最近「生可樂」Hit爆網絡，有位顧客就喺香港AEON嘅意見表上面話想買生可樂，點知AEON真係安排訂購，仲回應大家話：誰都可發光！由於太受歡迎，生可樂一上架，好快就畀各位街坊買晒啦！唔知道咩事嘅人可能會一頭霧水，到底咩係生可樂？又點解咁受歡迎呢？小編逐一解釋。
圖片來源：Facebook@AEON Stores Hong Kong、@Tim Chiu、@Ivy Tso、Twitter@pepsi_jpn｜撰文：Angela
AEON極速上架日本生可樂
早前AEON張貼咗一張顧客意見調查表，客人表示要飲日本生可樂，而該店店長過咗幾日就回覆話「安排訂購中」。點知去到8月17日，AEON官方真係透過Facebook宣布上架日本生可樂！網民紛紛留言大讚AEON「做到嘢」，又稱讚佢哋效率高，令香港人都飲到生可樂啦！而生可樂一上架，網店已經火速售罄，而各區分店就吸引街坊就紛紛去掃貨，有啲網民甚至喺關注組實時「報料」，公開邊區仲有貨。
甚麼是生可樂？
大家成日聽到「生啤」、「生朱古力」，咁咩係「生可樂」呢？生可樂其實係日本pepsi嘅產品，使用咗「非加熱製法」製造而成，可以放大可樂嘅酸爽度，同埋令氣泡嘅口感更突出！
點解生可樂咁受歡迎？
「生可樂」一詞之所以Hit爆網絡，係源於一位大陸帶貨主播夏老實，佢喺帶貨影片中不停用誇張言詞形容生可樂，話係「可樂界的天花板」。影片引來超多網民出言諷刺，話「喝了生可樂後，下體能夠旋轉發光」，令「生可樂」成為網絡潮語之一。連AEON嘅官方宣傳都寫住「誰都可發光」。
