卡通片主題曲 | 每一套卡通片主題曲絕對係陪伴大家成長，細個每日都睇電視嘅大家，相信一早已經將歌曲背得滾瓜爛熟！即刻重溫下呢9大經典主題曲，回味下兒時睇卡通片美好嘅時光啦！
圖片來源：YouTube影片截圖、網上圖片 | 撰文：Hedy
卡通片經典主題曲1. 多拉A夢——陳慧琳
細個大家都可能希望自己嘅生命中，都會有一個多啦A夢，成為自己嘅好朋友，攞出無限嘅法寶嚟幫你，咁就可以用隨意門同竹蜻蜓周圍去！由陳慧琳所演唱嘅《多啦A夢》主題曲，相信一開口就已經帶畀大家滿滿嘅回憶：「人人期望可達到，我的快樂比天高。人人如意，開心歡笑跳進美夢，尋獲美好！」
卡通片經典主題曲2. 美少女戰士——周慧敏、王馨平、湯寶如
一聽到「美少女轉身變已變成戰士，以愛凝聚力量救世人跳出生天」以及「你你你快跪下，看我引弓千里箭」，就會記得係由周慧敏、王馨平、湯寶如所唱嘅《美少女戰士》主題曲。相信無論係80後、90後定係00後都絕對會聽過呢首經典嘅歌曲，唔知大家又有冇收藏埋佢地嘅產品呢？
卡通片經典主題曲3. 超人迪加—— 陳奕迅
講到男生們童年嘅最愛，一定會有《超人迪加》，甚至會喺屋企同兄弟姐妹一齊扮演超人同怪獸嘅對決。再唱住陳奕迅呢首《超人的主題曲》相當有氣氛：「銀河唯一的秘密，天際最強人物」、「奴隸獸，奴隸獸，東一隻 ，西一隻，東一腳，西一腳，給批鬥」，回憶翻晒嚟！
卡通片經典主題曲4. 我們這一家——湯盈盈
細個想睇搞笑又輕鬆嘅卡通片，就一定會睇《我們這一家》，無論係花師奶、花老爺、阿柑同阿吉，都相當搞笑。加上愉快嘅主題曲「We are family，無聊日子都有意思，很多趣事，傻笑真趣緻，尤其樣子古怪我知，再添趣事。」可以令人放低翻學嘅壓力！
卡通片經典主題曲5. 櫻桃小丸子——歐倩怡
睇住櫻桃小丸子一家人溫馨嘅相處時光，再加上小丸子每日都面對唔同嘅煩惱，都會令大家忍唔住想一齊唱：「問題天天都多Beli Bala Beli Bala」，呢句洗腦性嘅歌詞簡直令人印象深刻！
卡通片經典主題曲6. Keroro軍曹——鄭嘉穎
為咗征服K隆星，Keroro軍曹以及一班部下Giroro、Tamama、Kururu、Zeroro喺日向家生活。每個角色都有獨特嘅性格同口頭禪，超可愛！就算唔記得完整嘅主題曲點唱，都一定會記得呢幾句：「Get up，Get up，Get up，精兵都好勝，義勇義勇要出戰一拼！」
卡通片經典主題曲7. 哈姆太郎——Twins
細細個大家都可能會想養倉鼠，但屋企人就未必允許！而哈姆太郎就係一隻充滿好奇心嘅黃金鼠，由小露飼養，超得意！每次見到哈姆太郎就會諗起主題曲：「朋友最多，轉圈轉圈，哈姆共你。」
卡通片經典主題曲8. 動物橫町——鍾嘉欣
《動物橫町》入面出現唔同嘅動物，當中更喺小美嘅屋企建造咗一個可以通往動物橫町嘅秘密之門，唔同嘅動物輪流登場。除咗有健太、依沙同小爾之外，仲有最搞笑嘅山並先生。輕快嘅主題曲：「Rabbit 齊嚟，Panda 齊嚟，忽然嚟齊，不用呆滯，So’ Mi’ Re’ Do’ Hey!」都會令人想加入一齊玩！
卡通片經典主題曲9. 蠟筆小新——矢島晶子
《蠟筆小新》嘅主題曲雖然唔係廣東話，但每次聽到輕快同有動感嘅旋律：「象さん、象さん」，就會諗起小新可愛又搞鬼嘅瞬間，會令大家記得主題曲入面幾句嘅日文。每次睇《蠟筆小新》都會令人不知不覺間變得開心！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
