火影忍者真人版電影 | 日本漫畫《火影忍者》喺全球銷售量破2.5億，深受大家歡迎！近日獅門影業宣布將會拍攝《火影忍者》電影，更由《尚氣》導演執導，即刻睇睇相關詳情！
圖片來源：X@kishimotomasshi | 撰文：Hedy
《火影忍者》為日本漫畫家岸本齊史，喺1999年開始於週刊少年Jump上連嘅漫畫，內容以日本忍者傳奇故事為主軸，累計銷售高達2.5億冊。早喺2015年，獅門影業（Lionsgate Films）一直渴望製作《火影忍者》嘅真人電影版，不過計劃一度被擱置。直到最近先確實宣布製作真人版電影，將會由《尚氣與十環幫傳奇》嘅導演Destin Daniel Cretton執導及編劇，相信一眾粉絲都相當期待！
火影忍者真人版電影 |《尚氣》導演執導
要將《火影忍者》製作成真人版電影，Destin Daniel Cretton早已經同原作者岸本齊史喺東京見面，聆聽作者對自己作品嘅願景。岸本齊史同時亦喺X證實電影將會交由Destin Daniel Cretton執導，更表示認同佢係呢套電影嘅最佳導演：「當我聽說Destin Daniel Cretton加入時，恰巧在近期看過電影《尚氣與十環幫傳奇》，認為他擅長製作細膩人物嘅劇情片，是電影最佳導演人選。」
火影忍者真人版電影 | 原作者對合作有信心！
岸本齊史實際同Destin Daniel Cretton見面後，發現對方係一個思想開放，同時又願意接受自己意見嘅一個導演，對製作合作上有信心。相信兩人聯手嘅情況下，可以將原著嘅《火影忍者》帶畀大家。岸本齊史更強調《火影忍者》真人版將會係一部擁有壯觀動作場面同深刻劇情嘅電影，自己對此感到相當興奮！雖然暫時仲未有消息公布有關選角以及上映日期，但都希望選角可以貼近漫畫原著，咁先會令大家滿意。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
