嘅申請表就可獲優先處理。遞交方法有3種：
1. 郵寄
「簡約公屋」專責小組郵政信箱（香港灣仔告士打道郵政局郵政信箱28222號）
2. 投遞
九龍橫頭磡南道三號香港房屋委員會客務中心第二層平台「簡約公屋」資訊站 / 香港灣仔告士打道五號稅務大樓八樓八○一室「簡約公屋」專責小組辦事處 （辦公時間：星期一至星期五上午九時至下午六時）
3. 網上申請
透過掃描申請表上嘅二維碼，並使用「智方便+」填寫電子表格及網上遞交
簡約公屋懶人包 | 單位編配及計分制
簡約公屋申請者符合以下三方面嘅客觀條件，須通過資格核實，就可以獲得較高嘅編配優次。為鼓勵申請入住擴展市區／新界嘅簡約公屋項目，如申請者只選擇擴展市區／新界項目可獲加30分，如同時選擇擴展市區／新界及市區項目則會獲加15分。
1.申請住戶現居於不適切居所
居住滿24個月或以上 加30分
居住滿12個月但少於24個月 加20分
居住滿3個月但少於12個月 加5分
2.申請住戶家庭成員
二人或以上的家庭申請 加20分
符合公屋的「家有初生」優先配屋計劃 每名成員加20分
60歲或以上的長者 每名成員加5分
18歲以下的子女 每名成員加5分
3.因健康問題而嚴重影響正常生活包括工作能力等
每名成員加10分
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
