「下定決心 回復單身都不覺荒涼⋯⋯」、「一個人原來都可以盡興⋯⋯」等應該係近年大家去唱K經常會出現嘅歌詞。然而除咗新歌，相信好多人都仲會唱返充滿回憶嘅舊歌。今次小編就同大家嚟個回憶殺，細數10大千禧年代唱K必點嘅合唱K歌，睇下你哋係咪識得唱晒以下咁多首口水歌啦！
圖片來源：一事無成MV截圖、心急人上MV截圖、我的回憶不是我的MV截圖、明愛暗戀補習社MV截圖、好好戀愛MV截圖、好心好報MV截圖、死性不改MV截圖、刻不容緩MV截圖、小酒窩MV截圖、滄海遺珠MV截圖｜撰文：Icy
90後唱K必點合唱歌｜1 – 周柏豪、鄭融《一事無成》
第一首要提及嘅千禧年代合唱K歌，就係由周柏豪同鄭融合唱嘅《一事無成》。歌曲除咗節拍輕快，可以男女合唱之外，歌詞仲非常啜核，例如當中嘅「高峰上不成，唯盼愛情順景，成就在平凡裡，那份溫馨」，引起好多香港小市民嘅共鳴。
90後唱K必點合唱歌｜2 – Cookies《心急人上》
要數到代表青春活力嘅經典廣東歌，就非由Cookies主唱嘅《心急人上》莫屬。歌詞充分體現出青春少女對於愛情嘅懵懂期盼，而且充滿節奏感。每次點唱呢一首歌，都一定要同朋友跟住螢幕上Cookies嘅舞步，邊唱邊跳！
90後唱K必點合唱歌｜3 – 泳兒、海鳴威《我的回憶不是我的》
泳兒同海鳴威嘅《我的回憶不是我的》絕對係另一經典。泳兒本身都有好多代表作，但同海鳴威合作呢首歌又好夾，和音非常合拍。除咗旋律好聽易上口，歌詞先係最令人痛心，道盡失戀人困在回憶漩渦之中嘅痛苦，好多人話次次聽都會喊。
90後唱K必點合唱歌｜4 – Twins《明愛暗戀補習社》
接落嚟呢一首經典合唱K歌，係由Twins主唱嘅《明愛暗戀補習社》。當年Twins一出道就以清純學生妹形象走紅，風靡一時，初出道時推出嘅戀愛歌曲深受少女們歡迎。而《明愛暗戀補習社》嘅歌詞以唔同科目作比喻，好似唱出每個少女對於初戀嘅迷思咁，特別有共鳴！
90後唱K必點合唱歌｜5 – 方力申、鄧麗欣《好好戀愛》
講起情侶檔愛情歌，就不得不提由方力申同鄧麗欣主唱嘅《好好戀愛》。當中嘅歌詞「完了吧～如無意外～從今開始該好好戀愛～」正中每位處於苦戀關係中嘅朋友嘅心聲，唱嘅時候特別容易代入感情！
90後唱K必點合唱歌｜6 – 方力申、鄧麗欣《好心好報》
講起方力申同鄧麗欣合唱嘅愛情歌，又點可以唔提及《好心好報》呢？歌詞同樣唱出男仔追女仔時遇到嘅挫折同困難，當中嘅歌詞「對你好，無人稀罕我好，無人欣賞我好」，帶出係愛情關係中付出同收穫從來並不成正比嘅道理，實在令人揪心！
90後唱K必點合唱歌｜7 – Twins、BOY’Z《死性不改》
如果想熱鬧啲，四個人一齊唱嘅話，就可以點選由Twins同BOY’Z主唱嘅《死性不改》。呢首歌可以話係Twins同BOY’Z嘅愛情歌代表作，當年紅到街知巷聞，唱出時下少男少女對於戀愛嘅執着，就好似其中一句歌詞咁：「如我沒有你的愛，我沒法活得來……」
90後唱K必點合唱歌｜8 – 容祖兒、李克勤《刻不容緩》
廣東話K歌比較鍾意用失戀同苦戀作為主題，完美演繹每位處於愛情困境嘅朋友嘅心情，所以當年造就好多琅琅上口嘅口水歌。而由容祖兒同李克勤主唱嘅《刻不容緩》亦流行一時，其中一句歌詞「遲來一秒鐘，遲疑一秒鐘，從迎接你變做目送」激發唔少人表白嘅勇氣，撮合唔少男女！
90後唱K必點合唱歌｜9 – 林俊傑、阿Sa《小酒窩》
由林俊傑同阿Sa主唱嘅《小酒窩》，旋律輕快耐聽，歌詞充滿甜蜜嘅感覺。重點係如果身邊有朋友真係有酒窩，大家就會起哄！相信當年好多學生哥都會搵藉口邀請心儀嘅女仔合唱，或者由一班「好兄弟」幫手起哄點歌，藉此撮合大家！又或者男仔追女仔嘅時候想浪漫表白，都會唱《小酒窩》
90後唱K必點合唱歌｜10 – 劉浩龍、謝安琪《滄海遺珠》
最後一首經典千禧年代合唱K歌，就係由劉浩龍同謝安琪合唱嘅《滄海遺珠》。雖然旋律聽起來好易記，但係一啲都唔容易唱，不過大家都係會走音都照唱！歌詞都寫得非常甜蜜，教人學識欣賞另一半嘅優點，當年成為唔少人心目中嘅經典合唱歌。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
