深圳除咗有好多美食，文創區嘅發展都好成熟。有別一般商業化嘅商場，文創區林立數之不盡嘅藝術小店，為你嘅周末注入新創意。行到攰仲可以去咖啡店買杯特色飲品休息下，順便打一下卡。小編整理咗10個深圳文創區，每個都非常有特色，一定夠你行足一日。
圖片來源：小紅書@奶茶全糖珍珠加多一点、草莓逛深圳、深圳Plus、白板TabulaRasa、花见、古咕咕、广东姑姐、Koala baby、龙浩（摄影爱好者）、Emmy 、布兰兔｜撰文：Cynthia
深圳文創區 | 1. 南頭古城
南頭古城距離深圳灣口岸地鐵站只係7個站，出站步行7分鐘就到達，交通非常方便。南頭古城薈萃藝術、飲食、文化多元化嘅小店，仲有幾個資訊性嘅展覽。當中人人必打卡嘅酷礦美式冰淇淋，有唔同造型及顏色嘅雪糕，靚到唔捨得食。仲有必去嘅網紅店布蘭兔的植物莊園，茶濾超精緻，喺到買禮盒送俾人就啱喇！
【INFO】
南頭古城
地址：深圳市南山區南頭天橋北8米處(深南大道旁)
營業時間：24小時
深圳文創區 | 2. 海上世界
距離深圳灣口岸只係幾個站，交通非常方便快捷。向海靠山，環境清幽，係放假遠離繁囂嘅好去處。海上世界設有藝術中心，可以睇畫展、戲劇、仲有藝術教育，文青一定會中意。
【INFO】
海上世界
地址：廣東省深圳市南山區招商街道水灣社區蛇口望海路1128號
營業時間：24小時
深圳文創區 | 3. 南海意庫
南海意庫前身係80年代初三洋老舊廠房，改造後新舊交融，綠化感覺清新，一路散步有開放自然嘅寫意。坐喺藝術咖啡館歎飲品，別有一番風味。
【INFO】
南海意庫
地址：深圳市南山區興華路6號
營業時間：每日8:30–12:00、14:00–18:30
深圳文創區 | 4. 華僑城文創區
華僑城文創區融合「創意、設計、藝術」於一體，藝術發展蓬勃。有好多手作擺賣，例如精緻飾物、衣服、皮具、手工梘等等，可以一覧無限創意。附近仲有好多打卡位，隨心影都非常有質感。
【INFO】 華僑城文創區 地址：廣東省深圳市南山區錦綉北街2號 營業時間：24小時
深圳文創區 | 5. Loft53
Loft53位於南山區同福田區之間，香港一小時即可到達。入駐超過300家小眾品牌，當中包括好多特色藝文公司。不時舉辦創意市集同音樂節等等，喺呢到可以放鬆渡過寫意嘅一日。
【INFO】
Loft53
地址：深圳市南山區華僑城創意文化園內LOFT53街區
營業時間：24小時
深圳文創區 | 6. 深業上城
深業上城喺2018年開幕，係一個發非常成熟嘅文創區。坐落福田區，主打國際城市綜合為定位，結合食、玩、買、住等元素。值得一提嘅係，全球首間無印良品酒店亦都喺度，一定唔可以錯過。
【INFO】
深業上城
地址：深圳市福田區皇崗路5001號
營業時間：每日10:00 – 22:00
深圳文創區 | 7. 深圳灣萬象城
深圳灣萬象城坐落於南山后海中心區，與三條地鐵線緊密連接，面積都好大。雖然係商場，但有齊書店、藝術展覽、電影院同公園，充滿藝術氣息。
【INFO】
深圳灣萬象城
地址：深圳市南山區科苑南路2888號
營業時間：每日10:00 – 22:00
深圳文創區 | 8. 龍城Cc創意街區
新進嘅龍城Cc創意街區融合數字創意同藝文生活，好快就成為年輕人熱愛嘅蒲點。創意街區係24小時開放，木質氛圍好啱打卡。街區薈萃多間文青書店、西餐廳、咖啡店，不時更有藝術展，不妨揾個周末上黎放鬆一下。
【INFO】
新進嘅龍城Cc創意街區
地址：龍崗區華美路與清林路交叉口北150米
營業時間：24小時
深圳文創區 | 9. 坂田文化街
坂田文化街走古風路線，由經修葺嘅仿古建築打造，有種穿越返回古時嘅韻味，令每一個細節位都好啱打卡。呢度有好多特色店舖，行完茶葉店、咖啡店或酒館，十分古色古香。
【INFO】
坂田文化街
地址：深圳市龍崗區阪田街道雅園路（近中海月朗苑）
營業時間：24小時
深圳文創區 | 10. 蛇口價值工廠
蛇口價值工廠前身係廣東浮法玻璃廠，經過改造成為潮流藝文區。工廠建築，最啱拍攝工業風嘅照片。最標誌性嘅係紅白色大煙囪，由原料筒倉變身成為數字及元宇宙藝術館。另外呢度更加係周星馳《美人魚》電影嘅取景地，係咪好熟面口呢？
【INFO】
蛇口價值工廠
地址：深圳市南山區海灣路8號
營業時間：每日09:00-18:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
