日本臥舖列車 | 去日本旅行，除咗喺市區吃喝玩樂之外，一生人必定要體驗一次日本臥舖列車！大家可以喺列車包廂內舒適地享受旅程，透過車窗欣賞無敵風景，感受日本恬靜宜人嘅郊外風光。今次小編就為大家推薦5大人生必試日本臥舖列車，最抵只需$600一晚，即睇以下介紹啦！
圖片來源：阪急交通社、West Express銀河官網、暮光瑞風號官網、九州七星官網、四季島官網 | 撰文：Icy
日本臥舖列車推薦 | 1. Sunrise瀬戸・出雲號
「Sunrise瀬戸・出雲號」係日本現時唯一每日固定行駛嘅夜間臥舖列車，每晚10點由東京車站出發前往出雲或高松，途經橫濱、熱海、沼津、富士、靜岡、濱松、姬路、岡山，全程約12小時。普通單人房最抵只需$950一晚，另外可加錢租用淋浴間，啱晒預算有限但想體驗乘搭臥舖列車嘅朋友！
「Sunrise瀬戸・出雲號」設有多款客房，例如豪華單人房、單人雙床房、日出雙人房等等。每個房間都整潔整齊，並設有密碼鎖，而單人包廂更設有大車窗，一瞓醒就可以欣賞無敵日出靚景～
大家最快可以係官網預訂到一個月後嘅車票，每日開賣時間為日本時間早上10點，但由於「Sunrise瀬戸・出雲號」擁有超高人氣，所以經常秒速售罄，大家記得要捕住官網開賣時間喇～
【INFO】 Sunrise瀬戸・出雲號 車票價錢：每人港幣$950起 訂票方式：Sunrise瀬戸・出雲號官網
日本臥舖列車推薦 | 2. West Express銀河
「West Express銀河」為西日本旅客鐵道嘅臥舖列車，山陰路線由京都站出發行駛至出雲站，雖然車身唔算太豪華，但勝在沿途可盡享山陽山陰地區以及海邊小鎮嘅風光。
-
乘搭West Express銀河列車，沿途可盡享山陽山陰地區嘅風光（圖片來源：West Express銀河） 列車採取暖色調設計，除咗普通指定席、單人及多人包廂、家庭客房等，仲設有女性專用空間。普通指定席價錢只需約港幣$600，而單人房價亦只需港幣約$900，價格非常平易近人～官網現時正售賣2024年3月至6月嘅車票，有興趣嘅朋友千祈唔好錯過喇！
觀光車廂（圖片來源：West Express銀河） 
臥舖車廂（圖片來源：West Express銀河） 
和風便當（圖片來源：West Express銀河） 
休憩車廂（圖片來源：West Express銀河） 
指定席（圖片來源：West Express銀河） 【INFO】 West Express銀河 車票價錢：每人港幣$600起 訂票方式：West Express銀河
日本臥舖列車推薦 | 3. 暮光瑞風號
「暮光瑞風號」屬於比較豪華嘅臥舖列車，一間皇家雙床房盛惠約$48,000，但乘客喺列車上可以觀賞無敵海景，並享用五星級酒店式服務，所以每次開賣車票，都會火速售完！
喺列車上可觀賞無敵海景（圖片來源：暮光瑞風號官網） 整個行程為期2至3日，由大阪出發至下關，沿途會造訪岡山、島根、鳥取等觀光地，帶領乘客探索日本郊外美景，仲可以品嚐到各款大師級傳統京都料理。官網現時正開賣2024年9月至11月嘅車票，以抽籤方式售賣，並於2024年4月30日截止，有興趣嘅朋友就要盡快遞交申請喇！
京都和風料理（圖片來源：暮光瑞風號官網） 
客房（圖片來源：暮光瑞風號官網） 
餐廳（圖片來源：暮光瑞風號官網） 
休憩車廂（圖片來源：暮光瑞風號官網） 
觀光車廂（圖片來源：暮光瑞風號官網） 【INFO】 暮光瑞風號 車票價錢：每人港幣$18980起 訂票方式：暮光瑞風號官網
日本臥舖列車推薦 | 4. 九州七星
「九州七星」同樣係主打奢華旅行體驗嘅夢幻臥舖列車，雖然索價達港幣$56000，但每次開賣只有少量名額，以抽籤形式售票，所以就算有錢都未必搭得到！
九州七星列車（圖片來源：九州七星官網） 車上設有酒吧、藝術畫廊、茶屋等設施，讓乘客感受日本傳統文化氣息。至於客房採用沉穩舒適木系嘅家具，結合日本傳統工藝，由陶藝師燒製洗臉盆，充滿古典昭和風格。乘客沿途可以觀賞東海夕陽西下嘅壯麗風景，並享用由九州具權威性嘅廚師長所烹調嘅日式料理。
窗外風景非常壯麗！（圖片來源：九州七星官網） 
列車設計充滿昭和風格（圖片來源：九州七星官網） 
列車設計充滿昭和風格（圖片來源：九州七星官網） 
列車設計充滿昭和風格（圖片來源：九州七星官網） 
客房以木系設計，優雅舒適（圖片來源：九州七星官網） 【INFO】 九州七星 車票價錢：每人港幣$56000起 訂票方式： 九州七星
日本臥舖列車推薦 | 5. 四季島
「TRAIN SUITE四季島」豪華臥舖列車，現時提供由東京上野站出發，途經新潟縣同長野縣，再返回上野嘅2天路線；以及前往函館同北海道南部，再返回上野嘅4天路線。車廂以一年四季為設計概念，到處都可以搵到日本傳統工藝元素，例如和紙、淨法寺漆製嘅壁板等，充滿華麗大氣嘅氛圍。
四季島列車（圖片來源：四季島官網） 列車共有17間客房，每趟只接待34個旅客，可以話係一票難求～車廂設有多個大面積車窗，乘客可全景式感受窗外迷人嘅景緻。如果入住豪華套房或者四季島套房，仲可以體驗喺檜木風呂泡澡！旅程中途亦會安排以歷史文化及藝術為主嘅景點，例如參觀燕喜館、北海道老字號「登別溫泉鄉滝乃家」等等，體驗日本傳統文化。
四季島套房（圖片來源：四季島官網） 
豪華套房（圖片來源：四季島官網） 
標準套房（圖片來源：四季島官網） 
用餐車廂（圖片來源：四季島官網） 
車廂以現代感線條融合日本傳統工藝設計（圖片來源：四季島官網） +2【INFO】 四季島 車票價錢：每人港幣$16600起 訂票方式：四季島
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
