踏入九月立秋時分，相信大家都陸續換上秋裝，迎接秋天。秋天天氣清涼舒適，同一時間氣候逐漸乾燥，衍生各種身體同皮膚問題。小編就帶大家認識一下立秋之後嘅兩個節氣「白露」同「秋分」，並會介紹係面對秋天呢個令人又愛又恨嘅季節時，係日常生活方面有咩立秋養生同保養秘訣，幫助身體同皮膚保濕，舒適咁度過秋天啦！
圖片來源：網絡圖片、First Aid Beauty、Aveeno｜撰文：Icy
立秋兩大節氣
立秋之後主要有兩個節氣，分別為「白露」同「秋分」。
「白露」顧名思義即係白色嘅露珠，由於天氣逐漸轉涼，而且日夜溫差較大，當晚間氣溫下降時，水氣凝結成呈白色嘅露水，所以陰氣都會漸重，要注意保暖同添加衣物。
至於進入「秋分」，代表日照時間開始減少，氣溫驟降，氣候更為乾燥而且變化無規律，唔少人嘅皮膚都會出現緊繃乾燥同痕癢情況，身體上亦會容易出現過敏同呼吸道問題。究竟要採取咩立秋保養措施，先可以急救乾燥皮膚同身體呢？
【立秋保養秘訣1 – 多喝滋潤湯水】
踏入立秋，想滋陰潤肺，從身體內部保濕嘅話，最簡單就係建議多飲養陰生津嘅湯水，例如雪梨無花果玉米湯同雪耳紅棗瘦肉湯，味道清甜不膩，含有舒緩虛熱、止咳化痰、滋潤肌膚嘅作用。而且呢兩款湯水做法好簡單，最適合忙碌嘅都市人每週飲用一次，暖暖身子。
1. 雪梨無花果粟米湯
食材：
雪梨2個/無花果乾約8粒/粟米1條/南北杏少許/水2公升/鹽少量
做法：
1. 將雪梨洗淨去芯，然後切成顆粒
2. 將無花果同粟米切半，與南北杏一齊浸洗
3. 除咗雪梨外，將所有食材放入水中，直至沸騰
4. 再將雪梨放入滾水，慢火煲大約20分鐘就飲得
2. 雪耳紅棗瘦肉湯
食材：
雪耳2朵/去核紅棗數粒/瘦肉1斤/水2公升/鹽少量
做法：
1. 洗淨雪耳同紅棗，然後將雪耳用水浸至發透，並切成小塊
2. 將瘦肉切片，以鹽、醬油、淀粉醃大概20分鐘
3. 將所有食材放入水中，直至沸騰
4. 以慢火煲多大約45分鐘就飲得
【立秋保養秘訣2 – 多吃白色食物】
除咗養生湯水，係食物方面都要多加注意，避免食燥熱嘅食物，以免對肺胃造成刺激。中醫角度認為，五臟中嘅「肺」對應五行五色中嘅「白色」，所以白色嘅食物與呼吸道健康有莫大關係，可以調養身體、滋陰潤肺，例如雪耳、杏仁、白蘿蔔、雪梨、蓮藕、蓮子、冬瓜、白果等等。白色嘅食物大部份含高水份同蛋白質，有效增強人體免疫力，潤滑呼吸道器官，補充身體水份。另外白色食物中嘅水溶性膳食纖維，可以幫助延長飽足感，降低膽固醇以及改善腸道健康，對於想減肥纖體嘅朋友好有幫助！
【立秋保養秘訣3 – 適當地活動及休息】
秋風起天氣涼涼地，相信好多人都會有同感，就係容易覺得疲倦眼訓。其實根據《黃帝內經》嘅養生方法，「秋三月，此謂容平，天氣以急，地氣以明，早臥早起，與雞俱興，使志安寧，以緩秋刑，收斂神氣，使秋氣平，無外其志，使肺氣清，此秋氣之應，養收之道也。」秋天萬物趨向豐碩成熟，日照時間開始縮短，人亦都要順應陽氣嘅生長，宜早睡早起，多啲外出散步同吸收陽光，避免精力下降，影響禦寒能力。
（圖片來源：網絡圖片）
另外，由於立秋後呼吸道會比較唔暢通，鼻腔容易痕癢不適，大家要經常打開窗戶保持空氣流通，唔好終日矇頭大睡，肺氣先會更加清爽，精神亦會越來越飽滿。建議大家如果日間真係覺得攰嘅話，最多可以小睡15分鐘，當係幫自己叉叉電。訓得太多嘅話，反而會越訓越攰，甚至會引起頭痛背痛等身體不適，影響人嘅面色同工作效率！
【立秋保養秘訣4 – 注重補水護膚】
立秋時由於日夜溫差大，皮膚粘膜水分容易蒸發，令皮膚乾燥龜裂，造成痕癢不適。對於女士而言，面部肌膚缺水甩皮，上妝時容易出現卡粉問題。所以除咗飲多啲水之外，每晚一定要做足保濕護膚程序，唔可以懶㗎！建議大家一星期至少敷2次保濕面膜，增強皮膚光澤同滋潤性。
（圖片來源：網絡圖片）
另外畀多個小tip大家，由於燕麥含豐富蛋白質，有效保留皮膚水分，重建肌膚屏障，所以秋冬時選用含燕麥成份嘅護膚品，可以更有效阻隔外部刺激，改善皮膚乾癢同脫皮嘅情況，維持肌膚彈嫩㗎！
（圖片來源：First Aid Beauty、Aveeno）
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
