日本紅葉2024 | 踏入九月，相信大家最近都開始感受到陣陣秋意～而最近日本亦公布咗各地區嘅最佳賞楓時間，最早依家就已經有得去日本賞楓喇！今次小編就為大家介紹定8大日本賞楓地點，大家可以bookmark定，計劃去日本睇紅葉！
圖片來源：北海道官方旅遊網站、富士河口湖町觀光聯盟、日本國家旅遊局、東京旅遊官方網站、東京都公園協會、X@mesoru0501、THE嵐山、Facebook @Kiyomizudera Temple | 撰文：Icy
「Weathernews 紅葉Ch. 」及「日本氣象株式會社」最近公布日本各地區嘅最佳賞楓時間，較寒冷地區嘅樹葉會比較早變色，所以北海道率先於9月中至10月下旬出現紅葉景象，緊接嘅係東北、關東、關西、中部、中國、四國以及九洲地區，紅葉期大概維持至12月上旬。
日本賞楓地點2024 | 1. 美瑛青池
位於北海道嘅美瑛青池係一個充滿仙境氛圍嘅紅葉觀賞點，藍綠嘅水面中映照住鮮豔嘅紅葉，加上陣陣落葉，散發濃濃秋意。而於11月至3月期間，當地更會於晚上時份點燈，增添詩意～不過要注意晚上點燈結束後，青池就唔會開放參觀，所以要留意離開時間及交通！
【INFO】 美瑛青池 地址：北海道上川郡美瑛町白金 夜楓點燈時間：17:00-21:00 前往方法：於JR美瑛站乘搭周邊巴士至「白金青池站」，再步行約5分鐘 官方網站：北海道美瑛町
日本賞楓地點2024 | 2. 登別地獄谷
位於北海道嘅登別地獄谷，雖然名字有啲嚇人，但其實係一個擁有壯麗大自然景色嘅觀光點。作為登別溫泉嘅泉源，蒸汽會噴湧而出，彌漫住硫磺嘅氣味。每逢秋天，登別地獄谷附近都會被豔麗嘅紅葉環繞，加上裊裊升起嘅白煙，吸引唔少人前往該處朝聖呢個咁特別嘅自然景象。
【INFO】 登別地獄谷 地址：北海道登別市登別温泉町 前往方法：由JR登別站乘搭道南巴士到「登別溫泉巴士總站」，再步行約10分鐘 官方網站：登別地獄谷
日本賞楓地點2024 | 3. 河口湖
河口湖北岸嘅「紅葉迴廊」有近60棵巨大楓樹，與附近嘅富士山景相映成趣。而當地更會於今年10月26日至11月20日舉行「2024年富士河口湖紅葉節」，於日落至晚上時分點燈，景色非常夢幻。屆時大家可以參加日本地道文化活動，以及享用日本美食，感受祭典熱鬧氣氛。
【INFO】 2024年富士河口湖紅葉節 地址：河口湖畔河口梨川周辺 日期：2024年10月26日至11月20日 點燈時間：日落至晚上9:30 前往方法：由東京市區或新宿站乘搭高速巴士到「河口湖站」/從JR中央線大月站搭乘富士急行線，於「河口湖站」落車 官方網站：富士河口湖紅葉節
日本賞楓地點2024 | 4. 箱根蘆之湖
位於箱根嘅蘆之湖因火山而形成，擁有達三千多年歷史，好多遊客都會慕名而來，欣賞大自然嘅傑作。箱根除咗係溫泉聖地，每逢入秋，蘆之湖周邊都會被紅葉染成鮮豔嘅紅色，仲可以將富士山景盡收眼底～
【INFO】 箱根蘆之湖 地址：神奈川縣足柄下郡箱根町元箱根 前往方法：從「箱根湯本站」乘坐巴士前往蘆之湖/乘搭巴士從「箱根湯本」到達蘆之湖南岸「元箱根港」 官方網站：日本國家旅遊局
日本賞楓地點2024 | 5. 代代木公園
相信去開日本嘅朋友都對代代木公園唔陌生，除咗地理位置方便，公園四季都會有唔同景象。其實喺呢個位於東京都市區嘅代代木公園，都可以欣賞漫天紅葉。每年11月至12月上旬，公園內達1000棵嘅楓樹及銀杏樹都會開始轉黃轉紅，充滿浪漫秋意～
【INFO】 代代木公園 地址：東京都澀谷區代代木神園町神南二丁目151-0052 前往方法：乘搭JR山手線於「原宿站」落車，再步行約5分鐘 官方網站：東京旅遊官方網站
日本賞楓地點2024 | 6. 六義園
位於東京都嘅六義園除咗係一座歷史悠久嘅江戶泉水庭園，擁有高大嘅假山及清澈嘅大泉水景色，亦都係日本數一數二嘅紅葉名勝。秋天時分當地會特別舉辦「庭紅葉六義園夜間特別觀賞」活動，點燈後嘅庭園別有一番恬靜氛圍。
【INFO】 六義園 地址：東京都文京區本駒込6-16-3113-0021 前往方法：乘搭東京地鐵南北線或JR山手線，於「駒込車站」落車，再步行約10分鐘 夜楓點燈時間：18:00-20:30 夜楓點燈入場費：900日圓 官方網站：東京旅遊官方網站
日本賞楓地點2024 | 7. 嵐山渡月橋
位於京都嘅嵐山渡月橋擁有千年歷史，木製嘅橋身橫跨河水，非常宏偉。踏入秋季約11月中下旬時，周邊群山就會出現綿延不絕嘅紅葉，大自然嘅風景如畫，所以吸引好多遊客遠道而來～
【INFO】 嵐山渡月橋 地址：京都府京都市右京區嵯峨天龍寺造路町 前往方法：由京都JR車站乘搭「嵯峨野線」到「嵯峨嵐山站」，步行10分鐘就能抵達/乘搭京福電車於「嵐山站」落車，步行2分鐘就能抵達 官方網站：嵐山渡月橋
日本賞楓地點2024 | 8. 清水寺
位於京都嘅清水寺被譽為賞楓第一名勝，建築結構獨特，而且別具和風格調。每逢大約11月中下旬，大批遊人慕名而來，從位於正殿前、建於高台上嘅「清水舞台」，俯瞰漫山紅楓嘅壯觀景緻。當地更會於11月中開始特別舉辦夜楓點燈參拜儀式，燦爛嘅燈火照亮各個建築及紅葉，場景十分夢幻。
【INFO】 清水寺 地址：京都都市東山清水1-294 前往方法：由京都JR車站乘搭206號公車到「五条坂站」，再步行約10分鐘 夜楓點燈時間：18:00 - 21:30 官方網站：清水寺
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
