巴黎殘奧 | 2024年巴黎殘疾人奧林匹克運動會已經開始，香港隊派出共23名運動員出戰，相信大家睇比賽嘅同時，都會對殘奧運動分級制感到陌生，就以陳睿琳喺女子S14級100米蝶泳奪銀牌為例，大家又知唔知英文字母同數字又代表啲咩呢？睇賽事嘅同時，原來呢啲小知識你要知！
圖片來源：Facebook@蘇樺偉 So Wa Wai、中國香港傷殘人士體育協會 | 撰文：Hedy
啱啱結束咗巴黎奧運之後，就有殘奧，當中有大部分嘅運動項目都同奧運相同，而硬地滾球同盲人門球就係殘奧獨有嘅項目。今年香港共有23名運動員參加共8項運動，當中包括硬地滾球、游泳、輪椅劍擊、乒乓球、羽毛球、射箭、田徑以及馬術。咁究竟每個運動項目又會點分級？
巴黎殘奧 | 殘奧運動員
參加殘奧嘅運動員至少要係以下十種殘障之一，包括肌肉力量受損、被動運動範圍受損、肢體虛弱、腿長不等、身材矮小、肌肉緊張、動作不協調、不自主運動、視力障礙以及智力障礙。為咗令每位殘疾運動員都可以公平咁比賽，就會因應運動員不同殘障程度而進行分級，當中可分為3大類：身體殘障、視力障礙及智力障礙，而當中每項運動都有唔同嘅分級。
1. 田徑
田徑為殘疾人運動中類別最多、級別設置最多嘅項目。同一項目唔同級別仲會有相應嘅特殊規例。當中大家最常見到嘅英文字F/T又代表咩意思？喺田徑項目入面，F代表田項，T代表徑項，數字代表類別和級別。數字越低，殘障程度越高。而上或下肢障礙(T42-T46級)及腦癱(T35-T38級)運動員起跑時可以選擇唔用起跑器作為起跑方式。而香港人最熟悉嘅蘇樺偉就係屬於T36級別(腦癱），喺殘奧曾6次奪金。
分級
- 視障：T11-13；F11-13
- 智障：T20；F20
- 腦癱：T32-38；F31-38
- 短肢：T40-41；F40-41
- 下肢障礙：T42-44、T61-64；F42-44、F61-64
- 上肢障礙：T45-47；F45-46
- 輪椅組：T51-54；F51-57
2. 羽毛球
殘疾人羽毛球喺2020東京殘疾人奧運會先正式成為比賽項目，由於羽毛球係一種講求速度、體能同技術變化嘅運動，固設企立組同輪椅組。當中更以運動員嘅活動範圍、肌肉力量、平衡和球拍操控等能力分為六個級別。同樣地數字越低，殘障程度越高。
分級：
- 輪椅組：WH1及WH2
- 企立組 ：下肢組(SL3及SL4)、上肢組(SU5)、短肢組(SH6)
3. 射箭
射箭項目分為反曲弓及複合弓，比賽將會喺戶外進行，射距分為為70米及50米，每名運動員將會射出72支箭，進行排名賽及淘汰賽。當中射箭根據運動員嘅身體功能同平衡力分為三個級別：
分級：
- 企立組：ST
- 輪椅組：W1&W2 （W2級別嘅運動員活動能力較W1級別運動員更佳）
4. 射擊
運動員可以根據身體情況，選擇坐喺輪椅或射擊凳子上作賽，或者選擇以站立形式作賽。比賽亦都喺臥射、立射、跪射嘅姿勢同規則均有特定要求！而運動員將會根據手槍同步槍將運動員分為三級，各級再分為A、B以及C三類：
分級：
- 上和/或下肢殘疾運動員：SH1級(手槍)
- 下肢殘疾運動員：SH1級(步槍)
- 上肢殘疾運動員：SH2級（步槍）
5. 游泳
游泳可以分為四種泳式包括自由泳、蛙泳、蝶泳及背泳，當中殘疾人游泳項目嘅分級主要為視障（11、12同13級）、肢體殘疾及智障（14級）三類。肢體殘疾運動員以綜合功能分級，分為：
分級：
- 自由泳、背泳、蝶泳：S1-S10級
- 蛙泳：SB1-SB9級
- 混合泳：SM1-SM10級
6. 乒乓球
自1960年羅馬首屆殘疾人奧運會，乒乓球已經係殘奧項目之一，乒乓球主要分為輪椅組、企立組以及智障組三類，共十一個級別，TT1級為輪椅組中殘疾程度最嚴重嘅級別。TT6則為企立組中殘疾程度最嚴重嘅級別。
分級：
- 輪椅組(TT1-TT5級)
- 企立組(TT6-TT10)
- 智障組(TT11級)
7. 輪椅籃球
輪椅籃球運動員大部分都係下肢截肢同脊柱損傷人士會因應運動員嘅殘疾程度給予分值(1-4.5分)，1為殘疾程度最嚴重，而4.5分則相對較輕。每隊五名運動員嘅級別總分不得超過14分。運動員每次推動輪椅兩次後，必須拍球一次或作出傳球、投籃等動作。
8. 輪椅劍擊
輪椅劍擊分為花劍、重劍及佩劍，運動員將會坐喺一張已固定於可調較距離及左右對賽位置嘅金屬架輪椅上，只有上半身可以自由移動。輪椅劍擊運動員按功能測試評定，分成A、B及C三個級別，A級殘疾程度最輕，C級最嚴重。
9. 硬地滾球
硬地滾球為殘奧獨有嘅運動項目，比賽將會喺一個12.5米乘6米平滑嘅木地或膠地上進行，要喺規定嘅區域，將自己嘅6個波，盡量投近去白色嘅目標球。
分級：
- 可用手或腳發球：BC1級
- 不能有助手協助：BC2級及BC4級
- 助手協助：BC3級
10. 馬術
殘奧嘅馬術同奧運會嘅馬術唔同，殘奧只會設盛裝舞步，當中提及將劃分為級別I至V，I級為殘障程度最嚴重嘅運動員，而V級則為最輕。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
