照明商店 | 唔知大家之前又有冇睇過Disney+大熱劇集《Moving超異能族》呢？等緊出第二季嘅大家，亦可以睇住原作者姜草所推出嘅《照明商店》！頭4集營造出恐怖緊張氣氛，到訪「照明商店」嘅「客人」究竟誰生誰死？結局竟然內藏洋蔥？！即刻入內文睇介紹啦～
圖片來源：官方圖片 | 撰文：Hedy
繼《Moving超異能族》後大家又可以睇到韓國著名網絡漫畫作家姜草所改編嘅同名漫畫《照明商店》，甚至更被韓國網漫迷奉為神作？究竟當中又有咩咁吸引？
照明商店劇集 | 故事簡介
《照明商店》敘述一家連接陽間與陰間嘅燈具店，凡係位於生死邊緣嘅人，只要喺店入面買燈泡就能活下去，所以大家會喺頭4集不斷見到唔同嘅「顧客」，當中佢哋背後又會有咩故事發生？《照明商店》大膽以生、死為題，透過唔同陌生人嘅故事，從死亡直視自身情感，包括親情、友情、異性愛情、同性愛情。描述佢哋喺通往死亡前未解嘅心結，希望大家喺觀賞嘅同時能夠好好反思，坦然面對人生。
照明商店劇集 | 黃金演員陣容！
劇集《照明商店》由網漫作家姜草親自編劇，更有朱智勛及朴寶英出演男女主角，另外亦有嚴泰九、金雪炫、李妊垠、金大明等實力演員演繹，帶大家慢慢拆解恐怖氣氛背後嘅感人故事！
照明商店劇集 | 主要人物關係
相信大家睇咗頭幾集之後，都發現劇集入面出現唔少人物，小編先幫大家解釋唔同嘅人物關係，等大家睇嘅時候都可以更清楚理解劇中故事。
- 金現民（上班族）
故事一開始大家都會重複見到一個搭巴士嘅上班族，而每一個晚上佢仲會見到坐喺巴士站出面嘅神秘女子。小心翼翼嘅佢仲同呢位神秘女子傾計，甚至仲帶埋佢返屋企避雨？兩人之後又有咩關係呢？
- 李至永（白色衫神秘女子）
即使街道落住雨非常冷清，呢位身穿白色衣服嘅神秘女子，每晚都會坐喺巴士站等待某啲嘢！究竟佢又等緊啲咩？點解每晚仲要拖住行李箱出沒？每次露出指甲嘅時候都會嚇親路人？
- 鄭遠永（照明商店老闆）
全年365日都會運作，從來都唔會休息嘅照明商店，入面竟然有一位永遠都戴住黑超嘅老闆？老闆甚至會喺到見到唔同陽間同陰間嘅人，每日都見到奇怪嘅客人到訪已經見怪不怪？
- 權永知（深切治療病房護士）
深切治療病房護士自從一次車禍之後，都會開始見到一啲唔應該見到嘅人，即使擁有陰陽眼，都相當重視每一位患者，抱著「守護患者生存下去的意志」這份信念工作！
- 朱賢珠（買燈泡嘅學生）
即使每日放學後，朱賢珠都會穿過超陰森黑暗嘅小巷，每日聽媽媽嘅吩咐去照明商店購買燈泡。當中背後有咩原因需要日日都買燈泡？點解呢位學生又會見到唔應該見到嘅人？
- 尹善海（搬屋後怪事連篇）
搬到一座老舊嘅住所之後開始遇到唔同奇怪嘅事，本來開著嘅燈用用吓竟然會熄滅，當中更有女鬼纏身？背後又有啲咩不可告人嘅秘密？
- 楊成識（警察）
觀察力強，擁有過目不忘能力嘅警察，因為追查老人嘅命案而發現《照明商店》，認為店鋪相當可疑！
照明商店劇集 | 實景搭建社區
為咗還原漫畫入面嘅面貌，劇組更以實景搭建出劇中嘅社區，完美營造出真實又陰暗嘅氣氛。黑暗嘅小巷，與滿佈燈泡嘅照明商店，呈現出一個最強大嘅對比，更凸顯照明商店嘅溫暖。
照明商店劇集 | 埋《Moving超異能族2》伏筆？
當大家睇到大結局嘅時候，都會見到《Moving超異能族》嘅女主角，入面嘅場景就係警察調查緊旌元高中崩塌事件，由高允貞所飾演嘅張喜秀，佢擁有超能力，固然唔會受到任何傷害！入面更出現擁有停止時間超能力嘅學生，結局正埋《Moving超異能族2》伏筆！
照明商店劇集 | 《照明商店》期間限定主題Café
Disney+ 將劇集主要場景「照明商店」移師到香港，於即日起至2025年1月1日，將九龍城一間極具特色嘅Café —「BLOSSOM 波甚珈琲」打造成《照明商店》期間限定主題Café，等觀眾親歷劇中神秘嘅「照明商店」。店入面亦有一系列海報及劇照展出，等觀眾可以細賞姜草嘅畫作以及劇集嘅高還原度！另外，大家亦可一試由劇集暖心治癒嘅劇情及主題作為靈感嘅「BLOSSOM 波甚珈琲」，團隊特別製作出一款無酒精限定版愛爾蘭咖啡(Spiced Non-alcoholic Irish Coffee) ，加入輕微辣味，等你由內到外感受暖意。
【INFO】
《照明商店》期間限定café
日期：即日起至2025年1月1日
時間：星期一﹑日: 上午8時至晚上6時；星期二至六: 上午8時至晚上11時
地點：九龍城南角道45號地舖 (BLOSSOM 波甚珈琲)
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
